Dizionari de Lenghe Furlane

vierzisi  /-è-/  vier|zi|si  [FO]

1. v.pron.tr. viôt vierzi
   Var. avierzisi , davierzisi
2. v.pron.intr. cjapâ une posizion che e permet la comunicazion, il passaç, la viste e v.i.:  fin cuant che une puarte si viarç e o colìn dentri e o lassìn fûr, par un moment, il businâ dai dius e il frêt de gnot (Stiefin Morat, Donald dal Tiliment); a di un pont il barcon de cjamare finalmentri al piule e si vierç (Meni Ucel, Serenadis)
   Cfr. spalancâsi
3. v.pron.intr. di struture che e permet il passaç, la viste o che e à forme ingjavade, jessi orientade di une cierte bande:  e jere une biele stanzie, grande e lusorose, cui barcons che si vierzevin suntun piçul parc (Franca Mainardis, Aiar di cjase); une androne sepulide tra mûrs vieris sporcs di frusin e di jerbe si vierç su la plaçute dal borc (Dino Virgili, La androne)
4. v.pron.intr. di elements o robis fatis di plui elements, ancje di parts dal cuarp o sim., distirâsi, cjapâ une posizion li che i elements a son plui lontans tra di lôr:  o vevi viodût il bec dal falcuç maglât di sanc, il sierâsi e il vierzisi gnervôs des sgrifis, seneosis di sbridinâ (Carlo Sgorlon, Il dolfin); sù in alt, nui neris a barcjons si corevin daûr, si scjavalgjavin, si ingrumavin, si vierzevin e, daûr di lôr, il celest al sparive come glotût (Pieri Somede dai Marcs, La bissebove); pardut che a poin i lôr piduts o li che lis lôr cotulis a cjarecin la jerbe si vierzin lis rosis: cjampanutis, ciclamins, cidivocs, zîs (Sandri Di Suald, Salvans!)
   Sin. slargjâsi
5. v.pron.intr. rompisi, vê une creture, une sbregadure e v.i.:  "E une mont che si sclape. La gnot a crepe une piere, la piere si viarç…" (Stiefin Morat, Kebar krossè); a impirâ i braçs di sio pari muart ta chê gjachituta strenta che a si vierzeva par duti li cumissuri (Novella Cantarutti, La not di Gjoriu); di bon al podeva dome jessi che, se il taramot al tornava, a si vierzès la cjera da scomparî ducj, jo cu la mê zent (Novella Cantarutti, Fat di voladia)
   
   1. di creture, sbregadure, buse e v.i., formâsi, jessi:  [pal bombardament] inte cjase dai Kuchental a balin e a sdrondenin i mûrs. Si vierç cualchi sclap (Ivano Urli, Storie di Vera)
6. v.pron.intr. deventâ plui larc o vê un aspiet plui larc e viert:  la planure, là jù insom, si vierzeve in tacjis che, di claris, a covis, e deventavin neris (Alan Brusini, Amîs come prime); i bûs a tignivin dûr e intor dal music al fumave il flât. I lens a slargjavin i forcjàs cuintri il nulât, pôi e vencjârs a sgriavin il cîl. […] Po si vierzè une largjure e, là jù a dret, il paîs (Maria Forte, L'avôt)
   Sin. ingrandîsi , serenâsi , slargjâsi
   
   1. (fig.) soredut di alc che al à estension, jessi devant de viste di cdn.:  la strade […] dopo rivade parsore e leve vie par un biel toc propit sù pe gobe, lassant libar cui che al passave di cjalâ il biel panorame che si vierzeve dulintor (Pieri Menis, Lis çuculis dal Gjigjo)
7. v.pron.intr. scomençâ a podê jessi doprât, traviersât, gjoldût, patît e v.i.:  chestis specificitâts […] si palesarin in chei agns parcè che propit in chê volte si vierzerin spazis dulà pandi ideis, aspirazions e dibisugnis (Marc Stolf, La Cjarte di Strasburc dal 1981. Une Risoluzion "storiche" e ancjemò di atualitât); denant di te si vierç une strade vueide… cun dute la sô lungje malinconie (Maria Forte, Cjase di Dalban); tu viodarâs Rose che une vite gnove si vierzarès ancje par te, une vite serene (Pieri Somede dai Marcs, Vilie di Nadâl (teatri))
8. v.pron.intr. deventâ plui facil di viodi, di capî:  e jere une veretât che si vierzeve e si sclarive, cumò, tant che un miracul (Dino Virgili, La aghe da pît la cleve)
   Sin. mostrâsi , pandisi
9. v.pron.intr. jessi plui seren, plui biel:  la sô muse si vierzeve tun ridi maraveôs (Alan Brusini, Gian Paolo Linda, I forescj)
   Sin. serenâsi
10. v.pron.intr. deventâ disponil, pront al confront, ae colaborazion e v.i.:  o vin di cjapâ cussience che nô o vin bisugne di vierzisi [cul cumierç] di dutis lis bandis, no dome di une (Francesc Placerean, La nestre storie)
11. v.pron.intr. jentrâ in confidence, o ancje tal specific fâ une confidence, une confession:  sul prin, cun lui, o ai stentât a vierzimi (Gianni Gregoricchio, Trê feminis); e veve cirût di fâ alc par judâle, ma la Ulive no si vierzeve (Maria Forte, La tiere di Lansing); cumò il Cosac al scomençave a vierzisi un fregul, a dâ confidence e il polizai al profità e al spulzinâ fûr plui che al podè (Roberto Ongaro, Cretevierte)
    Sin. molâsi , smolâsi
    Cfr. disbotonâsi
12. v.pron.intr. jessi sul principi, vê un inizi:  e stave par vierzisi une gnove stagjon, une gnove ete plene di sorpresis e di novitâts (Franca Mainardis, Il sium di Lissandri); la cunvigne […] si vierzarà aes 10 di matine (Erika Adami, Cormons capitâl furlane)
    Sin. scomençâ , tacâ

Polirematichis e espressions idiomatichis

• vierzisi di ridi loc.v.

Proverbis:

• a bati e a tornâ a bati, si vierç la puarte