Dizionari de Lenghe Furlane

nassi  na|ssi  [FO]

1. v.intr. di personis o di animâi, scomençâ la vite, separantsi dal cuarp dai gjenitôrs, o dal ûf:  co al nassè il prin, lu batiarin Tite, come il vieli, e al jere dut un riçot (Dino Virgili, La division); jo o soi nassût e o ai vivût in Argjentine e mi sint argjentin (Enrico Martina, Ricuarts e inlusions); chê altre dì al è nassût un vidiel li di Serfitut (Laurin Zuan Nardin, Scampanotâ)
   
   1. des plantis, tacâ a disvilupâsi de semence in maniere di jessi viodudis:  un vivi facil come il nassi dal sorc e des patatis sot il soreli e la ploie (Alan Brusini, Par stradis lungjis)
2. v.intr. (fig.) vê une cierte origjin:  se no mi sbalgji è nassude ancje jê tal cûl de grape (Pieri Somede dai Marcs, Butìnle in staiare); no si po migo pretindi di jessi ducj nassûts intune cueste di re (Pieri Somede dai Marcs, Cjase di fitâ)
   Sin. divignî , vignî , vignî fûr
3. v.intr. jessi fat intune cierte maniere di nature o cuntun ciert destin:  a son nassûts propit bogns di nuie! (Alan Brusini, Amîs come prime); us ai dit che o sês nassût fortunât (Carlo Sgorlon, Prime di sere); int che e jere tant convinte di jessi nassude nome par paiâ che, nancje dopo paiât, no steve cul cûr in pâs (Riedo Pup, I furlans e i bêçs)
4. v.intr. di flum o riul, tacâ a cori, vê la sorzint:  la Livence e nas turchine, alì dal Gorgaç. Subit disore Polcenic (Dino Virgili, Un riul tra Venit e Friûl)
5. v.intr. di un astri, tacâ a jessi viodût parsore dal orizont tal so moviment circolâr:  Brida e viveve di là des monts che al nas il soreli furlan (Dino Virgili, La aghe da pît la cleve); al veve bisugne di cjaminâ tal fresc prin che il soreli, che al nasseve daûr dai cucs, al scjaldàs il mont (Pieri Menis, Sul agâr)
   Sin. dâ sù , jevâ , vignî sù
6. v.intr. di cualsisei fenomen individuâl, sociâl, economic, naturâl e v.i., tacâ a esisti e a fâsi sintî:  e saveve butâle in staiare tant ben che la ligrie e nasseve intor di jê (Maria Forte, Cjase di Dalban); ator pal Friûl a nassin dai comitâts di tutele ambientâl (Max Mauro, Un Friûl difarent: i 90 mhz di Onde Furlane); il Moviment Friûl al è nassût intor di un moviment pe facoltât di medisine (Adrian Cescje, Memoriis di politiche linguistiche)
   Sin. tacâ , scomençâ
7. v.intr. vignî a jessi, spec. par câs e tant che novitât:  se in Friûl lis votazions a vignissin fatis, metìn a dî, cun dôs listis, une di autonomiscj e une di centraliscj ce nassaressial? (Josef Marchet, Votazions regjonâls); Faustin, par prin, al capì dut,… ce che al nasseve… (Maria Forte, Cjase di Dalban)
   Sin. capitâ , sucedi , jessi¹ , vignî fûr
8. s.m.sing. prin moment de esistence di cdn. o di alc:  o sin sul nassi di une gnove ete (Valentino Castellani, La societât de informazion: cirint lis origjins)
   
   1. origjin:  al voleve sintî sot i pîts la fuarce dal so nassi, la fuarce des vecjis lidrîs (Maria Forte, La tiere di Lansing)

Proverbis:

• a son i merlots che a restin neris, di cuant che a nassin fin cuant che a muerin
• al nas ce che si semene e ce che si insede al mene
• amôr che al nas in malatie cuant che si vuarìs al passe vie
• ce che nol nas in cent agns, al nas in un
• ce che tu âs semenât, al è nassût; ce che tu âs insedât, al à menât
• che nol nassi al mont cui che nol lavore
• cualchi len al nas par indorâ, cualchidun par bati il mus e cualchidun par fâ coronis
• cuant che il to mus al nasseve, il gno al leve a scuele
• cuant che la femine e nas l'om al à di savê puartâ il fas
• cuant che la ue e nas di avrîl, si bêf par sutîl
• cuant che si metisi a fâ cjapiei, e nas la int cence cjâf
• cuant che si semene vece, nol po nassi forment
• cui che al nas al à di murî
• cui che al nas contadin al crepe bifolc
• cui che al nas contadin al crepe vilan
• cui che al nas cuadri al crepe taront
• cui che al nas di gjaline al beche par tiere, se no no je gjaline vere
• cui che al nas di gjaline al sgjarpede
• cui che al nas di gjat al pie surîs
• cui che al nas disfortunât ancje se al cole par daûr si romp il nâs
• cui che al nas disfortunât i tampieste sul cûl ancje sentât
• cui che al nas mus al crepe pandolat
• cui che di gjat al nas al cjape surîs a scûr
• cui che di gjate al nas surîs al pie e se no 'nt pie, no je sô fie
• cui che di lunis nol fâs tant che di domenie nol è nassût di buine femine
• cui che nol vûl in chest mont sfadiâ che nol stedi a nassi
• denant da la ore ni che si nas ni che si mûr
• denant da la ore no si po ni nassi ni murî
• di gjaline si nas, di gjaline si sgarfe
• di robe e nas robe
• di un disordin cualchi volte al nas un ordin
• di un fal ind nas mil
• di un fat ind nas mil
• di un sterp no nassin nolis di tropis sortis
• di une lusigne al nas un grant fûc
• dulà che si nas ogni jerbe e pas
• dut chel che di gjat al nas surîs al cjape
• fûr di un rôl no nassin coculis
• fûr di un sterp a nassin tropis sortis di viminis
• galantoms si nas, no si devente
• i rîs a nassin ta la aghe, e àn di inneâsi tal vin
• il primarûl al nas cuant che al vûl
• il puar al è nassût di une buiace
• il selino e i savôrs a van cincuante dîs a cjadaldiaul prin di nassi
• il Signôr nus à batiâts in chê dì che si è nassûts
• in chest mont bisugne nassi fortunâts
• la tegne no nas mai di un sôl cjâf
• lis feminis che a nassin in an bisest a son dutis cence sest
• nissun nol nas cence savê
• nissun nol nas mestri
• no mangjâ la galete prin che a nassin i cavalîrs
• no si cuiste la nobiltât nassint, ma ben vivint
• no si cuiste la nobiltât nassint, ma degnementri vivint
• nol è mai nassût l'agnelut che nol sedi nassût ancje il so sterput
• nol mûr mai chel che al à fat la robe che nol sedi nassût chel che al à di mangjâle
• pan e vin al fâs nassi un biel fantulin
• primarûl al po nassi cuant che al vûl
• se si met a fâ cjapiei, la int a nas cence cjâf
• si nas cjalts e si mûr frêts
• si nas par muri
• si sa cemût che si nas ma no cemût che si mûr
• supierbie e ignorance a nassin sul stes pedâl
• te cjase dai galantoms a nasin prin lis feminis e po i oms
• tra lis spinis e nas la rose
• une idee e nas tal cjâf ma e cres tal cûr