Dizionari de Lenghe Furlane

fâsi  fâ|si  [FO]

1. v.pron.tr. (ancje fig.) fâ, preparâ, fabricâ e v.i. par se, cui mieçs, cu lis capacitâts che si à, ancje tes diviersis pussibilitâts di verp analitic:  nol veve nuie in salate, e Rita e capive che nol veve timp di stâ a fâse, salacor nancje voie, e i ufrì un plat di cocins cul vueli. (Carlo Sgorlon, Prime di sere); doprâ imprescj par fâsi di bessôi argagns e zugatui (Riedo Pup, I furlans e i frutins); cumbinâ un sflic di tiere di proprietât e fâsi sù, magari un tic a la volte, une cjase (Roman Michelot, La cjase dai contents); il jet tu tal fasis […] doi minûts prin di lâ a pogniti (Meni Ucel, La Gjis)
2. v.pron.tr. fâ une cierte azion che e à un interès o un cualchi efiet pal subiet stes:  tu ti fasis une schirie di domandis, di chês che salacor prime no ti passavin nancje pal sintiment (Fabian Ros, Il lôf); Julius Cesar si fasè une doce, si insavonà, si resentà, si suià (Fabian Ros, Eivissa mon amour)
   
   1. passâ un ciert timp:  eclatant, tal 1993, l'impresonament di Adriano Biasutti, che si fâs cinc setemanis di preson e po dopo il fer domiciliâr (Angelo Floramo, Cuintristorie dal Nûfcent 1990-2000)
   2. fâ un ciert percors:  mi soi fat dute la strade a pît
   3. jessi ogjet des consecuencis di alc, ancje di une azion casuâl o no volude:  mi soi fat un brut tai, di ca fin ca, che mi è sbrissade la sgoibe (Josef Marchet, Lis predicjis dal muini)
   4. sintî lis consecuencis di un mût di fâ tes relazions cun chei altris:  Cavedalis al si jere fat cualchi nemì personâl (Giovanni Pillinini, Zuan Batiste Cavedalis - Une vite esemplâr)
3. v.pron.intr. di plui personis, fâ alc cun reciprocitât:  fâsi la promesse di jessi amîs par dute la vite; no fâsi concorence dibant (Sandri Carrozzo, Piçulis storiis di mafie furlane)
4. v.pron.intr. cuntun predicatîf, cjapâ une cierte cualitât, funzion, posizion e v.i.:  il segretari al si fâs seri in muse e al fâs un pas indaûr cuasi par dâmi plui puest (Pieri Somede dai Marcs, A è lade cussì…); vie pai agns e tacà a fâsi suspietose e curiose, e a meti la lenghe pardut (Antescûr, L'om misteriôs); si è convertît e si è fat frari (Pieri Somede dai Marcs, Une conference di padre Gemelli); al è propite li, inte comunitât de Plêf o de Vicinie, che il popul si fâs sisteme inte gjestion dal ambient, de economie, de societât e duncje de politiche (Angelo Floramo, Ri-cognossi la autonomie)
   
   1. ancje cun sens di reciprocitât:  tignintsi sù un cul altri, fasintsi baston un par chel altri, parcè che la strade e je lungje (Antoni Beline, Sant Jacum, là che al finìs il mont)
5. v.pron.tr. cuntun predicatîf, fâ cjapâ a cdn. o a alc. une cierte cualitât, funzion, posizion e v.i. che e à interès pal subiet:  impegnâsi a fâsi lôr amîs e a fâsai amîs; a cuistâ la lôr amicizie e la lôr stime (Riedo Pup, Politiche estare dal Friûl)
6. v.pron.intr. vignî, rivâ intun ciert puest:  si è fat sul antîl […] Al à saludât Jacumin: «O ai gust di vioditi», i dîs (Meni Ucel, Pensâ mâl)
7. v.pron.intr. deventâ reâl, o complet, o rivâ insom di un cicli e v.i., ancje daûr di un ciert procediment:  la Lune si veve fate nûf voltis (Gianfranco Pellegrini, La lune te stele)
   Sin. nassi , realizâsi , vignî , deventâ
8. v.pron.intr. deventâ madûr:  tal celâr, la cjanive de casere, il formadi di mont al polse e si fâs (Oscar Puntel, Il formadi di mont)
   Sin. madressi , madressisi , madurî , madurîsi , morestâ
9. v.pron.tr., v.pron.intr. (zerg.) cjapâ stupefacents:  fâsi un acit; si faseve di eroine, ma cumò al è net
10. v.pron.intr. cun funzion causative, produsi une azion che e à interès pal subiet o lassâ che e sucedi:  al pâr che la patrie e sei buine di fâsi cognossi, di fâsi volê ben e di fâsi servî nome cu lis vueris (Riedo Pup, I furlans e la patrie); la Regjine e je il toc plui fuart e che al pues controlâ plui caselis. Duncje si à di stâ atents di no fâsal cjapâ masse adore (Nilde Teresa Negro, Zuìn di scacs)
11. v.pron.tr. (coloc.) dâ dongje alc che si vûl o che al covente:  cui bêçs de stagjon si è fat la machine
    Sin. procurâsi , comprâ , comprâsi , cjoli , cjolisi , cjapâ , cjapâsi
12. v.pron.tr. (pop.) vê un rapuart sessuâl:  a sintîlu lui si è fat dutis lis fantatis de discoteche…

Polirematichis e espressions idiomatichis

• fâsi cûr fuart loc.v.
• fâsi fûr loc.v.
• fâsi il cûl loc.v.
• fâsi il cûr fuart loc.v.
• fâsi inacuarzi loc.v.
• fâsi infûr loc.v.
• fâsi la barbe loc.v.
• fâsi la forcje loc.v.
• fâsi maravee loc.v.
• fâsi rivuart loc.v.
• fâsi valê loc.v.
• fâsi vîf loc.v.
• fâsi viodi loc.v.
• in fâsi di lune loc.av.
• lâ a fâsi benedî loc.v.
• lâ a fâsi fridi loc.v.
• mandâ a fâsi benedî loc.v.
• mandâ a fâsi foti loc.v.
• mandâ a fâsi fridi loc.v.
• mandâ a fâsi jemplâ il cûl di ai loc.v.
• sul fâsi de lune loc.av.

Proverbis:

• avâr agricultôr, no si è mai fat siôr
• ce che al è fat al è fat, nol è di fâsi
• cui che al è fat siôr cul vendi fritulis che nol ledi a vendi colaçs
• cui che al vûl une buine fantate che se fasi
• cui che si fâs piore il lôf lu mangje
• fami fatôr un an e se no mi fâs siôr, gno dam
• fati piore e il lôf ti mangjarà
• il diaul cuant che al devente vieli si fâs eremite
• il timp che si fâs di gnot nol dure trop, chel che si fâs a misdì al dure dut il dì
• l'onôr al è di cui che sal fâs
• nol è mai stât l'ultin di carnevâl che no sedi fate o par fâsi la lune di Fevrâr
• ogni mês si fâs la lune, ogni dì si impare une
• ognidun al à la sô crôs e cui che no le à se fâs bessôl
• par rivâ a ciertis altecis o bisugne fâsi cais o ben jessi acuilis
• timp fat di gnot, se al dure une ore al dure trop