Dizionari de Lenghe Furlane

sintî  sin|tî  [FO]

1. v.tr. (ancje ass.) percepî un sun:  al veve sintût une vôs che lu clamave e une man si jere poiade su la sô spale (Franca Mainardis, Grivôr); Mirco al jere lât sul barcon. Si sintivin là jù insom i rusignûi, chês vôs sbalçarinis che si corevin daûr (Alan Brusini, Par stradis lungjis); Rico nol sint, tart di orele che al è; cussì jê i dîs al Vescul: «Nol sint chel alì ve, siôr, se no i berle te buse de orele» (Meni Ucel, La visite dal vescul)
   Sin. scoltâ
   Var. sentî
   
   1. dâ atenzion ai suns o aes peraulis che si percepissin:  «No tu ti vergognis» i à dit di adalt ae femine, marcant une da la une lis peraulis, «a disturbâ doi che a sintin musiche!» (Ivano Urli, La musiche); a rivarin in plêf i missionaris. E Gjelmin, par no jessi propit cjaviestri cuintri sô mari, al le a sintîju (Riedo Pup, I furlans e la confession)
      Sin. scoltâ
   2. par clamâ la atenzion di cui che al scolte:  "Sint, vuelistu un passaç par doman?" (Alan Brusini, Gian Paolo Linda, I forescj); "Ou, Pidins, ven achì un secont! Sint frut, tu tu âs numars. Dabon, no scherci […]" (Stiefin Morat, Donald dal Tiliment)
   3. savê, vignî a savê:  contimi di te, o soi seneose di sintî alc dal to viaç (Pieri Piçul, Vieri e gnûf)
2. v.tr. (ancje ass.) vê percezions fisichis:  al sintive il frêt jentrâi tai vues plui di prime (Carlo Sgorlon, Prime di sere); ce gust a sintî il soreli su la muse come une bussade (Dino Virgili, La aghe da pît la cleve)
   
   1. vê percezion di un odôr:  sint se bon odour che al sofla dal nustri paîs… Odour di fen e di erbis bagnadis, odour di fogolârs, odour che i sintivi di fantassin tornant dal cjamp (Pier Paolo Pasolini, I Turcs tal Friûl); ah, sint ce parfum che al à chest vin! (Stiefin Morat, Donald dal Tiliment)
   2. vê percezion di un savôr:  al parà jù un got davour chel âtri, cença sintî il gust dal vin (Novella Cantarutti, Barba Fodo e la muart); al sintì il mâr de bile a jemplâi la bocje (Amedeo Giacomini, Tal ospedâl)
   3. vê percezion di alc che si tocje:  al sintè la man da la femina poâsi viva su la sô spala (Novella Cantarutti, Il sâr Menon)
3. v.tr. fâsi dâ un parê, fâsi conseâ o lassâsi conseâ:  il tribunâl, te sô prime udience, al à decidût une robe sole: rinviâ dut al 27 di Mai par podê sintî, in chê epoche, il parê di un espert (Riedo Pup, Il furlan al jentre in tribunâl)
   Sin. scoltâ
4. v.tr. vê une percezion che e permet di capî o previodi:  in chel moment ducj sintirin che si cjatavin denant de creazion di un grant artist (Zuan Lurinçon, La Madalene); si jevave che i someave dut balarin. Al sintive che alc nol lave, nol lave, nol lave… (Maria Forte, "Nossent")
   Sin. nasâ , presintî , savê¹ , sintîsi , sintîse
   
   1. vê une percezion e comprension profonde in graciis di une cierte sensibilitât:  à capît inalora duta la belessa da sô tiara, à sintût duta la puisia che sta ta sani usansis dal popul (Ugo Pellis, Catinuta)
5. v.tr. vê un ciert sintiment o une cierte sensazion emotive:  [sot Pasche] il cristian nol po no sintî une ligrie, une gjonde tal fonts da la anime (Francesc Placerean, Crodi e mût di crodi); dentri al sintive une pôre vuarbe, disperade (Amedeo Giacomini, Tal ospedâl)
   Sin. vê
6. v.tr. vivi cun partecipazion un moment, une circostance:  lui al sintive e al pative ducj i moments di chês zornadis. Par lui, Pasche, prime che Resurezion, e jere Passion e e començave miercus sant (Riedo Pup, Zuan Gjeremie); se al ves podût cjacarâ par furlan forsit al sarès rivât adore a gjavâ fûr alc, par vie che realmentri al sintive la impuartance de fieste (Meni Ucel, Il discors)
   Sin. vivi
7. v.tr. vê e in câs mostrâ i efiets di alc:  pre Nocent si cjate a sei in vene di tabaiâ piês des feminis cuant che e sintin el timp (Arturo Feruglio, Viaç a Vignesie); jere gnervose e sfuarçade, a voltis strache e pegre; come se e ves sintût i striaments segrets de lune (Maria Forte, La tiere di Lansing)
   Sin. patî

Polirematichis e espressions idiomatichis

• sintîlis v.pron.

Proverbis:

• bisugne menâ il dint daûr la borse che si sint
• cui che al è strac nol sint i pulçs
• cui che al met il cûl sore la urtie al sint che i furmie
• cui che al mint la sô borse lu sint
• cui che al viôt, sint e tâs, al è segn che al vûl vivi in pâs
• cui che al viôt, sint e tâs, al vûl vivi in pâs
• dispès la bocje a spude fûr cemût che al judiche e che al sint il cûr
• ducj sint cu lis orelis
• i fruts ce che a sintin a ripetin
• la lune no sint il baiâ dai cjans
• nissun plui sort di cui che nol vûl sintî
• ognidun al sint cu lis sôs orelis
• par vê pâs sint e tâs
• passade la cjoche si sint la bote
• se pôc o sint, pôc o gjolt
• si da jù pai cerclis par che la dove e sinti
• sint prin di rispuindi
• sintî ducj e po fâ a so mût
• sintî e tasê