Dizionari de Lenghe Furlane

comprâ  com|prâ  [FO]

1. v.tr. deventâ paron di une robe, di une bestie, di une persone e v.i. paiant:  e jere stade li dal scaletîr a comprâ la fuiace (Josef Marchet, Lis predicjis dal muini); cuant che il consumadôr, prin di comprâ, al vûl savê se la lavorazion e la produzion dal prodot a dipendin di une cundizion di sfrutament, magari ancje di fruts, o ben se a ruvinin l'ambient o ancjemò dongje se no rispietin criteris di ecuitât (Buteghe dal Mont, Luche Nazzi, Guide par un consum just e solidâl); in plui dai siei afârs di vendi e di comprâ, al faseve il sensâr di cjamps, di cjasis e di boscs (Alan Brusini, Par stradis lungjis); pan, cevole, e un toc di cjar di agnel. Robe che, aromai si comprave di scuindon a un presit improibît, parcè che al jere plui che impussibil cjatâle sul marcjât (Maria Forte, Cjase di Dalban); al veve simpri i bregons scjars che i lassavin scjampâ la panze, e cualchidun i diseve ridint «Checo, o vendi cûl o comprâ tele» (Maria Forte, Il tei); a comprâle gnove [la moto] i varessin coventâts almancul 400 mil francs, ma lui le veve cumbinade ben (Antescûr, Il svol dal Falcone); di vuê in doman, al à vendût la vile cun dute la tignude su la Çavatine e comprât di lâ a stâ a Gnespolêt (Ivano Urli, I spirts); se a vendevin une vacje buine e cence difiets a davin cheste garanzie: "vacje di galantom". Nuie altri. E chel che le comprave al jere sigûr de bestie (Riedo Pup, I furlans e la leç); ce ise, un nemâl nestre fie che si puedi vendi e comprâ! (Alan Brusini, Come tai romançs)
   Sin. cjoli , cjapâ , cuistâ
   Var. crompâ , comperâ
   
   1. cjoli un zuiadôr intune scuadre:  a son lâts jù a Rome a protestâ cuintri la Italie che no voleve lassâju comprâ Zico (Riedo Pup, O cun Zico o cence Zico)
      Sin. cjoli , ingaiâ , cjapâ , cuistâ
   2. paiâ par doprâ cemût che si vûl un spazi comunicatîf:  Siae e Confindustria Cultura a àn comprade une pagjine interie sui gjornâi plui vendûts par poni dîs cuistions sui dirits di autôr (Dree Venier, «No esistin piçulis leteraturis»)
2. v.tr. cjolisi alc cui bêçs, favôrs e v.i., in maniere ilegâl:  comprâ la patente; comprâ la lauree
3. v.tr. corompi:  comprâ un assessôr; comprâ un judiç; prin si bute jù par podê sfracaiâ sul nassi; po si cîr di comprâ i aversaris e di impiâ il fûc fra di lôr; e tal ultin, se a tegnin dûr, cjapâ sù lis lôr ideis par smamîlis (Francesc Placerean, Cuintristorie dal Friûl dal 1866 fint in dì di vuê)
   Sin. corompi , paiâ
4. v.tr. rivâ a convinci cun cualchi compens:  i puars tu ju compris cuntune tace di vin o cuntun bussul di sgnape (Alviero Negro, Int di masnade)
5. v.tr. (fig.) rivâ a vê alc di astrat, tant che une sensazion, une emozion e v.i., par vie che e cres dentri vie:  une zornade, dut câs, e podeve jessi diferente, e podeve deventâ une glagn di memorie, alc di picjâsi par no pierdi il sens de realtât e par comprâ un fruçon di sperance (Franca Mainardis, Aiar di cjase)
   Sin. cuistâ
6. v.tr. (fig.) sintî, scoltâ, vignî a savê:  o disarai robis che lis ai viodudis e che o ai vude part. Alc lu ai savût di altris e lu vent daûr che lu ai comprât, cence ni zontâ ni staronzâ (Antoni Beline, Pre Pitin)
7. v.tr. (fig., coloc.) ancje ass., vê un frut
   
   1. parturî:  ma eco che une dì, voltiti mont!, une novitât e passe di bocje in bocje come un lamp […] Modestute e veve di comprâ (Pieri Menis, Cui si jerial impaçât cun Modestute?)
   2. concepî un frut, restâ incinte:  cumò e sarà contente, e nol podeve capitâi che cussì, di vê comprât un frut pai fossâi, chê brute vergognosate (Pieri Somede dai Marcs, Il prossim)
      Sin. cjapâ sù

Polirematichis e espressions idiomatichis

• vendi cemût che si à comprât loc.v.
• vendi come che si à comprât loc.v.
• vendi daûr che si à comprât loc.v.

Proverbis:

• a chel pês che si compre, bisugne vendi
• a vendi fen si compre miserie
• a vendi ledan si compre miserie
• a vendi ôcs si compre miserie
• ce i zovie la robe al ignorant co nol po comprâ il savê?
• cjar in mostre no si compre mai
• cuant che la ciale e cjante di Setembar, cui che al compre blave al sta mâl a tornâle a vendi
• cui bêçs dut no si compre
• cui che al à voie di mateâ che al compri un orloi o che si ledi a maridâ
• cui che al compre al à bisugne di cent voi, cui che al vent i 'nd baste un
• cui che al compre cence podê al vent cence volê
• cui che al dispresee al compre
• cui che al stime al compre
• cui che al stime nol compre
• cui che al vent fen al compre miserie
• cui che ben al compre ben al vent
• cui che nol sa comprâ che al compri zovin
• cul biel fâ, si po comprâ
• il mês di Març i comprà la pelice a sô mari
• il mont al è mieç di vendi e mieç di comprâ
• il vuadagn al sta tal comprâ ben
• la robe si le vent là che no 'nd è e si le compre là che si cjatile
• no si compre la gjate tal sac
• no stâ vendi co ducj a vendin, no stâ comprâ co ducj a comprin
• nol vâl vendi il cjôt par comprâ il purcit
• par vendi al baste un voli, par comprâ no 'nd bastin cent
• un contadin che al vent ledan al compre pedoi
• une robe daspò vendude ducj volarès comprâle