Dizionari de Lenghe Furlane

viodi  /-ó-/  vio|di  [FO]

1. v.tr. percepî cui voi, cul sens de viste, ancje cence intenzion e concentrazion precise:  a pene bonât soreli, si viôt tal cîl parsore chei trê dincj che e scusse Mont Cjanine un piçul pont neri, e un ucielut imburît come une clapade al ven jù (Catarine Percude, L'ucielut de Mont Cjanine); tal plan grant, e jere la citât: Udin, dal biel cjistiel! Si lu viodeve là jù di adalt dai cuei (Dino Virgili, La aghe da pît la cleve); une biele dì [Maletegne] al viôt tal bosc trê grandis magnis incolaçadis te plombe dal soreli (Andreina Nicoloso Ciceri, Maletegne - Racconti popolari friulani I)
   Var. vedê , jodi² , vedi
   Cfr. cjalâ , lumâ , olmâ , spiâ
   
   1. vê une vison, vê une percezion visive che no corispuint ae realtât obietive:  i viei a viodevin lis striis e lis aganis dapardut a stomi vueit (Tarcisio Venuti, La cjase di Toni)
2. v.tr. (ancje ass.) vê la facoltât de viste, ancje cu la specificazion de cualitât e precision di chest sens:  co no si viôt ben, siôr plevan, al tocje di puartâ i ocjâi (Josef Marchet, Lis predicjis dal muini)
3. v.tr. sei presints tant che spetatôr a un ciert avigniment:  o 'nd ai viodûts tancj di concierts di musiche medievâl cjase mê ma il public di Gjermanie al è une vore plui animôs di chel furlan! (Checo Tam, La maree nere); cui à la partide di balon tal cjâf, cui à la morose di puartâ ator su la jespe, cui à di lâ a viodi cualchi cine di ca o di là (Josef Marchet, Lis predicjis dal muini)
4. v.tr. incuintrâ, cjatâ cdn.:  nol voleve viodi sô mari ni vive ni muarte (Pieri Menis, Chei di Muraie); tancj a gji scrivevin che orevin viodila e cognossila (Ugo Pellis, Catinuta); tal festival de Unitât, Pino al ti cjate il Nin Clauet che al jere un pieçon che nol viodeve (Alan Brusini, Amîs come prime)
   Sin. cjatâ , incuintrâ
5. v.tr. cjapâ in esam:  une dì siore Chechine e veve puartât a viodi il document a un che al saveve (Maria Forte, Mabile la Lunghine)
   Sin. scrutinâ , cjalâ , stazâ
   
