Dizionari de Lenghe Furlane

crodi  /-ó-/  cro|di  [FO]

1. v.tr. pensâ che alc al sedi vêr o probabil o pussibil:  o vin viodût che al è un grant interès dal mont de scuele e o crodìn che lis copiis a laran esauridis tun pâr di mês (Erika Adami, Il zûc de ocje in lenghe); nol varès mai crodût di rivâ a di chel pont (Maria Forte, Mabile la Lunghine); il pitôr, crodint di vê denant un pussibil acuirent, di front ai compliments dal zovin al à tirât fûr ducj i cuadris plui bruts, par cirî di vendijai (Cristina Noacco, Faliscjis)
   Sin. calcolâ , judicâ , presumi , prossumâ , ritignî , suponi , tignî , pensâ
   
   1. vê une cierte impression:  e crôt di gnot di viodi in sun al so prin e unic amôr (Ugo Pellis, Catinuta)
   2. massime in costruzions negativis, acetâ la realtât di alc:  no si rassegnavin inmò a crodi ae disgracie (Lucio Perès, Gno barbe Sisto)
   3. in diviersis espressions enfatichis, par riclamâ la atenzion o rimarcâ:  Ce crodistu? Che no sedi visade che ancje tu tu âs in asse chê puare frute? (Gianni Gregoricchio, Trê feminis); pûs crodi se in altris planets a puedin evolvisi aliens identics a nô… mi ven di ridi! (Checo Tam, Spazio 1999)
2. v.intr., v.tr. vê fiducie, fede in alc o in cdn.:  al capive che ancje se al ves dineât, nissun no i varès crodût (Roberto Ongaro, Il muc); al veve dite la veretât, ma no lu crodevin
   
   1. vê fede, jessi convints de esistence di Diu o di un jessi sorenaturâl:  noaltris o crodìn parcè che o sin testemonis che Crist al è resurît dai muarts (Francesc Placerean, Crist resurît al colme dute la sperance dal om)
   2. vê convinzion, sigurece:  une robe e je sigure, al pensà Laurinç: chei a crodin in ce che a fasin, e no ur mancje cûr e fiât (Agnul di Spere, In viaç di domenie)
3. v.tr. ancje ass., pensâ che alc al sedi ben:  po ben fâs tu ce che tu crodis, Lise. Ordene il lavôr a cualchidun (Maria Forte, Cjase di Dalban)
   Sin. calcolâ , judicâ , presumi , prossumâ , ritignî , suponi , tignî , stimâ , pensâ
4. v.tr. vê une cierte opinion, fâ une cierte valutazion:  la jurie, li che no crodi valevul nissun dai lavôrs presentâts, e pues decidi di no dâ un o plui dai premis previodûts (Fabian Ros, Concors par tescj cinematografics in lenghe furlane)
   Sin. calcolâ , judicâ , presumi , prossumâ , ritignî , suponi , tignî , stimâ , pensâ

Polirematichis e espressions idiomatichis

• di no crodi loc.av., loc.adi.inv., loc.inter.
• fâ crodi che il Signôr al sei muart di frêt loc.v.

Proverbis:

• a bêçs e a santitât, crodii par metât
• a cui che al crôt, diu al proviôt
• a cui che al zure, crodii pôc; a cui che al sperzure, crodii nuie
• a fâ chel che no si devi, al ven chel che no si credi
• al bausâr no si po crodii nancje il vêr
• al bausâr no si po crodii nancje la veretât
• al è mâl tant crodi dut che no crodi nuie
• al sta il jeur là che mancul si crôt
• crodii a ducj e no fidâsi di nissun
• cualchi volte si crôt di jessi a cjaval e no si è nancje a mus
• cuant che si crôt di jessi a cjaval, no si è nancje su la stafe
• cuant che si crôt di là un pas indenant, si va doi indaûr
• cuant che si crôt di ripiâsi, e je chê volte che si è su la code dal mus
• cui che al crôt di fâje al Signôr, se fâs par se
• cui che al crôt di fâure a chei altris, se fâs par se
• cui che no i crôt al Signôr i crôt al diaul
• cui che nol crôt ai sants al crôt ai miracui
• cui che nol fâs bausiis nol crôt nissun bausâr
• cui che nol prove nol crôt
• dulà che si crôt di insegnâsi tropis voltis si svuarbisi
• i passûts a crodin che no ur vegni plui fam
• il bausâr nol è crodût nancje cuant che al dîs il vêr
• il bon al crôt ducj bogns, il trist al crôt ducj compagns di lui
• il diaul al sta là che mancul si crôt
• il jeur al sta là che mancul si crôt
• il passût al crôt che no i vegni mai plui fam
• il passût no i crôt al zun ni il san al malât
• il san no i crôt al malât
• intal crodi va biel planc
• lagrimuçs di femine, sudôr di cjaval e vaî di plevan nol è di crodi, che al è dut ingjan
• mancul al sa cui che plui al crôt di savê
• no si crôt se no si prove
• no stâ crodii a lis aparencis
• no stâ crodiur mai a chei che a àn politiche sporcje
• ognidun al crôt ce che al desidere
• panze plene no i crôt a panze vueide
• se il maridâ si crodès, il mont si disfarès
• se no tu i crodis a dinissun, tu sês ruvinât
• se tu ur crodis a ducj tu restis burlât
• si crôt che il maridâsi al sedi un zughet e invezit al è un intric maladet
• si crôt di jessi a cjaval e no si è nancje a mus
• si crôt plui facil il mâl che no il ben
• si crôt simpri ce che si brame
• un biel viodi al fâs bon crodi