Dizionari de Lenghe Furlane

stâ daûr    [FO]

1. loc.v. (ancje fig.) jessi daûr o dopo di cdn. o di alc:  un om alt e scûr, zovin, stant daûr des primis filis de int, tignint un revolvar in alt parsore dal cjâf, al sbarave doi colps (Agnul di Spere, Te grande place)
   
   1. mantignîsi dongje di cdn. o di alc che al va indenant:  jes fûr; traviarsa la aga a mieza gjamba. Spessea: ma la fruta plui granda no pol stâgji daûr: "Cor Menia" sberla la mari: "cor che se no si neìn!" (Federigo Comelli, Il me paîs); la zovine e lave, slungjant il pas par stâi daûr a di chel dal compagn (Gianni Gregoricchio, Îr e doman)
      Sin. lâ daûr , tignî daûr
   2. mantignîsi fis, concentrât, indreçât su cdn. o su alc:  di drete a çampe, dal alt al bas [li âfs] e 'simiavin cun tante furie, che il voli nol podeve stâur daûr (Catarine Percude, Lis âfs)
      Sin. lâ daûr , tignî daûr
2. loc.v. jessi presint e impuartant, tant che cause, tant che agjent, tant che essence sot di un aspiet superficiâl e v.i.:  nol podeve fâ di mancul di secondâ la corint demagogjiche che e stave daûr di dutis chês decisions (Giovanni Pillinini, Zuan Batiste Cavedalis - Une vite esemplâr); lant a viodi i progjets che a stan daûr dai doi coretôrs a vegnin in lûs dôs filosofiis disferentis (Ricart Urban, Il mestri eletronic)
3. loc.v. rivâ a capî cun atenzion un messaç, il davuelzisi di un resonament, di une dinamiche e v.i.:  nol veve propit nissune voie di stâi daûr ae lezion. Al sintive la vôs de mestre a fevelâ da la Italie ma il so cûr nol ritignive nuie (Pieri Menis, Sul agâr); e jere sentade devant de television, ma nancje no rivave adore di stâi daûr, piardude tai siei pinsîrs (Jolanda Mazzon, Di là de rêt)
   Sin. lâ daûr , scoltâ , stâ atent , tignî daûr
4. loc.v. vê cure di cdn. o di alc:  e lavorave intai cjamps de agne e i stave daûr ai fîs (Gianni Gregoricchio, Trê feminis); ur stave daûr a lis âfs, lui, che al ûl dâi sot e fâ faturis par vê un costrut di lôr (Alviero Negro, Lis âfs di Min); Menie e stave daûr ai lavôrs cence sintî la fadie (Maria Forte, La fie çuete)
   Sin. viodi , stâ sot , tignî a ments , tignî di voli , cjalâ , dâ abade , abadâ , badâ , tignî daûr
   Cfr. tignî , guviernâ , regolâ , tignî cont
   
   1. sodisfâ cdn. che al à bisugne di un servizi, di un lavôr, di atenzion e v.i.:  nol podeve stâ daûr ai clients e po chei a scomençavin a srarîsi (Lucio Perès, Il mâl dal mûr)
5. loc.v. stâ atent e impegnâsi par che cdn. al fasi alc:  "Tu, tu sì, che no tu sês bon di fâti ubidî ne dai mestris ne dai lavorents, che no tu sês bon di stâur daûr…" (Ercole Carletti, Mariute)
   Sin. stâ sot
6. loc.v. ubidî, rispietâ, meti in vore e v.i. une regule, un precet, une istruzion e v.i.:  "No 'ndi pierdês une di ocasion, voaltris framassons e liberâi par meti a mâl la religjon di Crist, par discreditâ chei puars predis che a stan daûr al Vanzeli cun umiltât…" (Alviero Negro, Int di masnade)
   Sin. lâ daûr , tignî daûr
7. loc.v. vê e mostrâ interès sentimentâl o sessuâl par cdn.:  dîs che ducj i stan daûr / tentin ducj di inamorâle: / ducj oressin il so cûr: / ducj domandin di sposâle (Pieri Çorut, La volp no ûl ceriesis); Milio i stave daûr ae Taresie, e al lave a cjatâle in cjase (Meni Ucel, Culumie)
   Sin. vignî daûr , lâ daûr , stâ sot
8. loc.v. in costruzions cun "a" e un infinît, par rindi une azion continuade:  chê altre dì, che al jere chel timpat, o stavi daûr a scuadrâ il len par un pâr di dalminis (Josef Marchet, Lis predicjis dal muini)
   Sin. jessi daûr
   Cfr. stâ , jessi¹

Components:

• daûr av., prep., adi.inv., s.m.sing., s.m.inv.
• stâ v.intr.