Dizionari de Lenghe Furlane

riscjâ  ris|cjâ  [FO]

1. v.tr. (ancje ass.) lâ dongje di un pericul o di une pussibilitât negative:  ancje «Chei dal '64»… A vevin patît, riscjât, ancje lôr, ce no! Chê di metisi cuintri de autoritât, cuintri de leç, cuintri di Diu… (Dino Virgili, La aghe da pît la cleve); difûr al neveave e, par tornâ sul tart, a riscjavin di ribaltâsi cu la machine che e slitave sul glaçât (Alan Brusini, Par stradis lungjis); par vie - juste a pont - de mancjade stabilizazion, si riscje di pierdi par simpri, come che al è za sucedût e al continue a sucedi, il personâl sientific plui preparât (Donato Toffoli, Relazion dal Grup di lavôr "Planificazion linguistiche")
   Sin. lâ a pericul , periculâ
   Var. risiâ¹
   
   1. meti in pericul:  i comandants - i scriveve so pari - a capissin nome la lôr: par cjapâ une culine a son bogns come nuie di riscjâ un zovin (Riedo Pup, Dreute)
      Sin. zuiâ
   2. (iron., antifr.) meti o lâ dongje di une pussibilitât positive:  o viodarês che il tignî dûr, come che al diseve il vanzeli, al riscje di salvâ la nestre vite (Francesc Placerean, La glesie di Aquilee e je stade une mari che nus à fats nassi e cressi come popul)
2. v.tr. fâ alc che al pues jessi pericolôs o che al pues no lâ ben:  une patulie todescje e rivà fin a Ontegnan par cirî cjavai che ur vevin robât. Si fermà cu lis metraiis suntune alture de ferade, ma l'uficiâl che le comandave, al riscjà il so pas, bessôl, fin a Vile (Maria Forte, La Madone de Pâs); par culture di imprese si intint une disponibilitât e une capacitât a fâ imprese, a riscjâ l'invistiment cuant che lis cundizions favorevulis a esistin (Adrian Cescje, Liniis di storie sociâl e economiche dal Friûl 1500 - 1800)
   Sin. olsâ , provâ , riscjâsi , tentâ
   
   1. dî o comunicâ alc che al pues ancje jessi tasût, o che al va a pericul di jessi refudât o di produsi un efiet negatîf:  la Ulive e pensà ancje che, in chel an, soredut, al scugnive vignî par vie dal afâr di sierâ, ma di chel no riscjà peraule (Maria Forte, La tiere di Lansing); si podarès cuasi riscjâ une propueste: conseâ i letôrs delicâts di fâ il contrari di ce che a stan fasint: invezit di nissun gjornâl, leint invezit une vore (Riedo Pup, Il partît dai zovins coscrits)
      Sin. butâ , olsâ
3. v.tr. lâ dongje de pussibilitât di fâ o di sucedi:  come sudit fedêl o pues garantî di no vê mai nancje riscjât di pensâ a fâi cuintri ae legjitime autoritât (Alviero Negro, Int di masnade)
   Sin. lâ a pericul , lâ dongje

Polirematichis e espressions idiomatichis

• riscjâ grues loc.v.
• riscjâ une brute cjarte loc.v.
• riscjâle gruesse loc.v.

Proverbis:

• bisugne riscjâ se si vûl roseâ
• nuie nol riscje cui che nol à ce pierdi
• riscjâ un pôc par no pierdi dut
• tra il vieli e il novel si riscje di lassâ la piel