Dizionari de Lenghe Furlane

sun²  sun  [FO]

1. prep. (var.) viôt su , doprât in gjenar in situazions li che nol è previodût o ametût l'articul definît, in alternance libare cun "su di"
   
   1. devant di pronons personâi:  "Se o savessis, ce cjampanis che a sunin sun jê!" (Anute Fabris, A passe la scalmane); la femina a si inzenoglà par cjera, a lu cjapà sù, a lu ingropà a strent sun se (Novella Cantarutti, Al era un anzal)
   2. devant di dimostratîfs:  fâ un fregul di osservazion sun chel tant di latin che al è passât te lenghe furlane di cumò (Josef Marchet, Cuintristorie dal Friûl fin sot la Italie); alc di gnûf al è stât dit sun chest cont (Francesc Placerean, Cuant che tal matrimoni al è l'amôr cristian, li al è verementri Diu)
   3. devant di indefinîts:  baste cjalâ i muarts che a àn lassât sun ducj i fronts dal mont (Riedo Pup, I furlans e la patrie); i voi di ducj i doi a jerin fers, sun alc che nol jere li ma che a sintivin presint (Dino Virgili, Ombrenis sul liston)
   4. devant di interogatîfs:  bisugne intindisi ben sun ce che si vûl dî (Riedo Pup, I furlans e lis feriis)
   5. devant di numerâi:  sun dîs mil francs di sigurât a son sù e jù trente francs ad an di paiâ (Dino Virgili, La aghe da pît la cleve); una rêt impirada sun trê pâi (Federigo Comelli, Il me paîs)
   6. devant di nons di persone, in alternance libare ancje cun "su":  la rigjina da aganis a jeva via li mans che veva poiât sun Catinuta (Ugo Pellis, Catinuta); cul cerneli inriçât a pensâ e i voi fis sun Guri (Dino Virgili, La aghe da pît la cleve)
   7. devant di altris nons, in espressions li che nol è previodût l'articul, in alternance libare ancje cun "su":  tu ti ingrampis pa scjaipula strent, e tu crodis di stâ sun ramutis che van in amôr (Ugo Pellis, Al rusignûl svuarbât); colps sun colps di picon, di pale, di pic (Dino Virgili, La aghe da pît la cleve)