Dizionari de Lenghe Furlane

capî  ca|pî  [FO]

1. v.tr. ancje ass., rivâ a vê comprension, intindiment, cognossince:  capî une lezion; capî une regule di matematiche; o vin di cirî di capî dulà che o lin noaltris furlans, daspò il taramot de crisi (Dree Valcic, Indevant cu la nestre muse, cence simiotâ); nome pensant sul so passât l'om al po capî il so jessi presint e scrupulâ sul so avignî (Gian Carlo Menis, Pre Checo e la storie); a butavin vie il salam. Dopo o vin capît che a jerin musulmans (Angelo Floramo, Cuintristorie dal Nûfcent 1970-1980); la fede no capìs; e crôt cence capî (Francesc Placerean, Cuant che a un popul i gjavin la sô lenghe in glesie, al è pront par jessi soterât); si capissii i agns [ae cjase antighe] dal mût che a son metûts adun i mûrs cun chei modons lizêrs tai antîi, e un braç di trâf che al ten sù il volt dai barcons e des puartis (Dino Virgili, Cjase Basse)
   Sin. comprendi , crodi , rivâ a capî
   
   1. dispès si dopre in maniere interietive, par rompi il discors, riclamâ atenzion, dâ enfasi e v.i.:  jo e te, capissistu, bisugne che discorìn plui clâr sâstu (Costantino Smaniotto, Co l'amôr al cimie); atente, Ulive, di no dâ bêçs cence che ti lassi alc di neri sul blanc, …tu mi capissis no mo? … E no stâ dâi plui di doi mil par cumò (Maria Forte, La tiere di Lansing)
   2. ancje in forme pronominâl cun "le", par sontintindi un complement obiet gjeneric o za sclarît, dispès in espressions enfatichis:  se tu vuelis capîle, bon, se di no, rangjiti; il Friûl se no si lu drece noaltris, nol è pericul che nissun altri si scomponi a dreçâlu. Cetantis indi vuelino a capîle? (Josef Marchet, Preambul rusin)
2. v.tr. vê competence passive di une lenghe:  la lenghe furlane e je fevelade regolarmentri dal 57,2% dai abitants. Un altri 20,3% al fevele par furlan dome ogni tant e lu capìs, e cuasi la stesse percentuâl (19,9%) no lu fevele ma lu capìs (Linda Picco, Ricercje su la condizion sociolenghistiche dal furlan)
3. v.tr. vê une intese profonde cun cdn.:  almancul che o ves dongje di me cui che al sa capîmi (Pieri Somede dai Marcs, Vilie di Nadâl (teatri))
4. v.tr. vê indulgjence, compassion:  jo ti capìs, ma no stâ a fâ plui cussì (Angelo Covazzi, A confessâsi); o vês di capîmi frutats, cun tancj spions che a zirin in dì di vuê, nô no podìn permetisi di sei dolçs di cûr (Roberto Ongaro, Il muc)
   Sin. scusâ
5. v.tr., v.intr. rivâ a vê comprension detaiade e a preseâ il significât profont, il spirt di une opare, di un artist, di un fat e v.i.:  al è un studiât, un che al capìs di leterature, di poesie
   Sin. comprendi , intindi , preseâ , sintî
6. v.tr. (fig.) in espressions negativis, stâ intune cierte situazion o a risintî di une cierte cundizion:  si volìn ben. Cun me no patirà, ancje se no soi un paur come lôr. I miei braçs no capissin la sflacje (Maria Forte, L'aventari pal barcon)
7. v.intr. [LE, FÛ] stâ dentri, jessi contignût:  e a pont cu li cinc oris i vignii / a cjasa e tant alegri i mi sintivi / che inta la propria piel jo no capivi (Eusebi Stele, La crudeltât, la tirania di Amôr)

Polirematichis e espressions idiomatichis

• capî il vanzeli loc.v.
• capî la antifone loc.v.
• capîle v.pron.
• si capìs loc.inter.

Proverbis:

• cui che al patis al capìs
• cui che al vûl savê masse al sa di chel savôr che mi capîs
• cui no le capìs, cui nol vûl capîle e cui fâs di no capîle
• dai tu mari, capìs tu brût
• i muts no si po capîju
• la plui grande fadie e je di fâje intindi a cui che nol vûl capîle
• la sience e spieghe i fats, la fede ju capìs
• lei e no capî al come trai e no maçâ
• se no si capìs che si à di volêsi ben in chest mont, no si capìs ce che si è vignûts a fâ
• si dîs a fie par che la brût e capissi