parâ sù
[CO]
-
loc.v.
(ancje fig.)
fâ che alc al ledi o al stedi sù, adalt o a Nord o indentri:
il sudôr i spissulave dal cerneli; al parà sù i cjavei cu la man rivoltade (Bepo Viulin, Zuan Prussian e Toni Pagjel);
e cjapà sù une siringje di une scjatule di açâl poiade sul jet, e parà sù la gusiele te valvule di gome che e unive chê altre, za te vene, a la gomute dal flebo, e e parà dentri planc planchin il sîr (Amedeo Giacomini, Tal ospedâl);
al puartà dongja i lens e al parà sù un fogaron di grops di faâr alt che li flami a rivavin a lenzi la cjampana da la napa (Novella Cantarutti, Barba Fodo e i resonamints)
Sin. butâ sù
, mandâ sù
, sburtâ sù
-
loc.v.
dâ dongje e racuei o gjavâ:
o ai scugnût raspâ la panarie e parâ sù par tiare (Catarine Percude, La fuiace de Madone)
Sin. tirâ sù
, cjapâ sù
-
loc.v.
riferît aes bestiis dumiestiis, fâlis jentrâ tal pulinâr, tal cjôt, te stale:
parâ sù lis gjalinis (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
-
loc.v.
(ancje ass.)
dal timp o dal aiar, puartâ incà nûi:
e veve cjapât a pet il so ort, cuant che il timp al parave sù jê e stave cul cûr in man par pôre che e vignìs la tampieste a fiscâi dut (Jolanda Mazzon, Cungjò Friûl)
Sin. butâ sù
-
loc.v.
fâ deventâ plui grant di dimension, cuantitât, intensitât e v.i.:
"A Vignesie no i impuarte nuie di nô furlans…, se nol è di disboscâ o di parânus sù lis tassis…" (Alviero Negro, Strumîrs e Çambarlans)
Sin. aumentâ
, cressi
, fâ cressi
, fâ lâ sù
, incressi
, rionzi
, sglonfâ
, slargjâ
, tirâ sù
-
loc.v.
(coloc., ancje ass.)
penetrâ te ativitât sessuâl o in gjenerâl fâ ses:
a cheste ore i saressin za a cjase, a fâ di cene o a parâ sù cu la morose (Renzo Brollo, Metât mecanic);
Pieri al jere cussì. Un purcit votât a saceâ une fam di purcit. Parâ sù, mangjâ, fâsi viodi, preâ. E dentri di chest, la aviditât, il podê, la invidie, il svindic (Igor Londero, Delit in vie del Lavoro)
Components:
-
parâ
v.tr.
-
sù
av., inter., s.m.inv., adi.inv.
