Dizionari de Lenghe Furlane

jemplâ  jem|plâ  [FO]

1. v.tr. fâ vignî plen,:  mi jemple la tace cul vin blanc strucjât da un butilion (Alan Brusini, Gian Paolo Linda, I forescj); [i soldâts di Atile] a jemplin i elms di tiere ta chel sît che cumò al sarès il Zardin Grant di Udin e a van a strucjâle sore dal piçul cuel (Josef Cjargnel, Il cjistiel di Udin)
   Sin. colmenâ , folcjâ , imbunî , implenâ , incolmâ , colmâ , infolcjâ
   Var. empî , emplâ
   
   1. fâ che un spazi al sedi dut cjapât:  libris e libris si tignivin sù un cul altri sfracaiâts tes scansiis che a jemplavin une parêt interie (Carlo Tolazzi, La salamandrie tal fûc); tante robe di jemplâ il scjalâr (Pieri Menis, Chei di Muraie)
   2. fâ che alc al vedi tantis robis, tancj elements:  in timp di vuere dut al jere bon ce che al jemplave lis busis de tessare (Francesc Placerean, Cuintristorie dal Friûl dal 1866 fint in dì di vuê)
   3. (fig.) fâ che un timp o une situazion a sedin ocupâts, impleâts in cualchi maniere:  i umigns a jemplavin cualchi ore passant la peraule fra di lôr (Maria Forte, Cjase di Dalban)
   4. (fig.) fâ che un timp, un lûc, une situazion e v.i. a sedin dominâts di une carateristiche, di un sun, di une cundizion psicologjiche e v.i.:  i zupets a jemplavin la gnot di un strît di arint (Alan Brusini, Par stradis lungjis)
   5. (fig., iperb.) fâ che alc al vedi grande cuantitât di cierts elements, ancje imateriâi:  jemplâ il lôr scrivi di une fulugne di acents, che cuasi mai a son poiâts jù cun coerence (Adrian Cescje, Memoriis di politiche linguistiche)
2. v.tr. stâ just, o ancje un pôc strent, tun vistît:  e jemplave cu la sô biele aste e la sô frescje zoventût i vistîts di regadin (Maria Forte, Cjase di Dalban)
3. v.tr. di tante int, ocupâ dut un spazi, un lûc e v.i.:  une sdrume di no crodi e jemplave place Sant Marc cui travistiments plui curiôs (Carlo Sgorlon, Ombris tal infinît)
   Sin. colmenâ , folcjâ , implenâ , stropâ
4. v.tr. sparniçâsi intun lûc, spandisi intal aiar:  [par vie di un incendi] un scjafoiaç di fum al jemple il cjast (Dolfo Zorzut, No je plui vive)
   Sin. implenâ , invadi , stonfâ
   
   1. fâ che alc si slargji, si spandi:  la polente za strucjade e jemplave la cusine di bonodôr (Alan Brusini, La cartuline)
5. v.tr. spec. ass., saceâ:  buine la torte, ma penze, e jemple daurman
   Sin. replî , saceâ , sacomâ
6. v.tr. fâ mangjâ, spec. in grande cuantitât:  scrassons di umanitât che jê e jemplave di mignestre, polente e un tai di scjaveç. E lôr simpri contentons (Maria Forte, Cjase di Dalban)
   Sin. ingosâ , sbultricâ , sglonfâ
7. v.tr. meti intun formulari lis informazions che a coventin:  se tu sês interessât [al cors], jemple il modul di preiscrizion e tu vignarâs clamât a pene che al tache (Aministrazion Publiche, Il Sfuei di Tavagnà)
   Sin. compilâ , completâ
8. v.tr. (fig.) dî, fâ, dâ, mandâ tantis robis bielis, sedi materiâls che imateriâls:  jemplâ di bussadis; mi à emplât di favôrs (Pieri Çorut, Pronostic del 1827)
   Sin. cuvierzi , imbunî , passi
   
   1. dî, fâ, dâ, mandâ tantis robis brutis, sedi materiâls che imateriâls:  i ribaltave la caroce al prepotent e lu jemplave di botis (Alan Brusini, Come tai romançs); mi à jemplade ancje di peraulatis (Carlo Tolazzi, La salamandrie tal fûc)
9. v.tr. (fig., ancje ass.) dâ sensazions fuartis, che a pain:  dutis chestis cjossis che sucedevin intor di lui, lu jemplavin di ligrie (Zuan Lurinçon, La Madalene)
   Sin. incolmâ
10. v.tr. (fig.) fâ che cdn., o un coletîf, o un marcjât o sim a sedin plens di alc di materiâl, tant che prodots, o imateriâl, tant che ideis, par vie de sô difusion:  scancelâ de scuele la storie dal Friûl, jemplâ la int di iredentisim, di Sacri Confini della Patria, ancje se chei confins e jerin te tiere di altris popui (Diego Navarria, Ce che si à fat tai ultins 5 agns e ce che si propon pai 5 a vignî)
    Sin. ingosâ , sbultricâ , sglonfâ
11. v.tr. (fig.) dominâ cu la proprie presince, cu la proprie personalitât:  e someave a cjase sô, Mafalde, che e jemplave cu la sô bardele e cu la sô figure dute la cusine (Gianni Gregoricchio, Trê feminis)
12. v.tr. (fig., coloc.) meti incinte:  le à emplade e po le à plantade (Giulio Andrea Pirona, Ercole Carletti, Giovanni Battista Corgnali, Il Nuovo Pirona); viodintle cu la frute, di sigûr cualchidun al varà dite, fasint ridi ducj: «Pieri a ‘nd à jemplade une altre» (Igor Londero, Delit in vie del Lavoro)

Polirematichis e espressions idiomatichis

• mandâ a fâsi jemplâ il cûl di ai loc.v.

Proverbis:

• cu lis bielis peraulis no si jemple la panze
• cu lis cjacaris no si jemple i budiei
• cu lis cjacaris no si jemple la panze
• cui che al sofle te cinise si jemple i voi
• Diu nus vuardi di un bon Zenâr par podê jemplâ il granâr
• il biel e il bon a jemplin la bocje
• il mês di Jugn si jemple il pugn
• metimi râr se tu vûs che ti jempli il granâr
• nol è mai un brâf miedi fin che nol jemple il cimitieri
• o di paie o di fen bisugne che si jempli il magazen
• o di stranc o di fen baste che si jempli il magazen
• pôc e spes al jemple la borse
• sorc râr al jemple il granâr
• sorc râr al jemple il granâr, sorc fis al impuarìs
• sut di Zenâr al jemple il granâr