Dizionari de Lenghe Furlane

slungjâ  slun|gjâ  [FO]

1. v.tr. fâ deventâ plui lunc, incressi in lungjece:  a i saltà sù al vecju da slungjâ il palaç e al clamà li femini a puartâ cjalcina e savalon par fâ malta (Novella Cantarutti, Paron Salvadi); la liste si podarès slungjâle, ma chest nol menarès dongje ponts gnûfs pal nestri studi (Zorç Cadorin, Cualchi ipotesi sul furlan di prin di scrivilu)
2. v.tr. fâ someâ plui lunc:  scarpis neris e lucidis, cuntun tac alt e solit […]. Scarpis che ti slungjin lis gjambis come par magjie, e ducj si zirin a cjalâti (Antescûr, Milonghe)
3. v.tr. distindi o movi alc o une part dal cuarp in mût che e rivi plui lontan:  lui al slungjà une man, e ancje se jê e fasè il mot di ritirâsi, istès al strenzè une des sôs (Gianni Gregoricchio, Trê feminis); si sentave plui comut e al slungjave i braçs sul scritori (Alan Brusini, Gian Paolo Linda, I forescj)
   Sin. distindi , distirâ
   
   1. (ancje fig.) indreçâ di une cierte bande:  mai un che al slungji il voli di là dai confins di cheste Italie par rindisi cont des veris cundizions politichis di chês pocjis nazions che a mantegnin ancjemò un guvier acentrât (Josef Marchet, La gnespule malmadure)
4. v.tr. fâ durâ di plui, incressi in durade di timp:  Març al screave rosutis e al slungjave zornadis (Alan Brusini, Come tai romançs); chê fede i slungjave la vite e i dave une gnove fuarce di movisi (Maria Forte, Cjase di Dalban); il plevan le à fate lungje, al à slungjade la novene cu lis litaniis dai Sants (Pieri Somede dai Marcs, Il prossim)
   Sin. intardâ , sprolungjâ
5. v.tr. proietâ une ombre, une forme, une lûs e v.i.:  il soreli al leve a mont slungjant lis ombris dai morârs tal mieç de stradele che e someave une lungje scjale (Pieri Menis, Sul agâr)
6. v.tr. zontâ un licuit, par solit aghe, par fâ deventâ mancul penze o fisse une sostance o par fâ che e vedi plui volum:  Momi vûstu fermâti a gustâ cun nô, […] slungjarìn la mignestre e dividarìn il companadi, a la buine sâstu (Pieri Somede dai Marcs, Un pugn di moscjis)
   Sin. inagâ , taiâ , zontâ
   
   1. ancje riferît a cualsisei sostance, no dome licuide, messedâ une altre dentri par che e sedi di plui o par fâi cjapâ altris carateristichis:  a levin cun chê miserie di zeuts a masanâ cuatri, cinc pesenâi di blave, messedant parmìs ancje i cosui dai fasûi e un doi civons, par slungjâ la farine (Josef Cjargnel, La farine dal diaul)
7. v.tr. dâ, svicinâ alc a cdn. par che al puedi cjapâlu:  al veve gjavât di sachete un tocut di cjocolate e me e veve slungjade (Gianni Gregoricchio, Trê feminis); al strucjà il vin te tace e jal slungjà a Rosute (Dino Virgili, La aghe da pît la cleve); Ricardo i tignive sù il cjadin e i slungjave il suieman ogni volte che al ocoreve (Carlo Sgorlon, Prime di sere)
   Sin. dâ fûr , meti fûr , scuarzi , svicinâ , ufrî
   
   1. paiâ:  o ai tirât sù il locâl, sistemade la cusine, o ai bataiât a lunc prime cuintri di lui, un tegnôs che nol slungjave un craizar (Alan Brusini, Gian Paolo Linda, I forescj)
8. v.tr. dâ cun fuarce:  a fasin un fastidi dal diaul e une grande voie di slungjâur une pidade (Josef Marchet, Lis predicjis dal muini); mi tire ancje a ciment tant che cualchi volte i slungji un pataf (Pieri Piçul, Vieri e gnûf)

Polirematichis e espressions idiomatichis

• slungjâ il brût loc.v.
• slungjâ il cuel loc.v.
• slungjâ il nâs loc.v.
• slungjâ il pas loc.v.
• slungjâ la man loc.v.
• slungjâ lis mans loc.v.

Proverbis:

• ni messe ni blave no slungjin la strade