Dizionari de Lenghe Furlane

sunâ  su|nâ  [FO]

1. v.tr., v.intr. doprâ un strument musicâl:  al mandave so fi Sergjo dal Lunc a Udin a studiâ musiche e imparâ a sunâ la armoniche di un mestri (Ivano Urli, La musiche); Cide Buiat al veve di lâ a sunâ il violin a doi nuviçs a Madone di Mont (Alan Brusini, Amîs come prime); jo e Ursus o decidìn di passâ il dopomisdì tal Parkbühne, a viodi sunâ altris complès (Checo Tam, La maree nere); lis maraveis di cheste gnot / cjantìn, sunìn di sivilot (Ermes di Colorêt, II, 120); no mi zove sunâ danze / ne sunà di clarinet (Popolâr - Angelo Arboit, No mi zove sunà danze - Villotte friulane)
   
   1. doprâ un dispositîf che al prodûs un sun:  il puestin […] al jere za pront par sunâ il campanel (Carlo Sgorlon, Ombris tal infinît); "Àn sunât… va a vierzi e se al è cualchi forest domande ce che al vûl prin di fâlu jentrâ" (Pieri Somede dai Marcs, Cjase di fitâ)
2. v.tr. eseguî doprant struments musicâi:  ma planc: no ai finît; cordi la pive, / che da nûf vuei sunâ la gjeromete (Ermes di Colorêt, I, 252); ma si sint a sberlâ: "Ce biel costrut! / Che fasi sunâ valz, / Se ûl che si vadi ben, cjâr siôr Çorut (Pieri Çorut, Il mio tratament)
   
   1. fâ musiche cuntun ciert stîl:  la musiche e jere otime: un complès di Berlin al sunave alc a miezis tra il punk dal '77 e il dark/kabarett cun influencis di Kurt Weil (Checo Tam, Never Stop Discoteque II)
3. v.tr. dâ un segnâl cuntun sun:  [a pene scjampâts i rapinadôrs] al diretôr no i reste altri che di sunâ l'alarme (Fabian Ros, La rambe); il podestât al mandà un gjendarme a fâ il sorelûc e al fasè sunâ consei (Pieri Menis, Disore e disot)
   
   1. v.intr. di sun o segnâl acustic, tacâ, slargjâsi, jessi sintût:  no veve sunât la Ave Marie ancjemò no, e voaltris o savês che fintremai che no sune une cjampane a buinore lis animis dai muarts a zirin te gnot (Pieri Menis, Gno nono); a è sunât il bot. A è ora (Pier Paolo Pasolini, I Turcs tal Friûl); il contat al fâs saltâ l'eletric, al sune l'alarme (Ivano Urli, Storie di Min)
   2. di lûc, edifici, ogjet e v.i., jessi la origjin o l'ambient dulà che a son suns, sunsûrs o musiche:  il cjampanili al sunave lis siet (Carlo Sgorlon, Prime di sere); une volte la cjase e sunave di cjantis e di voris (Pieri Piçul, Vieri e gnûf)
4. v.intr. dâ fûr suns:  a sintirin a sunâ lis ruedis tai claps dal curtîl, che al rivave il cjaruç (Dino Virgili, Il cjaruç dai Bas)
5. v.intr. di dispositîfs acustics, produsi un sun:  un cuart di ore plui tart il campanel al tornave a sunâ (Roberto Ongaro, Il muc)
6. v.intr. (fig.) di une espression, peraule o frase, produsi une cierte sensazion:  peraulis che a sunin secjis come saetis (Riedo Pup, Balon: crodi, ubidî e paiâ); "Che e torni… che e torni…" le prearin in ducj, ma dut al sunave vueit e sfuarçât, aromai (Maria Forte, Cjase di Dalban)
7. v.intr. dâ une impression te memorie di cui che al sint o che al viôt, in câs ancje cun cualchi predicatîf:  e osservave lis fotos e lis scritis su lis lapidis, cualchi non i sunave familiâr, che lu veve sintût a ripeti di sô mari (Jolanda Mazzon, Cungjò Friûl); "Carlo Ferretti? Ma che al permeti un sclariment. Il non nol mi sune gnûf" (Costantino Smaniotto, Co l'amôr al cimie)
8. v.intr. plasê, jessi volût:  al jere logjic di no puartâ plui a masanâ là vie di Tite Melchior. "Par no riscjâ di intopâsi in cierts discors che no mi sunin masse" (Franco Marchetta, Madalene)
   Sin. plasê¹ , lâ , pocâ , smecâ

Polirematichis e espressions idiomatichis

• sunâ a muart loc.v.
• sunâlis v.pron.
• sunâlis e cjantâlis loc.v.

Proverbis:

• a fûc là che al fume, a messe là che al sune
• a messe là che al sune, a scjaldâsi là che al fume, a mangjâ là che al è pan e scjampâ là che si dan
• a vuelin dôs cjampanis par sunâ parie
• cuant che al sune il campanel, lis cjampanis a àn sunât
• cuant che lis cjampanis piçulis a sunin, lis grandis a àn sunât
• cuant che si sune daspò tampiestât, al è tant che no vê sunât
• cuntune cjampane no si sune parie
• la avemarie sunade, la fantate sierade
• la fiere terçane il zovin lu risane e al vieli i fâs sunâ la cjampane
• la tos paiane o che e risane o che e sune la cjampane
• nol zove sunâ daspò stade la tampieste
• nol zove sunâ daspò tampiestât
• par scjampâ de miserie si à di lâ là che a son cjamins che a fumin e no cjampanii che a sunin
• ploie che e sune a mene bon timp
• salamandrie becant, agonie sunant
• si scuen balâ daûr che a sunin