Dizionari de Lenghe Furlane

concepî  con|ce|pî  [AF]

1. v.tr. di femine o di mascje di animâl, tacâ e puartâ indevant la formazion e il svilup di un embrion in consecuence de fecondazion:  i jets fats di sclofis a àn sostignude la fadie di zornadis duris di vore. Li parsore a son stâts concepîts i fruts, li a son muarts i nestris vecjos (Angelo Floramo, Des Americhis par continuâ une magjie cun lidrîs profondis)
   Sin. cjapâ sù
   Cfr. comprâ
2. v.tr. produsi o struturâ intune cierte maniere un pinsîr, une idee, un progjet e v.i.:  par concepî e meti in vore une politiche linguistiche serie, al covente di jessi cussients che une lenghe e je un imprest par cognossi il mont (Xavier Lamuela, Une riflession su lis politichis linguistichis); intant che al concepive chescj pinsîrs, no i passave nancje pal cjâf che, vuere o no vuere, il so odi pal muc nol veve nuie ce fâ cu la patrie, ma al jere nome un svindic personâl (Roberto Ongaro, Il muc)
   Sin. imagjinâ , pensâ , progjetâ
   
   1. considerâ intune cierte maniere:  la antighe mnemotecniche e concepive il ricuardâ tant che une ativitât psicomotorie (Mario Turello, Il brevet); il messaç religjôs ebraic di salvece al jere distant dal mût di concepî il mont e l'om dai Elens (Adrian Cescje, Viaç aes origjins dal Logos)
   2. spec. in espressions negativis, fâ jentrâ intune categorie mentâl e capî:  che a sedin i sorestants de glesie responsabii di chestis esclusions, o stenti a concepîlu (Roman Michelot, La Bibie pal popul)
      Sin. capî