sù e jù
[AF]
-
loc.av.
in alt e in bas, soredut cuntun moviment che al torne a fâsi plui voltis:
po si sentave, e jù une inglanzide di vin, che il grop dal cuel i balave sù e jù, come un saltel di puarte (Dino Virgili, La aghe da pît la cleve);
al sbassà il plat de lampade di un mieç metri. Al jere un di chei plats cu la cidule e il piruç di crep, di tirâ sù e jù (Carlo Sgorlon, Prime di sere)
-
loc.s.m.inv.
teren, percors e v.i. cun rilêfs e bassuris:
no je une cueline sole ma tantis, o pûr e je une, ma dute un sù e jù di podê semeâ tantis (Meni Ucel, La "Fieste dai Roncs")
-
loc.av.
cun alternance di cundizions, valôrs, risultâts e v.i.:
se o cjalìn la storie dal pinsîr autonomistic intal ultin secul, o viodìn che la evoluzion de sô parabule e va sù e jù daûr des fasis de nestre storie (Walter Tomada, Un viaç aes lidrîs de specialitât)
-
loc.s.m.inv.
alternance ancje ripetude:
la medie di jentradis e varà tai agns dai sù e jù ancje avonde marcâts (Max Mauro, Un Friûl difarent: i 90 mhz di Onde Furlane)
-
loc.av.
di une bande a chê altre, soredut plui voltis:
une lampide impiade devant l'altâr di sant Antoni e à fat lusôr dute la gnot a chei doi fraris che levin sù e jù pe glesie, fasint la vuardie a dute chê marmaie di devots indurmidîts (Giovanni Gortani, La cjargnele dal avout);
a jentre in cjamare, e met il ferâl sul scabel, si gjave il façoleton, e zire sù e jù pe cjamare (Pieri Somede dai Marcs, Al fresc)
-
loc.av.
in maniere aprossimative:
al è pôc [di paiâ di sigurazion], ce crodêso: sun dîs mil francs di sigurât a son sù e jù trente francs ad an di paiâ, e a ratis (Dino Virgili, La aghe da pît la cleve);
"Trop saraial [di multe], par plasê?" "Dôs voltis il bol: vot mil francs, sù e jù…" (Riedo Pup, Jo, evasôr fiscâl)
Sin. pressapôc
, un pressapôc
, circje
, plui o mancul
, ce plui ce mancul
, sù par jù
Cfr. va e no va
, tor1
, su
, un1
Components:
-
jù
av., adi.inv.
-
sù
av., inter., s.m.inv., adi.inv.