Dizionari de Lenghe Furlane

savê¹  sa|vê  [FO]

1. v.tr., v.intr. vê informazion, nozion, cognossince:  il predi al veve savût che siôr Dalban al jere daûr a murî (Maria Forte, Cjase di Dalban); al voleve savê il non dal autôr di chel cuadri antîc (Zuan Lurinçon, La Madalene); «Ecce homo», al dîs Rico, che al sa di latin a reson che al è stât par tancj agns a cjantâ Messe (Meni Ucel, La ombrene)
   
   1. vê cussience:  "O sai di vê un brut caratar, ce no… O soi come un fagot di strissinâ… Lu capìs di bessôl" (Maria Forte, Cjase di Dalban)
2. v.intr. (enf.) ancje dome par riclamâ la atenzion intant di un discors, o par tacâ o sierâ une afermazion:  "Sâstu, mame, il fi dal avocat Nicolin, îr, no mi lassave un moment… E mi diseve tancj di chei stupideçs" (Maria Forte, Cjase di Dalban); "[…] No soi mico vecjo come che al pâr, savêso. O ai dome cincuantedoi agns." (Carlo Sgorlon, Prime di sere); "[…] di frute, saial, un cjanat, chel dal muini, mi à muardût un talon e di chê volte i cjans mi fasin simpri pôre." (Pieri Somede dai Marcs, L'avocat e la luianie)
3. v.mod. cuntun altri verp tal infinît, al segne la capacitât di fâ alc:  la frute e vûl lavorâ, e ancje e sa lavorâ: e sa cusî, e sa fâ tantis bielis robutis (Josef Marchet, Lis predicjis dal muini); "Sâstu fevelâ todesc, tu?" (Alan Brusini, Amîs come prime); "[…] Il vuestri al è il mâl di doi che no san cjapâsi il caratar" (Maria Forte, Cjase di Dalban)
4. v.intr. vê un ciert odôr o savôr:  e dopo si lamentin se i cesarons a san di luvins e se il pomodoro e i cudumars a àn savôr di coce (Riedo Pup, I furlans e il timp); doi linzûi ruspis tant che la int dal paîs, ma nets, che a savevin di lave (Alan Brusini, Gian Paolo Linda, I forescj); des monts daûr e rivave a bugadis une buerisine che e saveve di bosc (Gianni Gregoricchio, Trê feminis)
   
   1. vê un ciert aspiet, stîl, atmosfere e v.i.:  chei vistiduts di lamé dorât… chês cotulutis curtis curtis che a savevin tant di Swinging London… (Checo Tam, Queen Anastasia); il gno non, Jole, i saveve di forest (Gianni Gregoricchio, Trê feminis)
5. v.intr. spec. in costruzions impersonâls, fâ vê un ciert pinsîr, suspiet, idee, impression e v.i.:  al è miôr che o ledin di une altre bande, che chi mi sa tant che e je int che nus fâs pierdi timp (Fabian Ros, Il lôf); ma cumò mi sa che a lis paie dutis, ah sì sì! (Carlo Tolazzi, La salamandrie tal fûc)
   Sin. dâ idee , puçâ , parê¹ , someâ

Polirematichis e espressions idiomatichis

• cui sa loc.inter., loc.av.
• cui sa ce loc.adi.indef., loc.pron.indef.
• cui sa cui loc.pron.
• cui sa mai loc.av.
• cui sa nuie loc.av.
• fâ savê loc.v.
• savê a grât loc.v.
• savê a memorie loc.v.
• savê a ments loc.v.
• savê ad a ments loc.v.
• savê agrât loc.v.
• savê bon loc.v.
• savê compuartâsi loc.v.
• savê di ce bande voltâsi loc.v.
• savê di ce bande zirâsi loc.v.
• savê di ce pît che un al va çuet loc.v.
• savê di letare e di conts loc.v.
• savê di strani loc.v.
• savê dulà che il diaul al ten la code loc.v.
• savê il cont so loc.v.
• savê il fat so loc.v.
• savê petenâ la code al diaul loc.v.
• savê une cjarte plui dal libri loc.v.
• savêle lungje loc.v.
• savênt un pont plui dal diaul loc.v.
• savênt une plui dal diaul loc.v.
• vignî a savê loc.v.

Proverbis:

