Dizionari de Lenghe Furlane

dâsi  dâ|si  [FO]

1. v.pron.tr., v.pron.intr. cu la plui part dai significâts di dâ, ma cun azion indreçade a se stes, a une part di se stes, a alc che si à intor o un cul altri:  la scuele e il lavôr lu tignivin impegnât une vore e Marilde le viodeve di domenie: un premi che si deve di bessôl (Alan Brusini, Par stradis lungjis); dâsi di bevi un cul altri; morôs e morose a àn cjatât la fate di dîsi dôs peraulinis la sere e dâsi une cjarinade tal cuel (Dino Virgili, La aghe da pît la cleve); dâsi patafs; ancjemò un pôc che a barufavin e si devin; co lôr doi si scuintravin, al jere come assisti al dâsi di doi cjastrons (Gianni Gregoricchio, Trê feminis); dâsi conseis tra amîs; invezit di pensâ a rimedeâle, si sta a cuistionâ, a dâsi la colpe un cul altri (Josef Marchet, Lis predicjis dal muini); par dâsi sperance al restave simpri il sium de pâs (Roberto Ongaro, Il muc); dâsi fastidi un cul altri; [il CIRF] al varès vût di dâ atuazion a chel pont de leç istitutive de Universitât che le impegnave a dâsi l'obietîf "di contribuî al progrès civîl, sociâl e ae rinassite economiche dal Friûl […]" (Adrian Cescje, Memoriis di politiche linguistiche); l'invît ai guviers di dâsi legjislazions e regolaments bogns par ricognossi la avualitât di dutis lis culturis (Marc Stolf, La Cjarte di Strasburc dal 1981. Une Risoluzion "storiche" e ancjemò di atualitât); il fat di vê cjapât une strade par une altre lu veve ingnervosît fûr di misure, e par dâsi une bonade al veve fermât l'automobil a ôr de strade blancje (Franca Mainardis, Grivôr); dâsi une vôs; Odile e veve scugnût rindisi a lâ abàs e a domandâ a Mine, se e indulà, al fos stât pussibil di dâsi une lavade cristiane, in chê cjase cussì grande e cussì scomude (Franca Mainardis, Il sium di Lissandri); a jentrin dantsi une palpade ae massanghe daûr il cûl - par sigurece (Dino Virgili, La aghe da pît la cleve); Sant Pieri e Sant Pauli / si davin dal tu, / a fumavin la pipe, / a corevin là sù (Zuan Nazzi Matalon, Ottorino Burelli, Sacheburache); par chel si dave dal stupit ancje di piês, cirint di ricuardâ a se stes che al veve cuarantecinc agns, che al jere maridât e che la stagjon dai ingrisui su la piel e jere passade (Franca Mainardis, Il sium di Lissandri); viodìn ce che al dîs il miedi, ma di cemût che o stoi, mi doi par vuarît; dâsi informazions; si son inviâts par lâ a durmî, cence nancje dâsi la buine gnot (Pieri Menis, A uciei cu lis archetis)
2. v.pron.tr. risiervâ alc par se:  ogni tant bisugne dâsi un contentin
3. v.pron.intr. acetâ di vê rapuarts sessuâi cun cdn.:  [voaltris siôrs] o vais a sfogâsi sul paion di cualchi puare che si da par bisugne…! (Alviero Negro, Int di masnade)
   Sin. molâsi , dâsi vie
4. v.pron.intr. cjapâ une cierte ande, pensâ intune cierte maniere:  se si vûl meti / un pôc di atîf / bisugne dâsi / al positîf (Guido Antonioli, Florean dal Palaç, I, 1)
5. v.pron.intr. impegnâsi, tacâ a fâ alc:  alora si derin a vogâ a trê rems, fasint fuarça al vint plui che jera pussibil (Federigo Comelli, Il me paîs)
6. v.pron.intr. dedicâ se stes, ad in plen, cun impegn e passion:  dâsi ae profession di miedi; e duti li vissari sôs a li à viartis, e dut al si à dât: a miârs a jan sbrocât fûr, a miârs, li flôrs (Ugo Pellis, Al mandolâr)
   Sin. avodâsi , butâsi , consacrâsi , dâsi vie , dedicâsi , rimetisi
7. v.pron.intr. jessi, sucedi, esisti:  po dâsi che e sedi une cjasute bessoline cul lampion impiât; po dâsi che al sedi un altri pelegrin cul ferâl; ma e po jessi ancje une fogolade: une anime di pene che e spiete nome l'auguri e la preiere di un cristian, par jessi diliberade (Josef Cjargnel, La fogolade dal bosc); "Se po ves di dâsi, nissun varès di savê nuie" (Costantino Smaniotto, Maridâsi...!?)

Polirematichis e espressions idiomatichis

• dâsi adun loc.v.
• dâsi aiar loc.v.
• dâsi aiars loc.v.
• dâsi ande loc.v.
• dâsi cont loc.v.
• dâsi coragjo loc.v.
• dâsi da fâ loc.v.
• dâsi dai dincj loc.v.
• dâsi dentri loc.v.
• dâsi di fâ loc.v.
• dâsi di maravee loc.v.
• dâsi di mude loc.v.
• dâsi di volte loc.v.
• dâsi dongje loc.v.
• dâsi il bon timp loc.v.
• dâsi il cambi loc.v.
• dâsi il câs loc.v.
• dâsi impuartance loc.v.
• dâsi in note loc.v.
• dâsi la man loc.v.
• dâsi la mude loc.v.
• dâsi la pâs loc.v.
• dâsi la pueste loc.v.
• dâsi la volte loc.v.
• dâsi lis mans ator loc.v.
• dâsi lis mans intor loc.v.
• dâsi padin loc.v.
• dâsi pâs loc.v.
• dâsi pinsîr loc.v.
• dâsi reson loc.v.
• dâsi ton loc.v.
• dâsi un contegn loc.v.
• dâsi une man loc.v.
• dâsi une regolade loc.v.
• dâsi une reson loc.v.
• dâsi vie loc.v.

Proverbis:

• a messe là che al sune, a scjaldâsi là che al fume, a mangjâ là che al è pan e scjampâ là che si dan
• bisugne dâsi lis mans ator e no spietâ la mane dal cîl
• i cops si dan di bevi un cul altri
• i cops si dan la aghe un cul altri
• no si da al mont un vuarp plui grant di chel che nol vûl viodi
• o vin di fâ come i cops che si dan di bevi un cul altri