Dizionari de Lenghe Furlane

slargjâ  slar|gjâ  [FO]

1. v.tr. (ancje fig.) fâ deventâ plui larc, plui grant:  la aghe e vignive jù a ûs slac, e lant a impoçâsi tal riul, a 'nt slargjà tant lis spuindis, di fâlu deventâ un rivuat sfolmenât (Josef Cjargnel, La farine dal diaul); o slargjarìn il scritori che zaromai cun tantis cjartis che a coventin al è masse stret e o alçarìn di un plan la cjase (Pieri Somede dai Marcs, Il segno); tal biel timp, cumò come di frut, al slargjave i siei zîrs in biciclete e, une dì che […] al jere rivât al puint di Braulins e, di li, biel planc, al lât di Cjavaç (Alan Brusini, Par stradis lungjis)
   Sin. dilatâ , estindi , fâ grant , ingrandî , slavrâ , slumbriâ
   
   1. vierzi alc che al jere pleât o fat sù o dât dongje:  al slargjave il «Gazetin» e si meteve a lei (Pieri Menis, A scuele); Rosute e slargjave il mantîl di fieste su la taule, e parsore e meteve in rie lis tacis (Dino Virgili, La aghe da pît la cleve); a na possin pi vignî a lavâ la roba e slargjâ i lensôi su la grava blancja e puartâju a cjasa nets, dut un nasabon (Novella Cantarutti, Malincunia dal lagu)
   2. meti a larc, fâ stâ suntune superficie plui largje:  a tornavin a cjase sfladassant cuntune sachete di nolis che a slargjavin su la taule (Pieri Menis, I siops); Jacum al cjarià al puest di dôs cossis un pâr di sacs di miluçuts che po, une volte a cjase, ju slargjave su lis grisiolis (Angelo Covazzi, I miluçs)
2. v.tr. (fig.) riferît a un orghin di percezion o a une percezion, dâi un cjamp viert:  là sù o podevi slargjâ la olmade sul mont intîr (Gianni Gregoricchio, Trê feminis); il talian al è bon ancje di strenzi la cinturie, baste che al puedi slargjâ la orele ai sermons sflandorôs e plens di fusetis e di mitologjiis (Josef Marchet, Si tornial a cjariâ la suste?)
3. v.tr. fâ someâ plui larc, dâ une impression di largjece:  il borc, cuiet cuiet al veve dome chê lûs slassade che e slargjave il mont e che e tacave ombris claris parfin aes cjasis des andronis (Maria Forte, Cjase di Dalban)
4. v.tr. fâ deventâ plui difondût, plui profont, plui partecipât e v.i.:  promovi e slargjâ l'ûs de lenghe furlane (Donato Toffoli, Relazion dal Grup di lavôr "Planificazion linguistiche"); Apol cu lis sôs frecis al podeve fâ tacâ e slargjâ lis epidemiis, ma ancje distudâlis e al jere pari di Asclepi, diu de medisine (Sandri Carrozzo, Jenfri vîfs e muarts); mi sintivi come scuintiât, ancje par vie di chei di là, che a vevin slargjade la vôs che in curt a varessin comprât ancje il gno fogolâr (Maria Forte, I arcs)
   Sin. distindi , estindi , ingrandî , vierzi
   
   1. fâ deventâ plui svariât:  al covente slargjâ lis ativitâts produtivis de cooperative (Max Mauro, Un Friûl difarent: i 90 mhz di Onde Furlane)
   2. meti in vore, aplicâ intun setôr gnûf:  la intuizion di Darwin e ste tal slargjâ chest model de societât umane ai reams vegjetâl e animâl (Angelo Vianello, La evoluzion su la tiere. Une storie di competizion e cooperazion)
5. v.tr. [TS] sport (ancje ass.) puartâ il zûc suntune aree plui grande, massime suntune ale
   Sin. vierzi
6. v.intr. fâ un volt cuntune traietorie largje o plui largje:  al à slargjât masse e al è finît te corsie contrarie
   Sin. slargjâsi , vierzisi , vierzi
7. v.intr. ancje impers., dal timp o dal cîl, deventà biel, seren, cun mancul nûi:  jê e cjalave difûr, che al veve slargjât: "Al gambie il timp." "Di come che e vignive jù, no si varès dite" (Jolanda Mazzon, Fûr di timp)
   Sin. slargjâsi , vierzisi

Polirematichis e espressions idiomatichis

• slargjâ i braçs loc.v.
• slargjâ i cordons loc.v.
• slargjâ i cordons de borse loc.v.
• slargjâ il cûr loc.v.

Proverbis:

• cuant che a businin lis moscjis di Zenâr, slargje il braç piorâr; cuant che a businin lis moscjis di Fevrâr, strenç il braç piorâr