Dizionari de Lenghe Furlane

movi  /-ó-/  mo|vi  [FO]

1. v.tr. cambiâ di puest, posizion, direzion, sedi une volte sole che plui voltis seguitivis:  il predicjadôr al fevelave vonde fuart, al moveve i braçs (Angelo Covazzi, Il cuaresimâl); sul cjast lis pantianis a corevin movint i corondui (Checo Tam, Ombris); i volerin sîs strangulins par movi chel clap (Gianluca Franco, Il solt di Arlunc)
   Var. muevi
   
   1. ancje cun subiet inanimât:  i salets e i gjatui no movevin fuee tal scotôr dal dopomisdì (Dino Virgili, Cuel Valâr)
   2. ancje cun obiet il moviment stes:  al môf cualchi pas in direzion de muraie (Franco Marchetta, Madalene); il cjaval di Nardon, strighiât e slissotât, e cui letons ben lustris, al moveve dispès il so trot misurât (Maria Forte, Cjase di Dalban)
2. v.tr. gjavâ cdn. dal so puest o de sô funzion indulà e metilu di une altre bande:  domandâ di jessi mot di ufici
   Sin. cambiâ , stramudâ , trasferî , mudâ
   
   1. meti intune altre sede, intun altri stabil, intune altre localitât e v.i.:  a àn mot l'ufici de bancje
3. v.tr. [TS] zûcs (ancje ass.) fâ une mosse, cambiâ di casele une pedine, un toc di un zûc:  in dutis lis partidis di scacs al scomence a movi simpri il blanc (Nilde Teresa Negro, Zuìn di scacs)
4. v.tr. fâ lavorâ:  si sveave adore par jentrâ drete in chê vore, e e moveve il famei a impiâ il fûc te lissiarie, e la Svualdine a puartâ dongje i coladôrs par impodenâ (Maria Forte, Cjase di Dalban)
   Sin. meti sot , meti in vore , clamâ
   
   1. fâ intervignî:  [il mît de Grecie classiche] al à contribuît a fâ nassi la Grecie moderne, che al à movude la Europe a gjavâle di man ai Otomans (Adrian Cescje, Viaç aes origjins dal Logos)
5. v.tr. mudâ di puest o posizion i stiçs par fâ cjapâ fuarce al fûc:  te foto di Coccolo si viôt un vecjo che al môf un fûc tacât par brusâ i vidiçs cuinçâts (Erika Adami, I lûcs de tradizion in Friûl)
   Sin. saborâ
   
   1. fâ deventâ plui vîf un sintiment, une sensazion, un pinsîr e v.i.:  nol voleve movi i dolôrs di chei altris che al jere avonde ingomeât dai siei (Maria Forte, La tiere di Lansing)
6. v.tr. fâ scomençâ o rindi plui fuarte une azion, une dinamiche, un element e v.i.:  tu doncja movevis vuera ai miei nemîs, e jo varès dovût ringraziâti (Zuan Luîs Filli, Il farc); la gjornalarie locâl se gjolt a movi polemichis (Adrian Cescje, Memoriis di politiche linguistiche); a son tantis lis fuarcis che a fasin jeve sul nestri pensâ e a movin la nestre disfortune (Maria Forte, La tiere di Lansing)
   Sin. fâ , tacâ
7. v.tr. (fig.) fâ vignî fûr cdn. de imobilitât, de passivitât:  al è simpri stât cualchidun de bande de puare int […] ma nol jere rivât adore di fâ grum e movi la int, in gjenerâl rassegnade a restâ […] sotane (Francesc Placerean, Cuintristorie dal Friûl dal 1866 fint in dì di vuê); o fâs tantis gjerometis, par fâ movi la int, par che e cjapi interès a ce che o i dîs (Maria Forte, Il Bide di Miot)
   Sin. dâ la mote , dessedâ , discjantâ , disdurmidî , dismovi , dissumiâ , disveâ , mobilizâ , pocâ , remenâ , sacodâ , sburtâ , scjassâ , sclocjâ , scorsonâ , scossâ , sgorlâ , spacâ , spacolâ , spironâ , spontonâ , stomblâ , uçâ , stiçâ
   
   1. fâ cambiâ ande:  no si rive a movilu des sôs ideis
8. v.tr. (fig.) cambiâ une situazion, cundizion e v.i.:  [azions politichis che] a rivin in moments li che la situazion di politiche linguistiche e je blocade, par movile (Sandri Carrozzo, Riflessions par une politiche linguistiche de lenghe furlane)
   Sin. furigâ , saborâ , tirâ fûr , tocjâ
9. v.tr. [TS] agr. lavorâ la tiere, voltâle in mût che e sedi mancul dure:  a davin sù i ricuarts: a movi chê tiere al jere come saborâ dentri dal timp passât (Dino Virgili, La aghe da pît la cleve)
   Sin. svegrâ
10. v.tr. (fam.) sveltî la digjestion:  il most al pues movi i budiei

Polirematichis e espressions idiomatichis

• movi cantins loc.v.
• movi flât loc.v.
• movi il cûl loc.v.
• movi il pas loc.v.
• movi il poleâr loc.v.
• movi la aghe ferme loc.v.
• movi la bardele loc.v.
• movi lis aghis loc.v.
• movi montagnis loc.v.
• movi nainis loc.v.
• movi pas loc.v.
• movi pucis loc.v.
• movi un clap loc.v.
• movi une cee loc.v.

Proverbis:

• clap che si môf nol fâs muscli
• cuant che la buere si mûf, o un o cinc o nûf
• il cjan nol môf la code se no si lu paie
• la bisugne a fâs ben movi i piçs
• no si va a movi il jespâr
• se Diu nol vûl, no si môf une fuee di pôl