Dizionari de Lenghe Furlane

stropâ  stro|pâ  [AF]

1. v.tr. sierâ un contignidôr o un condot cuntun stropul o cun alc che al jentre a pression:  al strope di corse il bûs de bote, mieze aromai e jere lade (Loris Azzano, Maladete la primure)
   Cfr. taponâ
2. v.tr. impedî il flus intun passaç:  une passare, un uciel che al fâs nome dams: al mangje grans come lis pantianis, al strope lis agadoriis dai cops cun stran e fen, al sgarfe e al becute dutis lis semençutis tai orts (Riedo Pup, La passare di Dedeà)
   Sin. blocâ , ingolfâ , sierâ , ostruî
   
   1. sierâ un spazi libar:  une dì, al puartà cjace, malte e claps, par stropâ une buse tal mûr dulà che e jentrave la canaie dal borc a fâ disio di pomis e ramaçs (Maria Forte, La tiere di Lansing)
   2. (fig.) jessi in grande cuantitât, jemplâ un spazi:  un tanfo di vueli, / di ai, di pes frit, / un fum che al scjafoie, / che al strope il sufit (Romeo Battistig (?), Ai Piombi)
3. v.tr. (fig.) in plui espressions che a vuelin dî cjatâ une soluzion, paiâ un debit e sim.:  e faseve saldo conts, tal so cjâf par doprâ ben ducj chei bêçs; che i comodavin ancje par cualchi buse di stropâ (Maria Forte, Cjase di Dalban); mi è restât ancje un claudut, che o ai scugnût sparagnâ altris trê cuatri agns par finî di stropâlu (Josef Marchet, Lis predicjis dal muini)
4. v.tr. (fig.) dâ une sensazion di opression, di bloc:  intune calumade di Catine al passà un moment di intorguliment. Tilde e rivà a viodi che e gloteve, nancje che un alc i stropàs il sgrasaiâr (Gianni Gregoricchio, Trê feminis)
   Sin. sierâ , strenzi , ingropâ , leâ
5. v.tr. (fig.) impedî:  il voli trist dai viei ur stropave tal cûr chel 'simitum di poesie (Dino Virgili, La aghe da pît la cleve)

Polirematichis e espressions idiomatichis

• stropâ la bocje loc.v.
• stropâ lis orelis loc.v.
• stropâsi lis orelis loc.v.

Proverbis:

• a 'nd volarès di macarons par stropâur la bocje a ducj