Dizionari de Lenghe Furlane

slargjâsi  slar|gjâ|si  [FO]

1. v.pron.intr. deventâ plui larc:  a si jodeva la Miduna slargjâsi e deventâ fonda sot il pic di Grimau (Novella Cantarutti, Il Bolp); cori ad ôr da la aghe, discolç, cjapâ sù un clap e tirâlu dentri par viodi chei cerclis che si slargjin slusignant (Dino Virgili, Il cîl sot aghe); Temul e Biso a cjaminavin come simpri, ma il cercli dai pôi al pareve che si slargjàs di plui (Maria Forte, L'avôt)
   Sin. vierzisi
2. v.pron.intr. vê une cierte estension:  denant vie, fin dulà che al rivave il voli, si slargjave il parc (Amedeo Giacomini, Tal ospedâl); ve ca, o soi rivade. Plaza de Mayo si slargje come simpri pegre e supierbeose denant di nô (Antescûr, Ninin)
   
   1. stâ larc intun ciert spazi, cjapâ un ciert puest:  a vivin sul cei de citât. E je citât ancjemò, ma no dome ciment, e lis cjasis si slargjin ca e là tun ort, un zardin, un broili di pomârs (Ivano Urli, Storie di Vera); a Messe, ciertis feminis, come se si fossin passade la peraule, si slargjavin tai pôcs bancs de glesie par no lassâi puest (Maria Forte, La aghe dal Ariul)
3. v.pron.intr. (fig.) di une percezion o di un orghin di percezion, spec. dal cjalâ e dai voi, vê la pussibilitât di indreçâsi a larc:  sot vie il voli si slargje content su la plane di Pordenon (Michele Nadalini, La basiliche di arint); i siei pîts a son ben pontâts su la sô tiere furlane, ma il so voli si slargje par tant larc che al è l'orizont (Antoni Beline, Josef Marchet: un furlan difarent)
   Cfr. slungjâsi
4. v.pron.intr. deventâ plui grant, profont, partecipât, condividût, difondût e v.i.:  il progrès tecnologjic (come la invenzion de television) al à fat in mût che il model culturâl american si slargjàs dapardut (Franc Fari, Eric Pascul, Autonomie e democrazie, i numars de socializazion umane)
   Sin. cjapâ pît , imponisi , difondisi , spampanâsi
   
   1. deventâ plui svariât, plui complet e v.i.:  l'aspiet culturâl e linguistic al è dome il colant di cheste union, che e à di slargjâsi e di cjapâ dentri ducj i aspiets plui impuartants e vitâi des comunitâts stessis (Antoni Beline, Di ca e di là de aghe)
5. v.pron.intr. fâ o vê un moviment che al puarte lontan, a larc:  lis vongulis dal sun si slargjavin su la valade deserte (Dino Virgili, Cuel Valâr); aromai e montave sù la sere, e in cîl si slargjavin a planc nûi grîs e lizêrs (Carlo Sgorlon, Prime di sere)
6. v.pron.intr. lâ de bande esterne:  svoltant no si à di slargjâsi masse
   Sin. vierzisi , slargjâ
   
   1. [TS] sport lâ de bande laterâl dal cjamp:  Felipe Anderson si slargje a man çampe e i passse la bale a Lulic che al fâs partî un tîr-cross che al devente un assist par Immobile, che i met la çate e le bute tal sac (Marc Stolf, Udinese - Lazio 1-2)
7. v.pron.intr. ancje impers., dal cîl o dal timp, deventâ seren:  la ploie e doventà mancul fisse, si slargjà e si viodè soreli (Jolanda Mazzon, Fûr di timp)
   Sin. slargjâ , vierzisi
8. v.pron.intr. (fig.) cjacarâ o scrivi tant:  no intint slargjâmi su argoments di specialiscj, ma mi limiti a fâ cualchi considerazion (Marino Plazzotta, Il turisim in Cjargne al è di passaç)
   Sin. slungjâsi , slungjâle , lâ in lunc , fâle lungje , slumbriâsi , cincuantâ , cincuantâle
9. v.pron.intr. (coloc., fig.) cjapâ sù masse confidence o masse braùre:  no stâ a slargjâti tant, sta tal to
10. v.pron.tr. (ancje fig.) slargjâ alc di se stes, par se stes, alc che si à intor, alc in maniere reciproche e v.i.:  [sù tal decim plan] almancul tu rivis a stâ un tic parsore al rodolâsi dal aiar impolverât. E a slargjâti i voi. Ogni dì mi plaseve di slargjâmiju cjalant inlà (Stiefin Morat, Kebar krossè)
    Sin. slargjâ

Polirematichis e espressions idiomatichis

• slargjâsi il cûr loc.