Dizionari de Lenghe Furlane

blocâ  blo|câ  [AF]

1. v.tr. fermâ cun fuarce:  «Va-len-ti-ne cja-li-mi: ferme!» le blocà, strenzint i siei braçs a fuart, cjalantle tai voi (Dree Valcic, The end)
   Sin. fermâ
2. v.tr. (ancje ass.) fermâ a colp un veicul frenant cun fuarce:  al jentrà cul Scania-Vabis di 28 toneladis tun splaç denant di une tratorie, e lu blocà (Agnul di Spere, In Friûl, nossere); Loris al rivave di volade [in biciclete], i dave di cuintripedâl e al blocave tun fumaron (Dino Virgili, La aghe da pît la cleve)
3. v.tr. impedî, interompi un passaç:  a àn magari dividudis proprietâts, distacade une cjase de sô fontane, crevât in doi tocs un prât, un bosc, un ort, blocade une strade, une ferade (Josef Marchet, La man e la arme)
   
   1. impedî lis viis di comunicazion, isolâ un lûc cun fuarcis armadis:  Vignesie, za cenglade sul ôr de Tiereferme, e vignive blocade ancje par mâr da lis nâfs dal nemì (Giovanni Pillinini, Zuan Batiste Cavedalis - Une vite esemplâr)
4. v.tr. (ancje fig.) no permeti a cdn. a alc di lâ di une cierte bande, di rivâ intun ciert puest:  al rive al porton. "Cui sêstu? " Lu bloche la vuardie (Diego Navarria, Une zornade cun Marquart intal Parlament de Patrie); i pacs di mangjative o di vistîts inviâts des fameis al Comant, a vignivin blocâts e mandâts indaûr (Angelo Floramo, 1914-2014 Cuintristorie de Grande Vuere)
   Sin. fermâ , stratignî
   Cfr. inclaudâ , inclapâ
   
   1. impedî di lâ indevant cuntune azion:  Beltram al veve bielzà viarte la bocje par ribati, ma il vieli Bastian lu blocà cuntun sest sec de man (Gianni Gregoricchio, Trê feminis)
5. v.tr. (ancje fig.) fâ che alc, ancje astrat, nol ledi plui indevant:  pûr vint pe prime volte il guvier e la maiorance di centri e di çampe a favôr de leç, i nazionaliscj talians lis àn tentadis dutis par blocâle (Arnalt Baracêt, La bataie no je finide); une presince di servitûts militârs in Friûl che a àn blocât il nestri disvilup par plui di vincj agns (Dree Valcic, Par Andreotti il nestri Friûl al jere dome "confin orientâl")
   Sin. fermâ
   Cfr. stagnâ , taiâ , frenâ , çoncjâ
   
   1. fâ che alc al resti intune stesse cundizion, che nol cambii:  blocâ la scuadre come che e je, nuie vendi nuie comprà, nuie grancj afârs (Riedo Pup, O cun Zico o cence Zico)