Dizionari de Lenghe Furlane

interpretâ  in|ter|pre|tâ  [CO]

1. v.tr. capî e sclarî ce che al vûl dî un test, un discors, un dât, un complès di dâts e v.i.:  par Lutar l'unic criteri di veretât a son lis sacris scrituris e chestis a puedin jessi interpretadis diretementri dal fedêl (Fabian Ros, La invenzion dal stât); lis rilevazions des anagrafis comunâls a son pôc precisis e influençadis di fatôrs di variazion che no son facii di interpretâ (Furio Bednarz, La emigrazion dal Friûl - Vignesie Julie: destinazion Svuizare)
   Sin. sclarî
   
   1. [TS] dir. capî une norme di leç inte sô finalitât reâl par po metile in vore:  un grum di segretaris comunâi a interpretin la leç in maniere restritive e a inderedin l'acès a lis listis eletorâls, ancje par motîfs di ricercje sientifiche (Linda Picco, Ricercje su la condizion sociolenghistiche dal furlan)
2. v.tr. voltâ un messaç di un ciert codiç intun altri, spec. intun lengaç plui cognossût:  la piere di Rosetta e je stade une clâf par interpretâ i jeroglifics; interpretâ ancje il messaç che il vescul Teodôr al veve lassât tai mosaics de aule Sud (Giovanni Battauz, Flavio Cossar, Renato Iacumin, I mosaics de basiliche di Aquilee)
   Sin. decifrâ
   
   1. fâ di interprete, di tradutôr te comunicazion a vôs
      Sin. voltâ , tradusi
3. v.tr. intindi alc intune cierte maniere e dâi un ciert significât:  [un] aument di dome 3.745 ocupâts (+0,8%) che al pâr pluitost improbabil di interpretâ tant che un segnâl di riprese (Fulvio Mattioni, Il futûr dal Friûl: laude ae "no sotan" economy)
   
   1. gjavâ fûr pronostics di fats naturâi:  i sacerdots a interpretavin la vôs di Zeus scoltant il sunsurâ des frints dal so rûl sacri (Adrian Cescje, Viaç aes origjins dal Logos)
4. v.tr. dâ une espression, spec. artistiche, a une maniere subietive di viodi un fat, une dinamiche, une situazion e v.i.:  [Pier Paolo Pasolini] plui di tancj altris al veve savût lei e interpretâ lis contradizions dal nestri popul, imbastint libris, cines o poesiis (Angelo Floramo, Cuintristorie dal Nûfcent 1970-1980); si fâs un brindis a Aquilee romane, un a Triest talian e un al scritôr «dialetâl» che al à interpretade la anime dal popul cjantant il valôr dai alpins (Josef Marchet, Dret e ledrôs)
5. v.tr. vê une part in teatri, intun cine e v.i.:  o soi lât al teatri Giovanni da Udine cun Elio Bartolini, che i vevin regalât doi biliets, a sintî Albertazzi che al interpretave Casanova (Pierluigi Visintin, Friûl e furlans te Histoire de ma vie di Giacomo Casanova)
   Sin. tignî sù , fâ , recitâ
6. v.tr. sunâ une composizion musicâl cirint di rindi il stîl e lis intenzions artistichis dal autôr:  i prins trê tocs a jerin stâts in chê volte ben interpretâts di une vôs liriche (Erika Adami, "Amôrs" in musiche)
   Sin. sunâ
7. v.tr. [TS] mat. frontâ un concet o un probleme matematic fasint riferiment a procediments di un ambit teoric similâr
8. v.tr. [TS] inform. eseguî un program scrit intun lengaç di nivel alt cence la sô traduzion in program ogjet