Dizionari de Lenghe Furlane

vualmâ  vual|mâ  [AF]

1. v.tr. rivâ a viodi, a individuâ cui voi, soredut di lontan, di scuindon, a la svelte, par câs o ben cuntun ciert sfuarç, cun atenzion, cun desideri e v.i.:  studiant il teren denant di se, al veve vualmât trê rus muarts a mieze strade viers il flum. A jerin lâts par aiar suntune mine (Agnul di Spere, Cjalant la rive); vualmâts cuatri di lôr a saltâ il mûr de sô braide, paron Bepo ju cjapâ par laris e, dispicjade la sclope, al scomençà a cori çueteant inviers di lôr (Alan Brusini, Il coragjo de sclope); le slicà [la panarie antighe] cu la cjarte di veri e i de di lustrifin. A Udin l'anticuari le vualmà subit cun voli seneôs (Carlo Sgorlon, Prime di sere)
   Sin. lumâ , cjalâ , lampâ , voglâ , calumâ , cucâ , viodi , lupâ , osservâ
   Var. olmâ
   Cfr. ocjâ , sberlocjâ , svoglitâ , voglitâ , travuardâ , lutâ
   
   1. (ancje ass.) indreçâ la cjalade di une cierte bande:  il maressial, imbotonât tal so impermeabil vert a dopli pet, al da ordins secs e precîs. Tal mieç de plaçute deserte di Rondul i siei voi sassins a vualmin a drete e a çampe (Alan Brusini, Par stradis lungjis)
2. v.tr. (fig.) rivâ a individuâ o a percepî, no dome cui voi:  o soi Strolic prudent e di bon nâs, / o vualmi la disgrazie e no la dîs: / e pâr plui bon co ven al improvîs (Pieri Çorut, Raspadicis pal Strolic furlan del an 1859); su chescj cantins si pues vualmâ une linie di continuitât, pûr inte diversitât dai timps e des sensibilitâts (Marc Stolf, Cooperazion teritoriâl, un avignî di fâ sù e une storie di no tradî)
   Sin. capî , cucâ , determinâ , viodi , sintî , ricognossi , cognossi , intraviodi , traviodi , notâ , acuarzisi , inacuarzisi , visâsi , intaiâsi , nasâ , osservâ