Dizionari de Lenghe Furlane

barlumâ  bar|lu|mâ  [CO]

1. v.intr. fâsi viodi, soredut cuntune emission di lûs o colôr e soredut dal improvîs o in maniere indefinide:  suntun orli di amont dulà che cîl e mâr si tocjin barlumant (Dino Virgili, Friûl di Unviar); al veve cjaminât cidin fin alì, cui voi come viscjâts dai lens che a lavin in amôr. Un butâ fûr ancjemò timit e svoiât; a pene un barlumâ di flât vert intor dai ramaçs viulâts e scûrs (Maria Forte, Il tei)
   Cfr. lampâ , tarlupâ , lusî , cimiâ , lusignâ , risplendi , sflandorâ , slusî , slusicâ , slusignâ , lupâ , lampizâ
   
   1. (fig.) ancje di alc di astrat:  […] fâ che e barlumi la ipotesi di une tornade dal simbul dal Moviment Friûl te competizion eletorâl pal rinovament dal Consei regjonâl (Marc De Agostini, Adrian Cescje, Rispueste al editoriâl di Dree Valcic su La Patrie di Otubar 2012)
2. v.intr. viodi dal improvîs o in maniere no dal dut definide:  e cussì tu vâs indevant a cjalâti ator, di adalt, dulà che tu sês lât a metiti. Ti pâr adriture di barlumâ une femine che e cor crote pes stradis, ma a puedin sei dome tarlupulis. Ilusions (Raffaele Serafini, B123ST)
   Sin. lumâ , olmâ , vualmâ , calumâ , cjalâ iper. , viodi iper. , cucâ , lampâ , bampâ , vampâ