• "se" e "ma" no san ce cumbinâ
• a cui che nol sa, chei altris i insegnin
• a san plui doi che no un
• a san plui il plevan e la massarie insiemi che no il plevan bessôl
• a san plui un dotôr e un vilan che no un dotôr sôl
• al è mâl savê ce che si vuadagne
• al è miôr mangjâ dut ce che si à che no dî dut ce che si sa
• al sa ben il signôr parcè che no ur à fat i dincj a lis 'savis
• al sa plui un mat a cjase sô che no un savi a cjase di altris
• amôr cence barufe al sa di mufe
• bêçs a son che nô no savìn,
• bisugne savê doprâ il len par nudrî la prole ben
• bisugne savê fâ il levan par vê bon pan
• ce che si sa, si fâs; ce che no si sa, si impare
• come il mâr al è il mont: cui che nol sa nadâ al va a fonts
• cualunche ignorant al sa mudâ ma pôcs savis a san miorâ
• cuant che il poç al è sut, si sa trop che e vâl la aghe
• cuant che il soreli al va a mont, la mignestre a sa di ont
• cuant che la fam e je a mieç il cîl, la polente a sa di mîl
• cuant che la femine e nas l'om al à di savê puartâ il fas
• cuant che la lodule e va in cîl, il pan di sorc al sa di mîl
• cuant che no si sa i fats, si lasse la surîs ai gjats
• cui che al à bêçs di no savê ce fâ, che si meti a litigâ o a fabricâ
• cui che al à bêçs di no savê ce fâ, che si meti in lît o a fabricâ
• cui che al à inventât la cjarte nol à savût dismetile
• cui che al dîs dut ce che al sa, al piert dut ce che al à
• cui che al è in sepulture al sa cui che al è muart
• cui che al lasse la strade viere pe gnove al sa ce che al lasse ma nol sa ce che al cjate
• cui che al pretint di savê plui, al sa mancul
• cui che al sa fâ al sa ancje comandâ
• cui che al sa fâ la cite al sa fâ ancje il mani
• cui che al sa patî al sa ancje vivi
• cui che al sa scuedi nol sa paiâ, cui che al sa paiâ nol sa scuedi
• cui che al vûl savê masse al sa di chel savôr che mi capîs
• cui che lis pense, lis sa
• cui che nol sa balâ che nol ledi su la fieste
• cui che nol sa che al tasi
• cui che nol sa che no si meti a balâ
• cui che nol sa comprâ che al compri zovin
• cui che nol sa fâ nol sa nancje comandâ
• cui che nol sa fenzi nol sa regnâ
• cui che nol sa lei la sô scriture al è un mus par nature
• cui che nol sa nuie nol vâl nuie
• cui che nol sa rispietâ nol è rispietât
• cui che nol sa sbassâsi a timp e lûc le finìs cul cjâf sbûs
• cui che nol sa scorteâ al vuaste la piel
• cui che nol sa vivi nol sa murî
• cui che plui al sa al à plui gust di imparâ
• cui che plui al sa mancul al sa
• dai cops injù tu sâs ancje tu, dai cops insù dome il Signôr
• daspò fat ognidun al sa fâ
• daûr vint ducj sa navigâ
• di chel len al è, di chel savôr al sa
• Diu al è un bon infant, al viôt e nol pant, al paie ducj e no si sa cuant
• Diu al sa ben parcè che no ur à fat i dincj ai crots
• domandâ al è mieç savê
• e je biele la cjase che e sa dai viei
• e je braùre ancje a savêsi mantignî in caratar
• e vûl fam par savê ce che al è bon
• fâ, savê fâ e dâle di intindi a son lis trê colonis dal mont
• fin che a son i dincj in bocje no si sa ce che nus tocje
• fin che un al à dincj in bocje nol sa ce che i tocje
• i bêçs bisugne savêju spindi
• i bogns che a vadin in paradîs in tiere no si sa ce fâ di lôr
• il diaul al sa plui par vieri che no par diaul
• il maridâsi al sa di ram
• il mont al è come che si sa cjapâlu
• il mont al è di cui che al sa cjapâlu
• il mont al è simpri biel par cui che lu sa cjoli
• il mont al è taront e a no savê nadâ si va a fonts
• il Signôr al è un grant infant: al paie no si sa cuant
• il Signôr al sa ce che al fâs
• il timp al ven par chel che al sa spietâ
• infin che si à dincj in bocje, no si sa ce che al tocje
• la creance bisugne savê doprâle cuant che e covente
• la lenghe no je mai strache se no sa di vacje
• la peraule che e scjampe e sa indulà che e va
• lasse che cui che al sa a ce fâ si distrighi
• lis feminis ind san un pont plui dal diaul
• lis robis de pignate lis sa dome che il tapon
• mancul al sa cui che plui al crôt di savê
• mancul si sa e plui ben si sta
• maridâsi sa di ram
• nissun nol nas cence savê
• nissun nol sa ce che e coste, dome chel che le paie
• nissun sa ce che al bol te cite di chei altris
• nissun sa ce che e coste la robe, nome cui che le paie
• nissun sa cetancj braçs di budiei che o vin te panze
• no bisugne mai dî ce che no si sa di ciert
• no si sa mai avonde
• no si sa tant lavorâ che la bocje tant mangjâ
• no si sa, e se si sa no si spie
• no spindi dut ce che si à ni dî dut ce che si sa
• no stâ muardi prin di savê se e je piere o pan
• no tu sâs il ben, se il mâl nol ven
• nol baste cognossi la creance, bisugne ancje savê doprâle
• nol baste vê bêçs, bisugne savê spindiju
• nol sarà mai om cui che nol sa comandâsi
• ogni mincjon al sa lâ pal biel timp
• ogni puar om, al sa lâ pal timp bon
• ognidun al è siôr se al sa contentâsi dal so stât
• ognidun sa di se e Diu sa di ducj
• par che al sedi bon il cafè a vuelin trê robis: cualitât, cuantitât e savêlu fâ
• par comandâ si à di savê fâ
• par podê ben comandâ, bisugne savê fâ
• pluitost di fâ savê dut ce che si sa, al è miôr mangjâ dut ce che si à
• savê pierdi par savê vuadagnâ
• se a disin par denant, si sa difindisi; se a disin par daûr, i disin al cûl
• se no tu vûs che lis sepin, fâs di mancul di fâlis
• se si vûl savê la zornade, si cjale la matine
• si dîs ce che si mangje e no ce che si sa
• si sa cemût che si nas ma no cemût che si mûr
• si sa de lade ma no de tornade
• si sa di lâ ma no di tornâ
• si sa dulà che si è, ma no dulà che si rive
• tant savê al è un grant merit, tant cjacarâ al è un grant difiet
• tes causis a vuelin trê robis: vê reson, savêle dî e cjatâ cui che le dedi
• tu sâs là che tu sês ma no là che tu larâs
• une robe si sa cemût che e scomence ma no cemût che e finìs