Dizionari de Lenghe Furlane

pensâ  pen|sâ  [FO]

1. v.intr., v.tr. doprâ la ment, sedi in assolût, sedi dedicant la atenzion a alc di specific:  pensâ, pesâ, calcolâ, prin di fevelâ - a racomandavin i vecjos (Riedo Pup, I furlans e il fevelâ); Laurinç al pensave a chê dì, aes ultimis oris prin di partî. Al pensave cjalant fûr tal scûr, lis ultimis oris cun jê, e lis oris de sere prin. Lis pocjis oris cun jê: la sere, la gnot, la matine (Agnul di Spere, In viaç di domenie); chei che a tegnin dûr a pensâ la unitât di Mazzini o dal Manzoni […] o dal Fas Litori, a àn reson di vê pôre e di fâ profeziis apocalitichis; il lôr idul al è dut carulât (Josef Marchet, Chê biade unitât)
   
   1. v.tr. produsi un pinsîr, une idee e v.i.:  "Mi pâr che nome un cjâf come il vuestri al podeve pensâ un complot di chê sorte" (Roberto Ongaro, Il muc); pensâ lis soluzions razionâls di un probleme (Adrian Cescje, Viaç aes origjins dal Logos)
      Sin. ideâ , concepî , cjatâ
      Cfr. previodi
2. v.intr. ocupâsi di cdn. o di alc, badâi:  il conformist cence ideis e interès, che al pense dome che a fâ bêçs (Amedeo Giacomini, Tal ospedâl); "Ce ti interessial, pense ai tiei fats […]" (Pieri Somede dai Marcs, Ursule); "Pense a fâ il to dovê, tu" (Gianni Gregoricchio, Trê feminis)
   Sin. viodi , badâ , cjalâ , tignî cont , proviodi
   
   1. jessi in pinsîr, vê preocupazion:  dopo un mês e scrivè di Milan che no pensassin par jê. E veve cjatât lavôr, e steve ben, e vuadagnave (Pieri Menis, Destins)
      Sin. pinsirâ , preocupâsi
3. v.tr. vê une idee, une opinion, un progjet, une intenzion e v.i.:  Cavedalis al pensave che, stant che lis fuarcis austriachis a jerin ancjemò in moviment, al sarès stât il câs di butâ un puint di barcjis sul flum, puartâsi su chê altre spuinde e tentâ une azion ofensive (Giovanni Pillinini, Zuan Batiste Cavedalis - Une vite esemplâr); i miei gjenitôrs a pensin che il lavôr e je la prime robe te vite (AAVV, Sul florî); al pensà di metisi di bessôl, di vierzi un "studi fotografic" (Lucio Perès, Il mâl dal mûr); vô lu vês simpri pensât un sant, ma sant nol jere! (Luciano Rocco, La foghere)
   Sin. calcolâ , considerâ
4. v.tr. par moderâ une declarazion, fasint capî che e je dome une opinion personâl o une pussibilitât di confermâ:  "[…] cheste vore [la Storie de art in Friûl] puedie judâ i furlans a jessi cussients de lôr identitât?" "O pensi di sì, ancje par vie che si scuvierzin lis nestris lidrîs cu la lenghe dal popul. […]" (Erika Adami, O ai scrit pal gno popul)
   Sin. crodi , calcolâ , scrupulâ

Polirematichis e espressions idiomatichis

• mût di pensâ loc.s.m.
• pensâ parsore loc.v.
• pensâ sore loc.v.
• pensâ sù loc.v.
• pensâi parsore loc.v.
• pensâi sore loc.v.
• pensâi sù loc.v.

Proverbis:

• a pensâ mâl, no si fale mai
• a pensâ mâl, tropis voltis si induvine
• al devente ce che Diu al vûl e no ce che il diaul al pense
• bisugne pensâ prin di dî e prin di fâ
• bisugne pensâ prin, par no pintîsi daspò
• cjacarâ cence pensâ al è come trai cence smicjâ
• cui che al è plui in alt nol pense che al po colà
• cui che al è usât a fâ il mâl, lu pense
• cui che al è usât a fâlis, lis pense
• cui che al fevele trop, al pense pôc
• cui che al mormore al pense di vê reson
• cui che lis pense lis fâs, cui che lis fâs lis pense
• cui che lis pense, lis sa
• di ogni dì al ven Nadâl e di martars Carnevâl, di joibe a ven la Sense: a son ducj mats cui che le pense
• fate la leç, pensade la malizie
• fate la leç, pensât l'ingjan
• intant che si pense ai fats dai altris, si dismentee i siei
• mâl si fâs, mâl si pense
• no je mai fate la leç che pensât nol sei l'ingjan
• no si pense mai a dutis lis peraulis che si dîs
• ognidun che al pensi par se
• ognidun le pense a so mût
• pense prin par no pintîti daspò
• pense vuê par doman
• prin di fâ e di dî bisugne pensâ ce che al po vignî
• se Zenâr nol zenare e Fevrâr nol fevrare, Març mâl al fâs e mâl al pense