sù par
[FO]
-
loc.prep.
par introdusi un complement di lûc, soredut cun moviment che al travierse di jù insù o di meridion a setentrion:
lui come instupidît si invià ben planc sù pes scjalis e cuant che al fo disore, cjamare, jê i le dongje (Pieri Menis, Sul agâr);
si podeve lâ sù te specule, sù pe torate, là che al è ancjemò l'orloi (Giovanni Gortani, La teme - Une gnot intun cjastiel)
-
ancje par introdusi un complement di lûc in riferiment a un puest o a une localitât che e je adalt o a setentrion, in gjenar cuntun sens di aprossimazion:
"I cjars a rivin plui tart: dopomisdì o vie pe gnot. Ju ai lassâts sù par Glemone…" (Dino Virgili, La aghe da pît la cleve);
i bai che i vevin plasût ju veve cjatâts tai paîs, capitât par câs sù par Buie o Vendoi, un toglât vueit che inmò al nasave di fen, cun armoniche e liron (Alan Brusini, Come tai romançs)
-
loc.prep.
par introdusi un complement di lûc, ancje cence moviment, in riferiment a alc che al è adalt o verticâl:
une schirie di plats piturâts a man a jerin picjâts sù pai mûrs e o vevi vût timp di lei lis frasis che a jerin scritis parsore (Raffaele Serafini, B123ST)
Cfr. su1
, in
, ta
-
loc.prep.
par segnâ un supuart, soredut par alc che al è scrit:
nissun si varès mai plui visât di lôr, fûr che sù pes lapidis o tal cûr des maris (Gianni Gregoricchio, Îr e doman);
cjasis vieris butadis jù, gnovis fatis sù come chês che si viôt sù pai gjornâi (Jolanda Mazzon, Fûr di timp)
Sin. in
, ta
, su1
-
loc.prep.
in ciertis varietâts ancje par segnâ une direzion, une destinazion e v.i. che si podaressin pandi cu la preposizion "su" o cu la locuzion "su di":
lui non si varès mai riscjât di alsâ i voi sù par jê in considerassion dal stât miserabil che si cjatava (Ranieri Mario Cossâr, Nita e Nesto)
Sin. su1
, su di
-
loc.prep.
in ciertis varietâts, ancje par introdusi il complement di argoment:
il plait sù pal matrimoni, sù par Nart, sù pal stât di Line, sù pal avignî che le spietave, sù pe convenience di cjoli Nart e sù pe sigurece che chel matrimoni ur varès dât a dutis dôs, al durà a lunc, fin miezegnot passade (Roberto Ongaro, Cretevierte)
Sin. su1
, in fat di
, in cont di
, sul cont di
Components:
-
sù
av., inter., s.m.inv., adi.inv.
