Dizionari de Lenghe Furlane

distirâ  dis|ti|râ  [AF]

1. v.tr. meti intune posizion slungjade o vierte:  a stissa il fouc, a met a boi / il lat, a distira tai bârs / li intimelis blancjis, i ninsôi (Pier Paolo Pasolini, Viers Pordenon e il mont); Chichirichi, un grispin di om, saltarin come un zupet, al judave, par pôcs carantans, a picjâ tai ramaçs lis scjaipulis cui riclams, e a distirâ alte la rêt, ator, ator (Maria Forte, Cjase di Dalban)
   Sin. distindi , slungjâ , slumbriâ
   Cfr. slumbriâ , tirâ , tindi , slargjâ , vierzi , displeâ
   
   1. fâ che une part dal cuarp e sedi drete inte sô lungjece:  il cjaradôr si moveve indadiât e infurmiât come se al stentàs a distirâ un braç, une gjambe (Dino Virgili, La aghe da pît la cleve)
   2. (fig.) ancje di plantis, figuris e altri, vê parts che si slungjin come braçs o gjambis:  lis plantis da lis vîts a distiravin i ramaçs ancjemò crots (Franca Mainardis, Grivôr)
   3. someti un muscul a une trazion par slungjâlu, fâi cjapâ elasticitât e v.i.
   4. (ancje fig.) fâ pierdi tension, fâ rilassâ:  nol veve sium. No che al fos imboreçât. Anzit, dopo che al jere restât di bessôl, une calme gaiose i veve distirâts i gnarfs (Gianni Gregoricchio, Lilie)
2. v.tr. meti pognet cdn.:  la int e jere rivade a interessâsi dal so om, a distirâlu sul jet, a tocjâi il pols, a vistîlu cu la mude di fieste, a butâ, su lis boris, macetuts di ulîf par corompi l'aiar (Maria Forte, La aghe dal Ariul)
3. v.tr. (fig.) fâ colâ par tiere cuntun sburt, un colp e v.i.:  e un scapelot di lire / i mole a man radrose e lu distire (Pieri Çorut, Promissio boni viri est obbligatio); viodint sô sûr che e molzeve, a sec i da un sburton che la distire sot de vacje. «Brute strie! Dulà isal il testament?» (Pieri Menis, Il testament)
   Sin. butâ jù
   
   1. (pop.) fâ murî:  par une sole peraule disditade che lui al veve cjapât come ofese grande. Lu veve distirât sec cuntune curtissade (Maria Forte, La tiere di Lansing); Narduti, robât un Mauser […] si meteve a ogni scûr di lune su la curve dal Incassar […] o sul stradon ret la Beorcje e cuntun colp al distirave un muc (Alan Brusini, Come tai romançs)
      Sin. copâ , sassinâ , dispicjâ , tirâ jù di spese
4. v.tr. fâ in maniere che alc al formi un strât larc e fin:  distirâ cul mescul l'impast fin a otignî une sfueade sutile (Erika Adami, Tortei di patatis cun miluçs, formadi salât di Denemonç e semencis di cevole)
   Sin. slumbriâ , slungjâ , distindi , tirâ
5. v.tr. fâ che alc al deventi lunc intal timp:  pre Scjefin al distire un pôc masse il so sermon (Josef Marchet, Lis predicjis dal muini)
   Sin. slungjâ , slumbriâ

Polirematichis e espressions idiomatichis

• distirâ i vues loc.v.
• distirâ la sflacje loc.v.