Dizionari de Lenghe Furlane

jevâ sù    [FO]

1. loc.v. movi insù, indreçâ insù, fâ movi insù, fâ alçâ, svolâ e v.i.:  no jere plui buine nancje di jevâ sù il braç cu la sedon (Carlo Sgorlon, Il dolfin); al ploveve des frisis dal sofit di breis il patùs che a jevavin sù lis surîs tes lôr scanis sul cjast (Meni Ucel, Messe a straoris)
   Sin. tirâ sù , jevâ
   
   1. (fig.) fâ lâ sù di valôr, presit, cualitât, cuantitât e v.i.:  al fâs preseose la lenghe e le jeve sù di grât, le nobilite (Laurin Zuan Nardin, Umberto Valentinis, "Disincjants", Pordenon, 2003)
2. loc.v. fâ nassi, fâ vignî fûr:  al è di domandâsi se chei che a àn jevade sù tante confusion cuintri de grafie uficiâl normalizade a son restâts ancjemò convints di vê fate une grande bataie par salvâ lis variantis (Adrian Cescje, Memoriis di politiche linguistiche)
   Sin. tirâ sù , tirâ fûr , jevâ , movi
3. loc.v. tirâsi sù impins, no stâ plui sentât o distirât:  al si smenà un pôc su la cjadree e po al jevà sù di colp (Alviero Negro, La pidade); planchin planchin al butà de bande la coltre, al metè fûr i pîts dal jet, al jevà sù (Pieri Menis, Nadâl ancje par Gjelmin)
   Sin. jevâsi sù , jevâ , jevâsi , tirâsi sù
   
   1. in particolâr vignî fûr dal jet cuant che si sveisi:  une zornade e jevâ sù dal stran plui strache de sere: di istès si strissinâ sul lavôr (Pieri Somede dai Marcs, La spiarie)
4. loc.v. (ancje fig.) lâ sù, lâ adalt o ancje intune direzion che si pues calcolâ adalt, superiôr, setentrionâl e v.i.:  il soreli, che al jevave sù pegri parsore la culine, al pareve che nol rivàs adore di iluminâ chel mont frêt e muart (Pieri Menis, Sul agâr); al ti netave di polvar jeurs e cuais e parfin i becanots tal palût che a jevin sù a vueu come fusetis strambis (Alan Brusini, Par stradis lungjis)
   Sin. lâ sù , jevâsi sù
   
   1. vê une dimension, une direzion e v.i. viers dal alt, ancje cence moviment:  a Delfi e fasin impression e contrast la dolce calme dal spazi tra lis monts che e jevin sù imortâls, plen di lûs cjalde e profumade di resine e salvie, e lis ruvîs a tiere di un mont costruît tai secui e po distrut da la Storie (Adrian Cescje, Viaç aes origjins dal Logos)
5. loc.v. nassi, scomençâ a jessi o a fâsi sintî:  e jere tornade la Siarade, cu lis ploiis, il frêt restîf e la buere che e jevave sù di colp (Carlo Sgorlon, Il dolfin)
   Sin. jevâ , jevâsi , jevâsi sù
6. loc.v. (fig.) rivâ o tornâ a un nivel alt di fuarce, benstâ, valôr, libertât e v.i.:  chi di nô lis disgraciis a insegnin a jevâ sù plui fuarts di prime (Angelo Floramo, Cuintristorie dal Nûfcent 1980-1990)
   Sin. jevâ , jevâsi , jevâsi sù , tirâsi sù

Components:

• jevâ v.tr., v.intr.
• sù av., inter., s.m.inv., adi.inv.