Dizionari de Lenghe Furlane

deventâ  de|ven|tâ  [FO]

1. v.intr. cuntun complement predicatîf, passâ di une cundizion a di une altre, tacâ a jessi intune cierte maniere, a vê une cierte cualitât, cualifiche, profession e v.i.:  Agnese e jere deventade rosse di vergogne (Roberto Ongaro, Il muc); no mi cognossêso? soio deventât tant vecjo? (Pieri Somede dai Marcs, Resurezion a Pontinie); di chê sere lis sôs gnots a deventarin un masanâ pinsîrs, mai finît (Maria Forte, Cjase di Dalban); cualchi sodisfazion, si à di cjatâle ancje in cjase, par no che la cjase e deventi une preson (Josef Marchet, Lis predicjis dal muini)
   Sin. fâsi , vignî a jessi , riessi , vignî a stâi , tornâ
   Var. doventâ , daventâ
   
   1. ancje cun predicatîf sotintindût:  sêso mate o deventaiso? (Luigi Gortani, La ospitalitât)
2. v.intr. cjapâ cuarp, deventâ concret, rivâ a un bon risultât, a une conclusion e v.i.:  mi pâr che si va sù avonde ben. La cjase e devente (Maria Forte, La tiere di Lansing)
   Sin. concretizâsi , fâsi , materializâsi , vignî fûr , realizâsi , vignî
3. v.intr. sucedi:  ma là sù, ta chel palc, ce dal diaul devential? (Alan Brusini, Al Macalè); la robe, dopo un pôc, e salte fûr. A van di jê lis vuardiis e po al deventà il procès (Andreina Nicoloso Ciceri, La fantate inzegnose - Racconti popolari friulani I); oh! ce imbroi che al devente (Pieri Somede dai Marcs, La buteghe dal barbîr)
   Sin. acjadê , avignî² , jessi¹ , nassi , vignî fûr , sucedi , capitâ , colâ¹

Proverbis:

• a concedi un passaç, al devente un transit
• a fâ caritât, no si devente puars
• a fuarce di puartâ, ancje un scarpin di lache al devente une çavate
• a fuarce di sudôrs, si devente siôrs
• al devente ce che Diu al vûl e no ce che il diaul al pense
• al è miôr deventâ ros e dî di no, che no deventâ verts par vê il so
• amôr vieri nol devente ranzit
• cu la pazience si è maridât un frari e tal doman al è deventât un lari
• cu la robe dai altris no si devente siôrs
• cuant che il diaul al devente vieli, al cjol sù la corone
• cuant che il lôf al devente vieli, i cjans i pissin intor
• cuant che la cjar e devente fruste, ancje la anime si juste
• cui che al mangje cjar di pic nol devente ric
• cui che al tocje bacin al devente copari
• cui che nol à mâl sù pe schene nol devente ros
• cul plui menâ, il pan al devente tenar
• cul tignî cont si devente parons di mieç mont
• cul timp e cul lavôr il morâr al devente sede
• daspò muarts si devente galantoms
• galantoms si nas, no si devente
• il corli plui al devente vieli e miôr al zire
• il diaul cuant che al devente vieli si fâs eremite
• il fûc fin che al è sclâf al è biel e bon, ma vuai a lassâlu deventâ paron
• il fum al fâs deventâ biei
• il mus no si spele, il mierli nol devente blanc
• in taule no si devente viei
• in trê dîs no si devente mestris
• l'om che al alce masse il bocâl al devente un nemâl
• la mignestre e fâs deventâ grancj
• lis feminis ogni an a deventin plui zovinis
• lis putanis no deventin rossis
• lis robis lungjis a deventin madracs
• nissun nol è deventât mai puar par fâ caritât
• nol è miluç tant dûr che cul timp nol deventi madûr
• ogni jerbe e devente fen
• par no deventâ splantâts, bisugne sei simpri tirâts
• pic pic, il taiepiere nol deventarà mai ric: finît di picâ, finît di mangjâ
• plui si devente viei, plui i carnevâi a pesin
• Sant Martin il most al devente vin
• si viôt di vidiel ce che al devente bo
• tic tic, il fari nol deventarà mai ric
• une gabele no devente puieri cul metii la siele
• vin, aghe e fûc a son bogns, se no si ju lasse deventâ parons