Dizionari de Lenghe Furlane

su¹  su  [FO]

1. prep. in posizion plui adalt rispiet a alc, in gjenar cun contat:  difûr al neveave a grancj flocs blancs e la nêf si ingrumave sui cuvierts (Pieri Menis, Nadâl ancje par Gjelmin); lis cjartis di zûc a restarin sparniçadis e fermis su la taule (Maria Forte, Cjase di Dalban); si steve cussì benon noaltris li tal cjaldut sentâts sun chê bancjone tal puarte fûr di nape (Dolfo Zorzut, No je plui vive); si inviave […] la «Fieste dai roncs» suntun cuel dai plui biei di Biliris e duncje dai miôrs dal Friûl (Meni Ucel, La "Fieste dai Roncs")
   Sin. daprûf di , parsore , sore , su di , sù par , vie , daprûf , dapûr , dapûr di
   Var. sun²
   
   1. te bande difûr di alc, ancje se no je adalt, o ancje in maniere gjeneriche par complements di lûc:  si jere inacuart di une magle rosse su la piel di Barbure (Agnul di Spere, Spietant); une cjasute di clap di pît sù cun trê scjalins di piere, il fogolâr e une Madone piturade sul mûr (Alan Brusini, Come tai romançs)
      Sin. parsore , sore , in , ta
   2. in vicinance di, in direzion di, a contat cun alc che al è dongje:  al rivà fin te perifarie, a Est rispiet al parc sul flum Ilm (Checo Tam, Il palaç); pecjât che al stave tant pôc in chê cjase grande su la place dal borc (Maria Forte, Cjase di Dalban)
      Sin. dilunc , dilunc vie , dilunc vie di
   3. (fig.) in rapuart di superioritât rispiet a:  la date dai 3 di Avrîl […], ven a stâi de concession imperiâl al patriarcje di Aquilee dal titul di duche cu la jurisdizion ducâl sul Friûl (Adrian Cescje, Memoriis di politiche linguistiche)
2. prep. par pandi une determinazion di moviment viers di un lûc, cun riferiment a une part che e je adalt o ancje in maniere gjeneriche:  a cutuardis agns, cuant che al scuvierzeve il gust di lâ in mont, al leve sù sul Mangart cence nissune fadie (Cristina Noacco, Faliscjis); il frêt al rive di sere co al ven jù de mont e al plombe sul paîs (Alan Brusini, Gian Paolo Linda, I forescj); al rivà su la puarte e al batè, malsigûr (Meni Ucel, Rosaris)
   Sin. intor , parsore , sore
   
   1. tun veicul e v.i.:  "Chest tren al va par Zurì, par lâ a Olten lui al à di montâ su chel di Basilee […]" (Agnul di Spere, In viaç di domenie)
      Sin. intor , parsore , sore
   2. ancje cun sens di agressivitât:  chei doi si butarin su di lui a sflanconadis, cun fuarce rabiose, e la pistole e finî par tiere (Maria Forte, Cjase di Dalban)
3. prep. par introdusi un argoment:  o ai scugnût domandâ perdon di vê scrit cualchi rie sui predis (Riedo Pup, Rispueste: cjalâ e tasê); o soi lât in Americhe Latine; o soi tornât e o ai scomençât a publicâ i prins articui sul gno viaç (Oscar Puntel, Toni Capuozzo: «Ognidun al bale cun sô agne»)
   Sin. a rivuart di , in rivuart a , sul cont di
4. prep. par pandi un timp, une cuantitât, une misure e v.i., cun idee di aprossimazion:  e jere une zornade sul finî dal Invier, cul cîl celestin e il soreglut che al tacave a fâsi sinti (Roberto Ongaro, Il muc); al jere compagnât di sô fie, une zovine ben metude sui vincj agns (Pieri Somede dai Marcs, Interès malandret); un argagn dut di fier, ancje lis ruedis che al varà pesât sul cuintâl (Alan Brusini, Amîs come prime)
5. prep. cun valôr distributîf:  une pussibilitât su cent milions! Ma al è sucedût (Gianni Gregoricchio, Trê feminis); Florean al comande nome mieze Basse, ven a stâi un afâr su doi, une pirule su dôs e vie indenant (Stiefin Morat, Donald dal Tiliment)
6. prep. par segnâ ripetizion, bondance:  un che al veve scrit libris su libris e che al faseve di consulent al mont politic e finanziari (Fabian Ros, L'om che al pierdeve pinsîrs pe strade)
7. prep. par segnâ fadie, sfuarç, dam e v.i.:  lu ai sintût jo a zigâ inte sale che e jere ore di finîle, che a vevin mangjât avonde sui puars (Alviero Negro, Int di masnade)
8. prep. par introdusi un obiet logjic:  Geneviève e tornave a spandi dulintor chel morbin e chê atrative che e veve tant efiet sui fantats (Carlo Sgorlon, Il dolfin)
9. prep. par introdusi ancje altris complements, par es. di mût, cause e v.i.:  a nal veva ne che al veva mai vût mudi fati su la sô misura (Novella Cantarutti, Torero); e li sun doi pîts, tic e tac, o vin sierât l'afâr (Riedo Pup, Jo, evasôr fiscâl); o jeri jentrât te direzion dal Moviment Friûl tal Sorinvier dal 1970, par cooptazion, su propueste di pre Checo Placerean (Adrian Cescje, Memoriis di politiche linguistiche)
10. prep. denant di un numar denominadôr di une frazion:  trê su nûf al è come un su trê
11. prep. [TS] logj., mat. tes funzions, par indicâ il cjamp di definizion de aplicazion:  1/x e je definide su dut il cjamp reâl gjavât 0