provâ
pro|vâ
[FO]
-
v.tr.
someti a control un imprest, un materiâl e v.i. par cognossi lis cualitâts e lis proprietâts o par verificâ se al funzione ben:
- Vincjecinc francs!? - Bidin dai Bas al tornà a tucâ lis buculis, a bati i rais - a sunavin! -, al tornà a provâlu [il cjaruç] doi pas, po al pensà che ju valeve ben, sì, chei bêçs (Dino Virgili, Il cjaruç dai Bas);
al provà la biciclete. No che e fos masse lizere, ma in sumis e lave vonde ben (Carlo Sgorlon, Prime di sere)
Cfr. misurâ
, sintî
, testâ
-
misurâ vistîts, scarpis e v.i.. par viodi se al va ben, se al sta ben intor e v.i.:
Barbure […] tune buteghe e meteve sù, par provâle, une viestute turchine clare, ben setade sore il so cuarp (Agnul di Spere, Spietant)
Sin. misurâ
-
tacâ a mangjâ o bevi par sintî il savôr:
"Che al provi chest formadi di malghe!" (Roberto Ongaro, Cretevierte)
Sin. cerçâ
, sintî
-
v.tr.
(ancje ass.)
fâ une o plui provis par meti sù un spetacul, une manifestazion publiche, e v.i.:
lis compagniis filodramatichis di solit a provavin tes canonichis, o tes aulis o tai spazis plui grancj des scuelis, tant che lis palestris (Bepi Agostinis, Storie e cronistorie dal teatri in Friûl)
-
v.tr.
(ancje ass.)
meti impegn par fâ alc, spec. cence vê la sigurece di rivâ:
o ai provât a sopuartâle, a dâi dut il gno cûr, ma o ai capît che al è dibant (Maria Forte, Cjase di Dalban);
o ai provât a dîjal, dotôr, ma nol è stât nie di fâ (Gianfranco Pellegrini, Fenomenologjiis de disrealizazion mediatiche);
pal lavôr i disè di provâ cuntun ciert marangon, un vieli che si lamentave simpri di no rivâ pardut di bessôl (Carlo Sgorlon, Prime di sere)
Sin. cirî
, tentâ
-
v.tr.
mostrâ cun dâts sigûrs la veretât di une afermazion o la realtât di un fat:
un scandul grant se al vignarà provât (Riedo Pup, O un scherç o un scandul)
-
v.tr.
vê une sensazion, un sintiment:
la contessa Eleonora che veva provât un grant dolôr e che no gji da plui un solt da vita (Ugo Pellis, Catinuta);
al provave dentri vie come une gjonde stranie di frut (Pieri Menis, Sul agâr);
o ai provât un strenziment cussì fuart di cûr come che fos stade propit une cjosse vere (Pieri Somede dai Marcs, Mame…)
Sin. vê
, sintî
-
v.tr.
(ancje ass.)
vê a ce fâ di persone, fâ esperience:
no vino provât avonde ce che e je la vuere? (Pieri Menis, Sul agâr);
cumò che o vin provât ce che a pesin e ce che a valin tancj popui e sarès ore di doprâ un altri lengaç plui onest (Josef Marchet, Cumò che o savìn…);
miôr stâi lontans, o varessis di provâju, chei là! (Alan Brusini, Come tai romançs)
Sin. viodi
, vivi
Polirematichis e espressions idiomatichis
Proverbis:
- a provâ nol è pecjât
- cui che al à provât il mâl al considere
- cui che al vûl provâ lis penis dal infier che al fasi di Istât il fari e il cjaradôr di Invier
- cui che nol prove nol crôt
- l'aur si provilu tal fûc, la amistât te necessitât
- no si crôt se no si prove