Dizionari de Lenghe Furlane

ridi  ri|di  [FO]

1. v.intr. vierzi la bocje e mandâ fûr in maniere ritmade respîr e vocalizazions par esprimi sintiments o emozions, pal plui di ligrie, ma daûr dal câs ancje di ironie, isterie, tristerie, rabie e v.i.:  se in chê sere no nus je sclopade une vene tal cuel a fuarce di ridi, garantide che di chê bande no murìn plui (Pieri Piçul, Vieri e gnûf); al rivà sot aghe fin su la renzite, al cjapà Marisa pal pît e le tirà dentri fin avuâl dai zenoi: e molà un zigon, e i frutats ridi di discuestâsi (Dino Virgili, La strade come un destin); nus someave une marionete e no si podeve stâ di ridi (Pieri Somede dai Marcs, Ce sdrumade)
   
   1. v.tr. dî in maniere legre:  "Cuietiti, par plasê!" al veve ridût Lissandri. (Franca Mainardis, Il sium di Lissandri); "Si 'ndi viodarà di bielis tal curtîl dai Bastians" e ridè Luzie de Clare (Maria Forte, Varc di confin)
2. v.intr. tirâ sù lis spicis de bocje e in câs vierzile a pene di mostrâ i dincj, tant che espression di ligrie o ancje ironie o rassegnazion o altris emozions che si capissin dal contest:  Nita e fâs di sì cul cjâf, ridint, come di morose (Dino Virgili, La aghe da pît la cleve); al faseve bocje di ridi. Ce vevial di ridi? (Carli Pup, Salvans su la Bivare); se cualchi frutat i domandave di provâ, lui i rideve e lu contentave (Maria Forte, Cjase di Dalban)
   Sin. fa muse di ridi , fâ bocje di ridi , riduçâ
3. v.intr. (fig.) vê o dâ une espression vive di plasê, ligrie e v.i.:  la bocje no diseve nuie, ma ben i ridevin i voi (Pieri Menis, Chei di Muraie); a i ridevin a Mariuta li grispi da la musa picinina drenti il fassalet tignût a larc (Novella Cantarutti, Cocali)
   Sin. balinâ , barlumâ , cimiâ , fâ lusôr , fâ sflandôr , lupâ , lusî , lusignâ , pilâ , sflandorâ , smicjâ , stralusî , trai , traslusi
4. v.intr. (fig.) di materiâl, jessi tant fruiât di jessi li li par rompisi o jessi mieç rot:  la mê gjachete e scomence a ridi sui comedons (Giulio Andrea Pirona, Ercole Carletti, Giovanni Battista Corgnali, Il Nuovo Pirona); chel zovinut al ere puar, vistût a la buine, cuntun pâr di scarpis che ridevin di fan (Zuan Lurinçon, La Madalene)
5. v.intr. (fig.) fâsi viodi o traviodi:  dentri i arcs a ridevin pituris plenis di agnulins che a svolavin distirâts sui nûi (Maria Forte, I arcs); eco che ridin a miârs rissultivis di vita e belessa tai butui lusints (Ugo Pellis, Al mandolâr)
   Sin. imparêsi
6. v.intr. (fig.) spec. di lûs o di robe che e slusiche, dâ une sensazion vive di ligrie:  la aghe e rideve tal soreli smalitant di lusignis (Dino Virgili, Aghelusinte); rît il cîl colôr di rose / sul blancôr de nêf plui pûr (Emilio Nardini, L'alpin furlan)
7. v.tr. cjoli vie, meti in ridicul:  o vevi implantadis cuatri o cinc rosis: la mê passion; e ducj mi ridevin par cheste debilece (Pieri Menis, La scuele dai fornasîrs); i domande perentoriamentri che i regoli la cjavelade come che al coventave par che no lu ridessin (Meni Ucel, Cjavei)
   Sin. cjoli ator , cjoli vie , coionâ , mincjonâ , remenâ , ridi vie , sbefâ , sbefaçâ , sbufonâ , sorâ , menâ ator , zonzolâ
8. s.m. espression de bocje e mudament dal respîr par pandi sintiments e emozions, spec. la ligrie:  sintî il fevelâ de maestre, lis domandis dai fruts, chel cidin plen di spiete, ogni tant chel ridi di gust che al consolave (Pieri Menis, Sul agâr)
   Sin. cjoli ator , cjoli vie , menâ la viole , ridi fûr
   
   1. (fig.) sensazion di ligrie, di felicitât:  tal stomi l'è un ridi che mai nol à fin (Ugo Pellis, Al mandolâr)
9. s.m. espression de bocje cu lis spicis insù e, in câs, cui lavris a pene vierts che a lassin viodi i dincj:  la Lidie e partì, tal indoman, fasint di istès bocje di ridi. Un ridi scuasit gnervôs, frêt e cence sens (Maria Forte, Cjase di Dalban); il cjâf zirât a pene di profîl, e un ridi fent sui tiei lavris, e il barbuç adalt, come di une che e cjale il mont di parsore vie (Antescûr, Milonghe)
   Sin. bocje ridinte , bocje di ridi
10. s.m. (fig.) lusôr che al trindule:  la strade e fo dute un ridi di brilants jenfri i classuts (Maria Forte, La fortune di Folope)

Polirematichis e espressions idiomatichis

• bocje da ridi loc.s.f.
• bocje di ridi loc.s.f.
• butâle in ridi loc.v.
• butâle sul ridi loc.v.
• crepâ dal ridi loc.v.
• discuestâsi dal ridi loc.v.
• fâ bocje da ridi loc.v.
• fâ bocje di ridi loc.v.
• murî dal ridi loc.v.
• murî di ridi loc.v.
• par ridi loc.av., loc.adi.inv.
• ridi a plene panze loc.v.
• ridi daûr loc.v.
• ridi fûr loc.v.
• ridi in ghigne loc.v.
• ridi in muse loc.v.
• ridi parsore loc.v.
• ridi su la ghigne loc.v.
• ridi su la muse loc.v.
• sbregâsi di ridi loc.v.
• scjafoiâsi dal ridi loc.v.
• scjafoiâsi di ridi loc.v.
• sclopâ di ridi loc.v.
• vierzisi di ridi loc.v.
• vignî di ridi loc.v.

Proverbis:

• a ridi di vinars, si vai la domenie
• al rît ben cui che al rît l'ultin
• cui che al rît al reste ridût
• cui che al rît dai altris al rît di se
• cui che al rît di vinars al vai di domenie
• cui che al rît in zoventût al vai in veglece
• daspò dal ridi al ven il vaî
• i vedui il prin dì a vain, il secont se passin, il tierç se ridin
• il mont al è mâl scompartît: cui al vai e cui al rît
• il ridi al va a finîle cul vaî
• il stupit al fâs il mâl par ridi
• il test di Bertolt nol fale mai: cuant che al plûf lui al rît e cuant che al è soreli al vai
• l'ignorant al fâs il mâl par ridi
• la femine dal lari no rît simpri
• lis feminis dai laris des voltis a ridin, des voltis a vain
• no si po ridi ben co dal cûr no ven
• se si fâs carnevâl si à di ridi
• une nuviçute co a va a marît cu la bocje e vai e cul cûr e rît
• vuê si rît, doman si vai