remenâ  re|me|nâ  [AF]

  1. v.tr. movi plui voltis e in plui direzions:  Siroc par daûr vie / ju sglonfe [i nûi], ju tizie, / ju zire, ju remene / pal cîl, e ju sfolmene (Pieri Çorut, Il Strolic furlan par l'an 1841); zontâ la scudiele di lat di mandule dulà che si veve disfat l'amit e tornâ a meti sul fûc remenant fin che nol jeve il bol e al tache a infissîsi (Sandri Carrozzo, Menjar blanc)
    Cfr. zirâ , menâ , voltâ , rizirâ , messedâ
    1. cjapâ e tornâ a cjapâ in man plui voltis o movi tra lis mans:  si tire jù la armoniche de schene, / la vierç, la strenç, la stuarç e la remene, / cjalant come ispirât denant di se (Enrico Fruch, Il sunadôr); cumò e veve tacât a remenâ il vâs dal zucar e la cogume sul spoler (Nadia Pauluzzo, Il bintar)
    2. (fig.) tornâ a frontâ, valutâ, cirî e v.i., ancje alc di imateriâl:  il zovin duncja al si de a remenâ subit cul cerviel ce che al varès vût di fâ (Federigo Comelli, Il me paîs); e remenave chescj pinsîrs, co jere rivade devant de androne dal Puarti (Gianni Gregoricchio, Îr e doman)
  2. v.tr. (fig.) cjapâ e tocjâ intun moroseç o intun rapuart sessuâl:  chê fantate si è lassade remenâ di ducj (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
  3. v.tr. dî alc par ridi di cdn. o par fâ ridi di cdn.:  siôr Jacum Cjasâl, che al si lassave sorâ e remenâ, tant su la muse che par daûr, sence mai ofindisi (Giovanni Gortani, A la sagre di Mion); une biondate foreste e ridè a fuart cjalantlu. "Scufe!" come par remenâlu (Dino Virgili, La aghe da pît la cleve)
    Sin. menâ pal nâs , menâ pal cûl , cjoli ator , cjoli vie , cjoli pal cûl , cjapâ pal cûl , menâ il rost , menâ la viole , sorâ , ridi , ridi fûr
  4. v.tr. (fig.) fâi fâ a cdn. ce che si vûl, ancje cul imbroi o cun so dam:  continuâ a remenâ un popul dividût e sotan (Sandro Lano, Rapresentants di cui?)
    1. doprâ alc cemût che si vûl, ancje in maniere no corete:  chel brâf om di Ciceri, che al è vicepresident de associazion ma di fat le remene cemût che i pâr, miôr che se al fos president (Adrian Cescje, Memoriis di politiche linguistiche)