Dizionari de Lenghe Furlane

tignî sù    [FO]

1. loc.v. fâ stâ adalt:  il missionari, une volte finît, al tignì sù lis mans, al sierà i voi, al preà un momentin (Riedo Pup, I furlans e la confession)
2. loc.v. fâ che alc o cdn. al stedi impins, verticâl, dret o te sô posizion, dant fuarce o poie o ecuilibri:  al pretindeve cu la sô fuarçate di tignî sù la armadure [che e jere li li par colâ] (Pieri Somede dai Marcs, Ce sdrumade); [l'impresari] al mostrà lis pieris che a varessin tignût sù la loze sul curtîl, e lis travamentis di cjastinâr (Maria Forte, La tiere di Lansing)
   Sin. sostignî , tignî in pîts , tignî impins , rezi
   Cfr. tignî , pontâ , frontâ
3. loc.v. (ancje fig.) di une part dal cuarp, jessi sane e fuarte avonde di fâ stâ ben impins:  "O vevi ancje la anime strache e lis gjambis no mi tignivin sù" (Maria Forte, Dome la cjampanute di Sant Bortul); al veve di rangjâsi. Preâ il Signôr di vê salût, di no inmalâsi mai e di lavorâ fin che la schene lu tignive sù (Riedo Pup, I furlans e la pension)
4. loc.v. dâ fuarce fisiche o psicologjiche o morâl:  si sintive pierdude tun disfâsi di dut. None Lise e sfladassave, sù e jù pes scjalis, tantis e mai tantis voltis tune dì, par puartâi alc di tignîle sù… Par obleâle a mangjâ (Maria Forte, Cjase di Dalban); e veve ben di rivâ ancje la ore di podê lâ fûr di li [dal ospedâl psichiatric], une dì o chê altre. Cumò e veve chê sperance a tignîle sù (Jolanda Mazzon, Di là de rêt); Milie no à volût savênt plui di nissun; e veve so pari di viodi di lui, e veve Tonin che al veve tante bisugne di afiet, di jessi tignût sù (Pieri Menis, Si disarès che e je inventade)
   Sin. sostignî , tignî in pîts , tignî impins
   Cfr. tirâ sù
5. loc.v. fâ stâ sveât:  "[il frutin] Al duar masse di dì!! No ai vût timp di tignîlu sù iar e cussì al mi à fat mateâ la gnot" (Bruno Paolo Pellarini, Ninenane)
   Sin. tignî in pîts , tignî impins
6. loc.v. dâ fuarce, reson, funzionalitât e v.i. a alc di imateriâl:  a son otante e passe agn che, par tignî sù il spirt nazionâl, si spude velen e pantan in muse a chei popui che a son nestris vicins di cjase (Josef Marchet, Blestemis); un dai principis che al ten sù la nestre colaborazion, in fat di scuele, al è juste apont il fatôr de lenghe furlane, che al caraterize lis nestris comunitâts (Luche Nazzi, Il prin pas ai Comuns)
   Sin. sostignî , tignî in pîts , tignî impins
   
   1. dâ une fonde logjiche, une prove, une conferme e v.i.:  cheste scuvierte e ten sù duncje la teorie de cool early Earth, che e dîs che il disfredament de superficie de Tiere al è stât svelt (Cristina Minuzzo, Gotis di sience 3)
7. loc.v. fâ vê o fâ mantignî o fâ cressi dignitât, onôr, braùre e v.i.:  il cjaval al jere bon pai naulis e par tignî sù la sô braùre (Maria Forte, Il Bulo di Crodio)
8. loc.v. fâ lâ indenant, fâ continuâ:  "Soi vignude a viodi a impiâ la çocje di Nadâl, pecjât che no è ca chê puare Miute, no si pues mai dismenteâle, oh! Jê sì che saveve tignî sù lis usancis in famee" (Pieri Somede dai Marcs, Vilie di Nadâl (teatri))
   Sin. puartâ indenant
9. loc.v. permeti di vê lis risorsis che a coventin:  jo, dut il dì a vore tal mio ufici par meti vie alc, par tignî sù la famee, e jê a fâ i comodins a fâ la parone (Pieri Somede dai Marcs, Barbane)
   Sin. sostignî , tignî impins , tignî in pîts
   
   1. dâ i bêçs che a coventin:  dut al passave pes mans dal president Silvano Pagani, che stant che al jere chel che al veve tirât fûr plui bêçs par inviâ la radio e tignîle sù tai agns, nissun si varès mai insumiât di dubitâ de sô onestât (Max Mauro, Un Friûl difarent: i 90 mhz di Onde Furlane)
      Sin. poia , sovenzionâ , finanziâ , judâ
10. loc.v. fâ funzionâ:  se un frutin al impare subit dôs o trê lenghis, la fonologjie e la gramatiche di dutis chestis lenghis a vegnin tignudis sù tes stessis struturis dal cerviel, ven a stâi inte memorie procedurâl (Franc Fari, Il cjâf dai furlans)
11. loc.v. di cdn., interpretâ une part intune rapresentazion:  al è content par vie che i àn dât di tignî sù la part dal protagonist
    Sin. interpretâ , fâ
    Cfr. recitâ
    
    1. di une compagnie, meti in sene un spetacul:  tignî sù e puartâ ae fin un drame cussì impegnatîf, dificil e cjamât tant che chel di Schiller, al è za un grant merit (Bepi Agostinis, Storie e cronistorie dal teatri in Friûl)
12. loc.v. jessi cui che, disint o cjantant preieris insiemi cun altris, lis dîs par prin e plui fuart:  al preave: il rosari lu tignive sù lui, di là dal larin, subit cene (Dino Virgili, La aghe da pît la cleve); Basili Pascut che al tignarà sù lis litaniis cun chê vosone çondare che, in glesie, e fâs tremâ lis ramis (Josef Marchet, Lis predicjis dal muini)
13. loc.v. fâ spietâ cdn., tignîlu tra il sì e il no, cun chê di sielzi cemût e cuant che al tornarà cont:  "O sin dacordo, alore, no!" "Oh, no dîs migo chest, jo." "Cemût?" "Capirês, cussì, sun doi pîts…" "Gjo, Mie… No orès, jo, che mi tignissis sù tant par vê un stropebusis, se chel altri us fasès il bal dal implanton" (Francesco Coletti, Romeo Battistig, Arturo Bosetti, La massarie dal plevan)
    Sin. tignî su la cuarde
14. loc.v. tignî intor:  al si disvistìs, dome al ten sù la cjamese (Laurin Zuan Nardin, Il cop)
15. loc.v. impers., dal cîl, dal timp, no molâ jù ploie:  il timp nol jere masse biel e in coriere a cjalavin ducj di stuart il cîl nulât. "Sperin che al tegni sù!" (Jolanda Mazzon, Di là de rêt)

Components:

• sù av., inter., s.m.inv., adi.inv.
• tignî v.tr., v.intr.

Proverbis:

• il 'suf al ten sù il lus
• la femine e ten sù trê cjantons de cjase, l'om un sôl
• pomâr masse cjamât nol ten sù dutis lis pomis
• ten sù i amîs in public, coreziju in privât
• ten sù i amîs in public, coreziju in segret