Dizionari de Lenghe Furlane

dî sù    [CO]

1. loc.v. dî cuntune cierte enfasi:  par solit il cavalîr si limitave a meti dentri il cjâf tal tinel e a dî sù, sence spietâ rispueste: "Dut ben, sì? Brâfs, lait indenant cussì" (Gianni Gregoricchio, Pollione Magrini)
   Sin. dî fûr
2. loc.v. dî plui robis une daûr di chê altre:  une dì i domandà ce che i varès plasût fâ. Il frut, cu la facilitât de sô etât, i veve dit sù trê, cuatri mistîrs che i plasevin (Roberto Ongaro, Il muc); e mi 'nd àn ditis sù tantis e tantis / che no pues recuardâmes dutis cuantis (Pieri Çorut, Il Strolic mezan pal 1862)
3. loc.v. tornâ a dî a vôs alte e a memorie robis sintudis, letis o studiadis:  po dopo si jentre inte sale, si scolte il discors dal president de associazion, la poesie che une frute e dîs sù a memorie (Cristina Noacco, Faliscjis); cui deduts dal frutin si po zuiâ disint sù chestis tiriteris (Zuan Nazzi Matalon, Ottorino Burelli, Sacheburache)
   Sin. dî
   
   1. dî lis preieris, ancje di sotvôs o par se:  cualsisei che al fos il pecjât nissun rivave a scjampâ i siei trê Pater-Ave-Gloria di dî sù un daûr di chel altri come pinitince (Enrico Martina, Ricuarts e inlusions)
4. loc.v. dî alc cuintri di cdn. o di alc, ancje cun malis peraulis
   Sin. dî jù

Components:

• dî v.tr., v.intr., s.m.sing.
• sù av., inter., s.m.inv., adi.inv.