   1. lei, ancje in maniere superficiâl:  "Âstu let il gjornâl?" "O ai dome viodût i titui"
   2. lei in maniere atente par controlâ cun precision:  mi mendave lis mês traduzions di latin, mi insegnave la storie e la gjeografie, mi viodeve i compits di talian (Carlo Sgorlon, Il dolfin)
   3. visitâ:  e veve viodût il museu dal Louvre e chel dai impressioniscj (Carlo Sgorlon, Il dolfin); jo i davi ce che lui nol rivave a dâi: la discussion su la art, su la musiche, i viaçs a Passarian a viodi lis mostris di cuadris (Checo Tam, La maree nere)
6. v.tr. vivi di persone une esperience:  vô o sês zovin e se o vês timp a vivi a 'nd viodarês tantis in chest mont! (Pieri Menis, Sul agâr); jo o 'nd ai viodude une par dongje, e o sai ben ce che a son lis vueris (Carlo Sgorlon, Ombris tal infinît)
   Sin. cognossi , passâ , provâ , sperimentâ
7. v.tr. figurâsi cul pinsîr, cu la imagjinazion, alc di futûr o ipotetic o cul ricuart alc di passât:  za o viôt i titui dai gjornâi: "Investigadôr, si crôt une divinitât e al cope trê di lôr!" (Sandri Di Suald, Ah! la provincie); cuant che mi impensi o viôt ancjemò la tribune plene di siôrs e di sioris (Pieri Menis, Une letare par Bepo)
8. v.tr. fâ une prove, une verifiche, controlâ:  o vin scomençât inalore a esaminâ cualchi câs, dome par viodi cemût che si invie la discussion (Adrian Cescje, Memoriis di politiche linguistiche); al prove a muardi cui dincj la monede di arint par viodi se e je mate (Alan Brusini, Come tai romançs); anìn là di Sant Pieri, a viodi se cumò che al è vuardian dal paradîs a si ricuarde dai amîs vecjos (Luigi Gortani, Meni Fari)
   Sin. cjalâ , controlâ , scrutinâ
9. v.tr. zûcs (ancje ass.) intal poker, acetâ la zuiade e controlâ i ponts dal aversari
10. v.tr. inacuarzisi, constatâ, notâ:  a ogni edizion o viodìn che il festival al cres in cualitât e par numar di partecipants (ARLeF, Suns 2013); se o cjalìn la date di costruzion di cuatri di chescj palaçs a Glemone o viodìn che a son ducj avonde dongje e ator dal 1660 e dal 1760 (Rino Gubiani, Studi da la evoluzion dal paisaç mediant i toponims); a jerin soredut lavôrs che a vignivin finanziâts dal guvier canadês, che nus veve viodût cemût che o lavoravin (Oscar Puntel, Mario Collavino: une bandiere furlane parsore il gnûf World Trade Center di New York)
    Sin. cjatâ , inacuarzisi , visâsi , notâ
11. v.tr. vê une cierte considerazion, un ciert concet:  voaltris, nus disin, o viodês dut neri di ca dai confins e dut biel di là (Josef Marchet, Blestemis); a planc o jeri jentrât tal so afiet, e cussì cumò mi viodeve come un lari o un birbant che al leve vie, lassantlu di bessôl (Carlo Sgorlon, Il dolfin)
    Sin. considerâ , calcolâ , cjalâ
12. v.tr. cjatâsi che cdn. o alc si cjate intune cierte situazion, ancje cun subiet astrat o inanimât:  valevie la pene che i vecjos a fasessin tancj sacrificis par viodi cumò la cjase vueide? (Roman Michelot, La cjase dai contents); al varès podût vivi fintremai che Ricardo al fos deventât grant e lât a la universitât. Salacor lu varès viodût deventâ un miedi, un inzegnîr o un professôr famôs (Carlo Sgorlon, Prime di sere); il Cinccent […] al viôt un cambiament sostanziâl par ce che al inten l'ûs de lenghe furlane scrite che e disparìs des cjartis pratichis (Cristina Cescutti, Leterature furlane)
13. v.tr. (enf.) dispès cun funzion enfatiche, tal imperatîf o in formis interogativis, par riclamâ la atenzion:  mestri Cole, viodêso, al voleve vê une Italie intune altre maniere (Dino Virgili, La aghe da pît la cleve); "Par cheste reson, viodistu, ce che ti proponìn nô al va ben par ducj" (Gianni Gregoricchio, Trê feminis); "Viodêt mo, Nart: jo e la frute o vin fevelât e o vin decidût di dâus une rispueste daurman…" (Roberto Ongaro, Cretevierte)
    Sin. savê¹ , cjalâ
14. v.tr. ocupâsi di alc, impegnâsi par rivâ a un fin:  "Sì, sì, cuietiti! O viodarai jo ce che si po fâ, no stâ vê pôre…" (Roberto Ongaro, Il muc); al covente che […] si viodi di meti dongje une azion istituzionâl coordenade (Adrian Cescje, Memoriis di politiche linguistiche)
    Sin. cirî , cjalâ , fâ in maniere di , fâ in mût di , provâ
    
    1. ancje, plui o mancul enfatic, par formâ une cualsisei espression di comant, esortazion e v.i., ancje par cuvierzi cheste funzion in verps che no àn imperatîf o che a àn un imperatîf pôc doprât:  viôt di telefonâ a pene che tu rivis, eh (Riedo Pup, I voi dai pilotis); viôt di doprâ judizi, sâstu? (Zuan Nazzi Matalon, Ottorino Burelli, Sacheburache); «Cjo mo» i disè «e prin di jessi, viôt di cuvierziti ben, che al è un crût…» (Pieri Menis, Il «pigjama»); Carlut, met vie ben tal scansel i tiei libris, viôt di jessi un bon frut (Pieri Somede dai Marcs, Resurezion a Pontinie)
    2. stâ atent, vê prudence, misure, creance e v.i.:  "Viôt cemût che tu cjacaris, supierbeose di une estrosate…" (Pieri Piçul, Vieri e gnûf)
       Sin. badâ , cjalâ
    3. cjapâsi une responsabilitât, fâ o decidi ce fâ, cemût reagjî e sim.:  "O sin lâts convignûts che al sarès vignût doman di sere, daspò cene. Cumò viôt tu ce che tu âs di dîi. Par gno cont, nol è mâl om" (Roberto Ongaro, Cretevierte); "Ve mo, parone, jo us ai dit ce che o savevi e o ai fat ce che o podevi, cumò viodêt vô!" (Roberto Ongaro, Il muc)
       Sin. pensâ , rangjâsi , fâ
15. v.intr. vê cure di cdn. o di alc:  o vevin di viodi dal nestri frut parcè che dispès al veve mâl di cuel e fieradis (Mario Beltramini, Jo e Graziella); e fogolave dute la matine e po in cjarie jù a puartâ di gustâ tal cjamp; e viodi des bestiis, e lavâ e netâ e sestâ par cjase (Dino Virgili, La division); siôr Bepo al viodeve ancje de filande di so pari (Alan Brusini, Come tai romançs)
    Sin. stâ daûr
16. v.intr. controlâ in ce cundizions, situazion, ativitât e v.i. che al è alc o cdn.:  i spirts a tornin a viodi des lôr cjasis là che chei di famee a àn di vêur prontât aghe, par vie che i muarts a àn sêt di vite, e la aghe e je vite (Sandri Carrozzo, Il miluç de magne); "Sta cidin, tu!" I ordenà Fonso. "Va cjase a viodi de tô femine, pitost! […] Si è fate sbati ancje di Meni […]" (Amedeo Giacomini, Tal ospedâl)
17. v.intr. fâ in mût di cjatâ:  tantis corsis, tantis oris passadis a spietâ di fûr di chês pocjis fabrichis che a vevin tornât a vierzi, par viodi di un lavôr (Roberto Ongaro, Il muc)
    Sin. cirî , cjatâ , cumbinâ
18. s.m.sing. judizi, pont di viste:  la nestre patrie e je la tiere de int che si à; e je la int de nestre istesse lenghe, dal nestri sanc, dal nestri viodi (Alviero Negro, Int di masnade); lis mês pôris si son sfantadis cu la prime votazion, che e je stade informâl, orientative, che e je risultade pal gno viodi plui buine di ce che o vevi pensât (Adrian Cescje, Memoriis di politiche linguistiche)

