rimandâ
ri|man|dâ
[AF]
-
v.tr.
[BF]
mandâ une altre volte, mandâ di gnûf
-
mandâ indaûr:
po daurman e tachin lis cjampanis / de lis vilis vicinis e lontanis, / e rimandin i monts / lis danzis che si sunin pai defonts (Pieri Çorut, La gnot dei muarts);
int cul permès scjadût o personis che a àn scontât penis detentivis in preson e no àn lis cjartis in regule par jessi rimandadis tai lôr paîs parcè che i lôr consolâts no ju identifichin (Walter Tomada, Une vie furlane par frontâ la imigrazion)
Cfr. ribati
, rifleti
, rivocâ
-
v.tr.
decidi di fâ alc dopo, destinâ a di un altri moment:
la autonomie speciâl dal Friûl, cuntune scuse cualuncue e vignive rimandade sine die (Josef Marchet, E se no nus dassin la autonomie);
la int, sul lavôr, e bat la sflacje, che e à il vizi di rivâ tart e partî adore, che e sta ben atente a no fâ vuê ce che e po rimandâ a doman (Riedo Pup, La sflacje e merte un premi)
Sin. prorogâ
, intardâ
, inzornâ
, posponi
, sprolungjâ
, rimeti
-
v.intr.
(fig.)
riferîsi a alc, soredut a un argoment, a un contignût, a une idee, vê elements che a fasin pensâ a alc altri, che a mostrin la influence di alc altri:
une division setenarie che e rimande ai siet dîs de creazion (Mario Turello, Il brevet);
musichis strambis, suns che a rimandin a altris culturis (Oscar Puntel, I sucès musicâi des lenghis mancul pandudis);
il so non al rimande al tiermin latin "paedia" e a chel grêc antîc "paideia" (ducj i doi cul significât di "educazion") (Marc Stolf, Une idee pe promozion dal dialic e de vite in famee)
Sin. riclamâ
-
v.tr.
segnalâ di lâ a confrontâ un riferiment:
[cualchidun] al à vût il coragjo di dî e di ripeti che il taramot al jere un cjastì di Diu. Jo lu varès rimandât al Vecjo Testament, al libri di Jop (Francesc Placerean, Nadâl nus fâs capî che la storie e je plui profonde e biele di chel che e somee);
riferiments ancjemò plui vieris a vegnin dal Vocabolario Friulano di Giorgio Faggin, che però […] al rimande di frico a fricò: frico, sm. > fricò. fricò, (pl. fricôs), sm. (Sandri Carrozzo, Frico un plat furlan cuntun non di origjin foreste)
-
v.tr.
[TS]
scol.
valutâ che un arlêf al à risultâts insuficients intune o in cualchi materie e fâi fâ i esams di riparazion:
lu vevin rimandât in matematiche