Dizionari de Lenghe Furlane

tirâ dongje    [FO]

1. loc.v. cjapâ e movi in mût di svicinâ:  a planc al tire dongje il fogolâr altris doi cjadreons… e al si torne a sentâ (Pieri Somede dai Marcs, Gnot di Nadâl)
   Sin. tirâ incà
   
   1. soredut di une puarte, di un barcon e v.i., fâ in mût che il passaç al sedi sierât o scuasi sierât:  za che tu sês in pîts, fâs il plasê di tirâ dongje chê mostre di puarte (Josef Marchet, Lis predicjis dal muini)
      Cfr. sierâ dongje
2. loc.v. fâ vignî dongje, fâ stâ dongje, ancje condividint un interès, un fin, coordenant une ativitât e v.i.:  il perît al veve sudât siet cjamesis par tirâju dongje [i erêts] (Pieri Menis, Destins); o tiravi dongje un grop di frutats e ur insegnavi a fâ cualchi biele comedie (Pieri Somede dai Marcs, In teatro)
   Sin. svicinâ , dâ dongje
3. loc.v. racuei:  vie pe setemane, pai cjamps a crevâ, pai prâts a tirâ dongje altiûl o te torbere a meti a sotet lis ultimis gricis, si sintive che a cjantavin (Pieri Menis, Une cotule pal dì de sagre); a lui no i puçave il lavôr. Al diseve simpri che al jere nassût cui cai tes mans. Cussì al sclapà lens, al tirà dongje fueis, al butà in jeche ca e là pes fameis (Maria Forte, "Nossent")
   Sin. meti dongje , dâ dongje , tirâ sù , cjapâ sù
   
   1. preparâ o meti insiemi:  cussì, tirâts dongje chei cuatri grabatui e le a vivi in citât cul fi (Pieri Somede dai Marcs, Cun pocje spese…)
   2. ancje di alc di imateriâl:  cun dute la gracie che al veve rivât a tirâ dongje, al veve fevelât de propueste a Odile (Franca Mainardis, Il sium di Lissandri)
4. loc.v. rivâ a otignî:  nol jere stât facil tirâ dongje une clientele intun paîs che nol jere il so (Carlo Sgorlon, Prime di sere); [il paron] i domandà clâr e tont, di paiâ, jê i fasè savê che no veve cun ce e che no saveve nancje cemût fâ par tirâ dongje chei francs che i doveve (Roberto Ongaro, Il muc)
   Sin. cjapâ , cjoli , tirâ sù , cuistâ , dâ dongje
5. loc.v. leâsi intune relazion amorose o matrimoniâl:  cuant che al à capît pardabon ce raze di femine che al veve tirât dongje le ripudie (Mainardo Benardelli, In viaç sui confins de tiere splendint)
   Sin. metisi , compagnâsi , dâsi dongje , tirâsi dongje
6. loc.v. vê un fi:  cu la vita che a faseva da un peç incà, da dâsi via a ducj, da butâsi da randala come un clap di masera: a veva tirât dongja inmò doi canais garps e maldirets, nudrîts come che a podeva (Novella Cantarutti, Torero)
   Cfr. cjapâ sù
7. loc.v. causâ, produsi un efiet, une consecuence, fâ capitâ e v.i.:  sì, al po capitâ che une ore scure e disditade e tiri dongje il destin (Maria Forte, La tiere di Lansing); pinsîrs che a tirin dongje altris: sui sintiments, sul volê ben, su la pâs, sul uman che al ven fûr penç e plen di judizi de culture popolâr (Celso Macôr, Jentrade a Sacheburache)
   Cfr. tirâ daûr , tirâsi daûr

Components:

• dongje av., prep., adi.inv.
• tirâ v.tr., v.intr.

Proverbis:

• a brusâ patùs, si tire dongje cimis
• se si podès filâ ducj i fîi, si tirarès dongje ancje lis telis di ragn