Dizionari de Lenghe Furlane

tentâ  ten|tâ  [FO]

1. v.tr. (ancje ass.) metisi a fâ alc ancje cence la sigurece di rivâ a un bon risultât:  i professôrs dal ospedâl a varessin tentât di operâle se lui, gno nono, si cjapave la responsabilitât (Pieri Menis, Il cuader de none); tentavin cualchi peraulute dolce se, par cumbinazion o par calcul, capitavin insiemi un zovin e une zovine (Zuan Lurinçon, La Madalene); un vecjo miedi plen di dûl, che si ingropà a viodi chê puare famee dispierdude e al tentà dut il so savê par vuarî la frute (Maria Forte, Cjase di Dalban); ce isal di fâ? Jo o varès une rispueste; o le tenti e voaltris cjapaitle come il parê di un che al po sbaliâ (Francesc Placerean, Pe unitât di glesie in Friûl)
   Sin. riscjâ , provâ
   
   1. impegnâsi par otignî un ciert risultât, ancje se al è dificil:  «A son rescj di barbariis chês», i àn dit al plevan che al veve tentât di conservâ chês antigaiis, e cussì dut al è lât pierdût o distrut (Pieri Menis, Lis leiendis di Buie); si jere inacuarte subit di ce raze di lazarons che a jerin i zinars, e veve tentât di vierzi i voi a lis fiis, ma lôr no le vevin scoltade (Carlo Sgorlon, Prime di sere)
      Sin. provâ , cirî , procurâ , viodi
2. v.tr. [CO] te morâl cristiane, sburtâ al pecjât:  al jere il diaul che al tentave Jesù tal desert (Pieri Somede dai Marcs, Sant Simon: 28 di Otubar 1917); Lile, che jo soi un Diaul tu vâs disint, / jo doncje come Diaul ti ai di tentâ (Ermes di Colorêt, II, 96)
3. v.tr. [CO] fâ vignî voie:  al ven e nus tente / odôr di polente (Enrico Fruch, La cort di Catine)
   Sin. atrai , becâ , bisiâ , clamâ dongje , cuziâ , fâ la bielevoie , fâ voie , invoiâ , riclamâ , stuzigâ , tirâ , tirâ dongje , tiziâ , trucâ² , uçâ

Proverbis:

• la fortune e jude cui che le tente