Dizionari de Lenghe Furlane

patî  pa|tî  [FO]

1. v.tr., v.intr. stâ mâl e sopuartâ cun soference, sedi tal fisic che tal spirt:  ancje i Clevis a jerin umign e sogjets a patî e a murî, come ducj (Dino Virgili, La aghe da pît la cleve); patî cjalt e freit e dutis li tempiestis dal seil, al è il nustri distin (Pier Paolo Pasolini, I Turcs tal Friûl)
   Sin. sufrî , penâ , sopuartâ
   
   1. vê fastidis economics:  in cjase di siore Lise no pativin. La Marceline e veve la sô paie e l'aiût dal guvier che al rivave tes cjasis come un salustri par nudrî la canaie (Maria Forte, Cjase di Dalban)
   2. v.tr. jessi obleât a sopuartâ alc di negatîf:  o volìn dome che la nestre int no torni a patî injustiziis e robariis come tai timps passâts (Tarcisio Venuti, La cjase di Toni); i operaris imigrâts a àn patît cundizions di lavôr che a levin simpri in piês (Matteo Ermacora, La emigrazion furlane in France 1820-1970)
2. v.intr., v.tr. vê une malatie, un probleme di salût, un sintom e v.i.:  e rivà de Basse une sô gnece par judâ la agne che e pative di venis tune gjambe (Maria Forte, Il tei); [tal bastiment] a 'ndi jere di malâts, di spaventâts, feminis incintis e la maiorance, sbalotade cussì, e pative il mâl di mâr (Pieri Menis, Chei di Muraie)
   Sin. vê
   
   1. v.tr. vê sensibilitât a ciertis cundizions:  personalmentri o soi un che al patìs frêt (Antoni Beline, Sant Jacum, là che al finìs il mont)
      Sin. sintî
3. v.intr., v.tr. vê dams, lâ in piês come cundizions:  si jere visât che lis rosutis a pativin, e che cul lôr cjavut bandonât a domandavin di bevi (Franca Mainardis, La liende dal riûl); cheste [largje fasse di planure] e jere la part de Furlanie che veve patît di plui par vie dai Ongjars: si viôt che in chei sîts al veve di sei restât dibot un desert (Josef Marchet, Cuintristorie dal Friûl fin sot la Italie); plovisine, bagne bagne, / e ti spiete la viole / che e à patît un pôc di sut (Pieri Çorut, La plovisine)
   
   1. v.intr. tacâ a lâ di mâl:  no stâ a lassâ fûr la salate, che e patìs
      Sin. laîsi
4. v.tr. sintî i efiets di alc:  daspò de sburtade de concorence orientâl, il setôr de industrie seriche al patì modifichis profondis in Italie (Adrian Cescje, Memoriis di politiche linguistiche); lis sôs contis e liendis [di Catarine Percude] a patissin un pôc dal program votcentesc di difondi tra lis popolazions urbanis e rurâls une leterature cun finalitâts educativis e patriotichis (Cristina Cescutti, Leterature furlane)
   Sin. sintî

Polirematichis e espressions idiomatichis

• finî di patî loc.v.

Proverbis:

• cent patìs par un
• cui che al mûr al finìs di patî
• cui che al patis al capìs
• cui che al sa patî al sa ancje vivi
• di chel mâl che si patìs, si perìs
• dulà che no je femine il puar al patìs
• gjoldi simpri fin che si po, no i mancje mai timp al patî
• la cjase o la parone e scuen patî
• miôr patî in compagnie che no di bessôi
• o la cjase o la parone e scuen patî
• se la lenghe e tâs, la panze e patìs
• spes l'inocent al patìs pal pecjadôr
• tasê, lavorâ, patî, preâ
• vivi trop al è patî trop