Dizionari de Lenghe Furlane

cjapâ sù    [FO]

1. loc.v. cjapâ alc che al è par tiere o poiât di cualchi bande che si pues calcolâ plui in bas dal subiet o ancje cjapâ in sens gjeneric o intensitîf:  il nono al cjapave sù cu lis moletis une bore di fûc, al impiave il so «virgjinie» e al pipave di gust (Pieri Menis, Il «trono» dal von); al cjapà sù il cjapiel de cjadree e al si invià fûr (Carlo Sgorlon, Prime di sere)
   Sin. cjoli sù
   
   1. cjapâ un prodot de tiere:  nô contadins se no i din sot su la ore juste, no cjapìn sù nuie (Pieri Somede dai Marcs, Vilie di Nadâl (teatri)); talpinâ il bosc par cjapâ sù cjastinis lusintis su la stagjon che e mene dongje i Sants (Maria Forte, Il vivi al è chel rangjâsi)
2. loc.v. fâ montâ o permeti a cdn. di montâ parsore di une bestie o tun mieç di traspuart par puartâ ator:  nus à fats smontâ, nô e chê sdrume di altris fruts che o vevin cjapât sù pe strade (Pieri Somede dai Marcs, Fra Silvio)
   Sin. cjoli sù
3. loc.v. [TS] zûcs intai zûcs di cjartis, cjapâ une o plui cjartis di chês che a son tal mac
   Sin. pescjâ¹
4. loc.v. fâ in mût di vê alc, soredut domandant ator:  a pene che il gnûf crucifìs al jere pront e si saveve la spese, lis feminis si son metudis a cjapâ sù lis ufiertis, cjase par cjase (Pieri Menis, Il Signôr sul mûr de braide); la leç eletorâl e deve la pussibilitât ai partîts che a fossin stâts za in Consei regjonâl di presentâsi aes elezions sucessivis cence scugnî cjapâ sù lis firmis (Adrian Cescje, Memoriis di politiche linguistiche)
   Sin. cjoli sù
5. loc.v. imparâ une nozion, une tecniche, tacâ a vê une abilitât e v.i.:  o dîs che, cu la lenghe che o vin cjapade sù ancjemò cuant che o jerin fruts, podê fevelâ cun Diu, al è un difindi la proprie dignitât (Francesc Placerean, Crist re cence prepotence)
6. loc.v. acetâ alc che al è proponût di altris o che si ven in cualchi maniere in contat, tant che une idee, une dotrine, une religjon, un mût di fâ e v.i.:  il vizi di bevi lu ai cjapât sù di soldât, in caserme e fra i pics da lis montagnis (Pieri Somede dai Marcs, Une scarpute); i zovins a cjapin sù a colp lis novitâts, dome parcè che a son novitâts (Dino Virgili, La aghe da pît la cleve)
   Sin. cjoli sù
7. loc.v. cjapâ une responsabilitât, une incjarie e v.i.:  [la Regjon] e à di cjapâ sù la part di coordenament de tutele scolastiche che i assegne il decret ministeriâl dal 2002 (Adrian Cescje, Memoriis di politiche linguistiche)
   Sin. cjoli sù
   
   1. fâ une cierte ativitât:  e veve tornât a cjapâ sù il lavôr di sartore, ma nol jere stât facil tirâ dongje une clientele intun paîs che nol jere il so (Carlo Sgorlon, Prime di sere)
   2. lâ indevant intune ativitât, cjapant il puest di cdn. altri:  cuant che il puar Mucul, a fuarce di slizeriments, al à fat faliment, tu âs dade une man a strucjâlu, disint che no ti veve paiât il to servizi; e tu sês rivât adore di cjapâ sù la ostarie cun dute la licence (Josef Marchet, Lis predicjis dal muini); se i parons de fabriche a si impontin e a sierin il stabiliment ce si fasaraial? cui cjape sù la fabriche? i operaris no dal sigûr, il Guvier nancje che al à avonde rognis di distrigâ (Pieri Somede dai Marcs, Un pugn di moscjis)
8. loc.v. dâ un lavôr, cjapâ a vore:  doman cjapait sù il dopli di operaris, cjolêt a nauli altris cjars e cjavai par tirâ dongje il materiâl, e lait indenant: dentri dal mês o vin di meti sù il cuviert (Pieri Somede dai Marcs, Lis nestris rosis)
9. loc.v. di une femine o di une mascje di animâl, restâ incinte, tacâ a spietâ un frut o un piçul o parturîlu:  no è stade buine nancje di cjapâ sù un frut par so cont… (Pieri Somede dai Marcs, Vilie di Nadâl (teatri))
   Sin. comprâ
10. loc.v. di une comari, judâ une femine a parturî, judâ un frut a nassi:  une volte in ducj i paîs a jerin feminis che, cence vê studiât, a savevin cjapâ sù fruts come e forsit miôr di chês che e vevin il diplome (Pieri Menis, Il forest)
11. loc.v. fâ alc che al à efiet su se stes, sintî su di se i efiets di alc:  si fermave in paîs uns doi o trê dîs, passant di une ostarie a chê altre, cjapant sù di chês pipinis che Diu nus vuardi (Meni Ucel, Credit)
12. loc.v. viôt cjapâsi sù :  il vecju, bel sfregalantsi cu la man la barbita speloca, al cjapava sù e al zeva four (Novella Cantarutti, Il spiçot); Riche mi veve rispuindût "Ma sì, dai, anìn!" O vevin cjapât sù e a jerin partîts (Raffaele Serafini, Soreli jevât a mont)

Components:

• cjapâ v.tr., v.intr.
• sù av., inter., s.m.inv., adi.inv.

Proverbis:

• a tindi masse archetis, a cjapin sù i uciei chei altris
• ancje il Signôr al è dismontât di mus par cjapâ sù un fasûl
• ce che si semene si cjape sù
• cui che nol semene nol cjape sù
• se tu sês cristian, cjapilu sù cu la man
• si sta mancul a butâ vie che no a cjapâ sù