Dizionari de Lenghe Furlane

sglonfâ  sglon|fâ  [AF]

1. v.tr. jemplâ di aiar o di un altri fluit alc, in mût che al vedi plui volum, plui pression e tension:  al cirì la pompe e al tacà a sglonfâ une ruede de sô biciclete (Carlo Sgorlon, Prime di sere)
2. v.tr. (fig.) fâ deventâ plen, furnît e v.i. di une cualsisei robe, materiâl o imateriâl:  la ploie e veve sglonfât il riul (Carlo Sgorlon, Prime di sere); une man e lave chê altre e dutis dôs a sglonfin il tacuin (Josef Marchet, La unitât de camore)
   Sin. jemplâ , implenâ
   
   1. dâ, fâ vê in grande cuantitât:  no voleve inmalâju di creance, ni sglonfâju di smorfieçs çavatins (Maria Forte, Cjase di Dalban)
3. v.tr. (iperb.) jemplâ di robe di mangjâ, di bevi e v.i.:  cuant che si leve a cjatâle la none e veve simpri chê di sglonfânus di biscots
   Sin. jemplâ , implenâ , passi
   
   1. (fig.) dâ fastidi pe grande cuantitât, fâ pierdi la pazience:  dopo passade une di chês zornadis plenis di fastidis e di cjacaris che a sglonfin cence cumbinâ nuie, o stavi par sierâ ufici (Pieri Somede dai Marcs, Interès malandret)
      Sin. stufâ , ingomeâ , saceâ , passi
4. v.tr. fâ che si produsin gas tal stomi o tal intestin:  e chel che no capìs, / che al vin si preferìs / la bire, buine par sglonfâ la panze, / par inçuchî la ment, / par meti malumôr (Pieri Çorut, La mode)
   
   1. fâ inflamazion, fa vignî une inflamazion:  o voi dret ca di to pari e lui ti sglonfarà chel biel culut a fuarce di cengladis (Gianni Gregoricchio, Îr e doman)
5. v.tr. (fig.) fâ che alc al deventi o che al somei plui grant, ancje masse grant, impuartant e v.i.:  ce costial a dî lis robis te lôr vere misure e realtât? Lassait ai sfueis il vizi di staronzâlis, di sglonfâlis, di fâur la pinie e l'ôr da pît o, salacor, di inventâlis di plante fûr (Josef Marchet, Lis predicjis dal muini); i rapresentants politics a àn dedicât invezit avonde timp a insegnâ ae piçule platee trop impuartante che e je, in teorie, la lenghe furlane; a àn sglonfât chês pocjis iniziativis che a àn rivât a fâ (Comitât 482, Tantis cjacaris, dibant)
   Sin. esagjerâ , cjalcjâ , cjariâ , pompâ
   
   1. fâ che cdn. al sedi calcolât o che si calcoli lui stes plui impuartant, plui brâf di ce che al è:  un trop di adulatôrs lu lenç, lu ingjane; / po chei stes che da vîf lu àn sglonfât, / e tirin jù di lui subit mancjât (Pieri Çorut, Il nestri dolôr in muart del Arcivescul Zacarie Bricito)
      Sin. montâ , esaltâ , pompâ , tirâ sù
   2. imbroiâ cressint il presit, la cuantitât o sim.:  e sglonfe la note fin che rivais adore di mangjâi cualchi cjamput (Pieri Somede dai Marcs, A la oselade)

Polirematichis e espressions idiomatichis

• sglonfâ i budiei loc.v.
• sglonfâ il balon loc.v.
• sglonfâ il fiât loc.v.
• sglonfâ la bufule loc.v.

Proverbis:

• a sglonfâ masse il balon, al sclope