Dizionari de Lenghe Furlane

recitâ  re|ci|tâ  [AF]

1. v.tr. dî a vôs alte e a memorie robis sintudis, letis o studiadis:  al recitave a puntin la lezion che Mariane i veve ficjade iniment fin de sere prime (Gianni Gregoricchio, Îr e doman)
   Sin. dî , dî sù
   
   1. dî une preiere, ancje di sotvôs o dentri vie:  mi sintivi di recitâ un recuie par ognidune di lôr (Carlo Sgorlon, Il dolfin)
2. v.tr. (ancje ass.) tignî sù une part intune opare teatrâl o cinematografiche:  Pepe al recitave, no dome tes solitis parts comichis, ma ancje in parts seriis (Bepi Agostinis, Storie e cronistorie dal teatri in Friûl)
   
   1. (ass.) fâ la ativitât di atôr
   2. v.tr. meti in sene:  [la comedie] no si po recitâle sence il consens dal autôr (Arturo Feruglio, Un grop sul stomi)
      Sin. meti in sene , rapresentâ
3. v.tr. (ancje spres., ancje ass.) tignî un compuartament sfuarçât, di simulazion, diferent di ce che si pense e di ce che si sint:  imbroiâsi un cul altri, recitant une comedie che nissun crôt e che ti coste masse (Antoni Beline, La globalizazion de sensibilitât)
   Sin. fâ bausiis , fâ cine , fâ circul , fâ la comedie , fenzi , fâ fente
4. v.tr. di un test, vê un ciert contignût che al ven citât:  «Il furlan - al recite l'articul 2 - al è une des lenghis de comunitât regjonâl. La Regjon Friûl-Vignesie Julie e considere la tutele de lenghe e de culture furlanis une cuistion centrâl pal svilup de autonomie speciâl» (William Cisilino, Leç, minorancis e comuns)
   Sin. afermâ , declarâ , dî