Polirematichis e espressions idiomatichis

• a viodi ben loc.av.
• a voli viodint loc.av.
• fâle viodi loc.v.
• fâsi viodi loc.v.
• mût di viodi loc.s.m.
• no viodi la ore loc.v.
• vê a ce viodi loc.v.
• viodi clâr loc.v.
• viodi cui siei voi loc.v.
• viodi di biel voli loc.v.
• viodi di bon voli loc.v.
• viodi di brut voli loc.v.
• viodi di lontan loc.v.
• viodi dopli loc.v.
• viodi dut colôr di rose loc.v.
• viodi dut in rose loc.v.
• viodi dut neri loc.v.
• viodi dut rose loc.v.
• viodi l'orcul loc.v.
• viodi la cape malcuinçade loc.v.
• viodi la cape malsestade loc.v.
• viodi la cape maltaiade loc.v.
• viodi la fin loc.v.
• viodi moscjis par cjavai loc.v.
• viodi neri loc.v.
• viodi neri denant dai voi loc.v.
• viodi neri denant i voi loc.v.
• viodi neri devant dai voi loc.v.
• viodi neri devant i voi loc.v.
• viodile brute loc.v.
• viodile peloche loc.v.
• viodile pelose loc.v.
• viodût che loc.coniun.

Proverbis:

• a viodin plui cuatri voi che no doi
• campagne tante che si po viodi, cjase tante di stâ a sotet
• ce che si viôt no si po scuindi
• cjace che no si viôt e je cjace mate
• cuant che tu viodis il lôf, no stâ lâ a cirî la ferade
• cuatri voi a viodin plui di doi
• cui che al viôt, sint e tâs, al è segn che al vûl vivi in pâs
• cui che al viôt, sint e tâs, al vûl vivi in pâs
• cui che i falin tal dî il credo tal batiâlu al viôt lis striis
• daspò viodût ducj a son mestris
• daspò viodût ducj sa conseâ
• Diu al è un bon infant, al viôt e nol pant, al paie ducj e no si sa cuant
• Diu al viôt e al proviôt
• ducj à gust di viodi mats in place ma no dai siei
• dulà che tu viodis cinise tu disis che al è stât il fûc
• fra l'amôr e il fum no si viôt nancje la lum
• grant sant che al è sant jude, pecjât che in chest mont si lasse viodi di râr
• i gjenitôrs no vuelin viodi mai i difiets de lôr prole
• i spaurôs a viodin il diaul plui neri di chel che al è
• il diaul co al viôt la crôs al scjampe
• il fum si viôt dulà che a fasin fûc
• il mulinâr al met il Signôr difûr par che nol viodi ce che al fâs dentri
• lis robis fatis di gnot, si lis viôt di dì
• no bisugne impaçâsi dai fats dai altris che si à avonde di viodi dai siei
• no mai fâ un mûr se si viôt un clap cu la ponte infûr
• no si da al mont un vuarp plui grant di chel che nol vûl viodi
• o cuete o crude il fûc le à viodude
• ognidun al viôt cui siei voi
• par cognossi il biel, bisugne viodi il brut
• passûts che si è, nissun nol ven a viodi ce che si à te panze
• prin viôt se tu âs la cjamese sporcje po scuintiije a di chei altris
• se si lavore tal carnevâl piçul, si viôt madracs piçui; se si lavore tal carnevâl grant, si viôt madracs grancj
• se tu mangjis luvins e tu ti voltis indaûr tu viodarâs cualchidun a mangjâ lis scussis
• si viôt di vidiel ce che al devente bo