Dizionari de Lenghe Furlane

riclamâ  ri|cla|mâ  [AF]

1. v.tr. [BF] clamâ cdn. di gnûf o plui voltis, o, ancje cence ripetizion, clamâ o fâ tornâ, ancje cence ripetizion, cdn. che al è lontan:  il pape al veve denunziât lis tratativis che Rotgaut al tignive par riclamâ Adalgjîs e par solevâ i duchis che si vevin sometûts a Carli (Sandri Carrozzo, Rotgaut e la politiche furlane langobarde)
   Var. reclamâ
2. v.tr. clamâ une altre volte in servizi militâr cdn. che al jere in congjêt o in licence:  propit in chê sere, rivant a cjase, Matie al cjapà une cartuline colôr rose. Al jere riclamât (Pieri Menis, Sul agâr)
   
   1. clamâ a fâ il servizi militâr pe prime volte un coscrit:  cuant che e sclopà la vuere, cundut che al ves dîs fis e un so frut al fos za stât riclamât, al domandà di lâ sot, volontari (Lucio Perès, Vigji il vuardian)
      Cfr. clamâ sot
3. v.tr. [TS] venat. (ancje ass.) di uciel o dispositîf, fâ in mût che si svicinin uciei, di mût che a puedin jessi cjapâts
4. v.tr. di cdn. o ancje di alc, causâ interès, in particolâr svicinâ visitadôrs o clients interessâts:  l'orloi dal municipi al riclame simpri tante intone e dopo che des barconetis a àn sfilât lis statuis dai sants ducj a batin lis mans (Checo Tam, Praghe, "mater urbium")
5. v.tr. (fig.) fâ che cdn. si visi di alc o di cdn.:  la liturgjie che o stin fasint e riclame chê robe chi. E riclame prin di dut il fat che Crist al è resurît (Francesc Placerean, Crist resurît al colme dute la sperance dal om)
   Sin. visâ , ricuardâ
   
   1. fâ riferiment a cdn. o a alc intun discors, intun test e v.i.:  intal scrit si riclame une operazion matematiche di sume di valôrs finîts di une grandece fisiche in istants di timp definîts (Lorenzo Marcolini, L'articul di Einstein dal 1905 sul efiet fotoeletric. Un lavôr plurilengâl voltât in lenghe furlane)
      Sin. rimandâ , riferîsi
   2. fâ vignî iniment par someance, afinitât, relazion logjiche, derivazion e v.i.:  la claretât de aghe mi riclame la bielece origjinarie de creazion (Antoni Beline, Sant Jacum, là che al finìs il mont)
      Sin. ricuardâ , rivocâ , rimandâ
6. v.tr. (fig.) racomandâ di tignî une cierte maniere di compuartâsi, censurâ compuartaments negatîfs:  Carli Pataf, conseîr comunâl, al veve in consei il vizi di spudâ. Si voltave viers çampe e plaf, une spudade daûr chê altre, saldo tal stes puest. Alore il sindic, dopo vêlu riclamât une vore di voltis, al fâs meti sul puest une spudacjere (Alan Brusini, Amîs come prime)
7. v.tr. domandâ che si rispieti un dirit o une prerogative, pretindi che si cjapi un proviodiment:  ca no l'è il lûc di fevelâvi di Godwin e del so progjet, che riclamà un gnôf pat sociâl (Federigo Comelli, Il me paîs); riclamâ dirits in presince di situazions societariis falimentârs (Renzo Balzan, La Argjentine no je in licuidazion)
   
   1. v.intr. protestâ cuintri dal fat che no sedin stâts rispietâts dirits, prerogativis, nivei di cualitât, tiermins di servizi e v.i.