Dizionari de Lenghe Furlane

paiâ  pa|iâ  [FO]

1. v.tr. (ancje ass.) dâ une sume di bêçs par ce che si compre, par un servizi, par une cuote e v.i., cun obiet che al pues jessi il ben o servizi che si gjolt, la cuantitât di bêçs che si dan o la persone che ju cjape:  par comprâ i argagns tecnics e paiâ i prins mês di afit i fondadôrs a vevin tirât fûr di lôr sachete i bêçs che a coventavin (Max Mauro, Un Friûl difarent: i 90 mhz di Onde Furlane); la tiere buine e à dât il vivi al contadin e cun ce paiâ prediâl, fogatic, cuartês decimis, canui, regaliis (Dino Virgili, La aghe da pît la cleve); i displaseve di scugnî paiâ un dusinte francs di plui di chel che si spietave (Carlo Sgorlon, Prime di sere); se mai cualchidun si dismenteave di paiâlu, nol jere dal sigûr lui a scuedi (Lucio Perès, Gno barbe Sisto); al tirà fûr de sachete il tacuin par paiâ (Agnul di Spere, In Friûl, nossere); paie, nâs di cuaie! (Josef Marchet, Lis predicjis dal muini)
2. v.tr. dâ o jessi un compens di cualsisei sorte, ancje imateriâl:  cheste sodisfazion par me e je tant grande e tant biele che mi paie cent voltis di dut il servizi che o ai fat (Josef Marchet, Lis predicjis dal muini); [dopo de prime vuere mondiâl] i monuments cu lis listonis di nons no paiavin i muarts (Francesc Placerean, Cuintristorie dal Friûl dal 1866 fint in dì di vuê)
   Sin. ripaiâ
3. v.tr. (fam., ancje ass.) ufrî une consumazion o alc che al coste bêçs a cdn.:  no, no, lassait stâ, gracie, co si cjatarìn a Udin mi paiarês invezit un cafè (Pieri Somede dai Marcs, Robis che a sucedin); si bêf la prime tace, Bon une vore. Mi sint in dovê di ufrî la seconde. Il professôr, deventât di manie largje, al ordene la tierce […] Dopo mi visi nome che paie tu, paie jo, paie che ti torne a paiâ; cence ofindi nissun, Titute al à scugnût spudâ fûr dutis lis palanchis e buine gnot (Arturo Feruglio, Viaç a Vignesie)
4. v.tr. (fig.) dî alc o dâ une rispueste che a sierin une cuistion, che a lassin cence repliche:  mi à dit nome: «Disii che no stedi lâ vie, e che cuant che al sarà il moment di fevelâ i fevelarai jo». E mi à paiât cussì (Vittorio Vittorello, A ogni cost)
5. v.tr. (fig., ancje ass.) patî lis consecuencis:  ogni malefate si le paie, timp o tart (Josef Cjargnel, La liende di Dimponç); une logjiche che e voleve che pes capeladis dai grancj, a paiâ a fossin simpri i plui piçui (Roberto Ongaro, Il muc)
   Sin. paiâle

Polirematichis e espressions idiomatichis

• fâ il coion par no paiâ il dazi loc.v.
• fâ il gnogno par no paiâ il dazi loc.v.
• fâ il mone par no paiâ il dazi loc.v.
• fâ il stupit par no paiâ il dazi loc.v.
• paiâ la pene loc.v.
• paiâ la spese loc.v.
• paiâ su la brucje loc.v.
• paiâ un dêt di man loc.v.
• paiâle cjare loc.v.
• paie, nâs di cuaie loc.inter.

Proverbis:

• a paiâ denant trat, o tart o mâl fat
• a paiâ e a murî, al è simpri timp
• al è miôr paiâ che no fâ pezarie
• al ven ben sant paiarìn che nol rispiete nissun
• ancje il Signôr al è furlan: se nol paie vuê, al paie doman
• bisugne paiâ il garzonât
• cent oris di malinconie no pain un centesim di debit
• cent pinsîrs no pain un debit
• cent pinsîrs no pain un solt
• che al pai l'inocent pal pecjadôr
• cu lis cjacaris no si paie debits
• cuant che si paie, si po ancje lecâ il plat
• cui che al comande al paie
• cui che al fale di cjâf al paie di borse
• cui che al fale di cjâf al paie di gjambis
• cui che al fale in premure al paie a pôc a pôc
• cui che al fâs il prin al paie il bocâl di vin
• cui che al paie debits al fâs capitâi
• cui che al piert che al pai
• cui che al promet pai altris al paie par se
• cui che al romp che al pai
• cui che al romp di vieri al paie di gnûf
• cui che al sa scuedi nol sa paiâ, cui che al sa paiâ nol sa scuedi
• cui che al vûl vê lavôr mâl fat, che lu pai denant trat
• cui che le à rote prin che al pai il cjalçumit
• cui che nol paie il pôc al paie mancul il trop
• cuntun solt pocjis voltis si paie un debit
• daûr dai merits il Signôr al paie
• denant trat si paie lis putanis
• Diu al è un bon infant, al viôt e nol pant, al paie ducj e no si sa cuant
• dominediu nol paie la sabide
• dominigjò nol paie la sabide
• i debits che si fâs par bondance, si ju paie par cjaristie
• i debits no si ju paie in chê dì che si ju fâs
• i dincj no stâ menâ se no tu âs bêçs di paiâ
• il cjan nol môf la code se no si lu paie
• il dint no stâ menâ, se no tu âs bêçs di paiâ
• il mus al paie il fen cui scalçs
• il Signôr al à dut in man: se nol paie vuê al paie doman
• il Signôr al è un grant infant: al paie no si sa cuant
• il Signôr nol paie ogni sabide, al va ben planc ben planc, e vie pal timp al va tacant
• in chê dì che si paie un debit si vierç un credit
• l'avocat che nol ven clamât nol ven paiât
• la ligrie nol è aur che le pai
• la pâs di cjase nol è aur che le pai
• la salût nol è aur che le pai
• mangje dean, paie comun
• mangje merie, paie comun
• mil fastidis no pain un debit
• nissun nol sa ce che e coste, dome chel che le paie
• nissun sa ce che e coste la robe, nome cui che le paie
• no si paie i debits in chê dì che si ju fâs
• no stâ mai paiâ denant trat
• o preâ o paiâ
• o timp o tart si pailis dutis
• paiâ denant trat, o tart o malfat
• paie e po scuêt
• paron paie, paron comande
• se reson no ai, miôr che o sparagni la bocje e che o pai
• se si vûl vê un gust, bisugne paiâlu
• si scuen paiâ il garzonât
• un glon di cjampane al paie ducj
• une ind paie cent
• vite e gjolt, vite e paie