Dizionari de Lenghe Furlane

dâsi dongje    [AF]

1. loc.v. di plui elements, materiâi o imateriâi, svicinâsi, cjatâsi o jessi insiemi:  ogni dì dopo gustât, si devin dongje un cjap di feminis (Pieri Menis, Sot il puarti); e sunave la cjampane e ducj i «vicins» si davin dongje sot il tei a tratâ in libertât e paritât i lôr afârs (Dino Virgili, La aghe da pît la cleve); al è chest un dai elements che biel planc si dan dongje tal pinsîr telinian par definî in mût graduâl une vision li che il Friûl, dongje di chês altris tieris individuadis di plui linguiscj tant che ladinis, al è ricognossût tant che comunitât nazionâl (Donato Toffoli, Lidrîs pal pinsîr autonomist)
   Sin. dâsi adun , riunîsi , cjatâsi , tirâsi adun , tirâsi dongje
2. loc.v. lâ un plui dongje di chel altri o tirâ dongje i propris elements cul risultât di jessi plui fis, di cjapâ mancul puest:  si podeve viodi la lungje code di int che e rivave, man a man e si dave dongje tant che un fol di armoniche cuant che si siere te ultime sfladade (Roberto Ongaro, Cretevierte)
3. loc.v. jessi o tacâ a jessi intune relazion sentimentâl o sessuâl:  al è lât in Americhe e si è dât dongje cuntune spagnole (Federico Vicario, I verbi analitici in friulano)
   Sin. metisi , compagnâsi , tirâsi dongje
4. loc.v. unîsi o coordenâsi cuntun altri element, materiâl o imateriâl, soredut par une cierte finalitât, cuntune cierte armonie:  lis provinciis che a vuelin, al fin di valorizâ la coesion teritoriâl, sociâl e economiche de comunitât regjonâl, a puedin dâsi dongje e consociâsi par puartâ indenant cun plui profit il coordenament, l'indreçament e la progjetazion pe tutele e pe valorizazion de identitât linguistiche e culturâl (Antoni Beline, Di ca e di là de aghe); la Republiche di Vignesie si cjate denant di une coalizion di stâts che si son dâts dongje inte Leghe di Cambrai (Carli Pup, Il Friûl de Joibe Grasse dal 1511)
   Sin. dâsi adun , unîsi , associâsi , cumbinâsi , organizâsi
5. loc.v. di alc che al è o che in cualchi maniere si pues calcolâ componût di plui elements o detais, tacâ a esisti, cjapâ consistence:  intant, un timp plen di sconfuart si dave dongje (Maria Forte, "Nossent"); al sintive a dâsi dongje un temporâl, une tampieste (Pieri Menis, Chei di Muraie); tal so cjâf al lave dantsi dongje dut il dissen infernâl che il malvivent al veve studiât (Roberto Ongaro, Cretevierte)
   Sin. dâsi adun
   Cfr. inmaneâsi , infissîsi , distacâsi , imbastîsi
6. loc.v. lâ a vore tun puest, tune dite e v.i., insiemi cun altris:  undis, dodis agns, Min si da dongje ae fornâs di Nardon a Terençan (Ivano Urli, Storie di Min)
7. loc.v. fâ alc par se:  brave come che e jere di cusî, si dave dongje, simpri, cualchi vistît par lâ a balâ (Maria Forte, La fie çuete)
   Sin. fâsi

Components:

• dâsi v.pron.tr., v.pron.intr.
• dongje av., prep., adi.inv.