Dizionari de Lenghe Furlane

meti dongje    [FO]

1. loc.v. (ancje fig.) fâ in mût che plui elements, materiâi o imateriâi, a sedin insiemi o coordenâts o disponibii o creâ un complès formât di plui elements, tocs, parts e v.i.:  al jere daûr a meti dongje i libris, par cori a scuele di buride (Carlo Sgorlon, Prime di sere); prin di dut Cavedalis al si preocupà di meti dongje un esercit regolâr e di organizâ la difese (Giovanni Pillinini, Zuan Batiste Cavedalis - Une vite esemplâr); un puzzle: une schirie di tocuts di meti dongje, ognidun cu la sô forme (Raffaele Serafini, Altris contis di famee)
   Sin. dâ dongje , unî , meti adun , zontâ , riunî , tirâ dongje , tirâ adun , parâ dongje , dâ adun
   
   1. otignî cuntun cualsisei procès:  une des plui grandis dificoltâts par cui che al impare une seconde lenghe e je chê di meti dongje une pronunzie perfete, cence acent forest (Franc Fari, Eric Pascul, Autonomie e democrazie, i numars de socializazion umane)
   2. concepî, meti in relazion plui elements cu la deduzion, cu la imagjinazion e v.i.:  nol rivave a figurâsi sô mari zovine e mancul ancjemò a meti dongje di jê la muse di Celso (Gianni Gregoricchio, Îr e doman)
2. loc.v. meti, fâ o dî alc in plui:  ancje Anzulin si sintì in dovê di meti dongje alc ae cjacarade di 'Sefin. «Mame, le pensi ancje jo come 'Sefin. […]» (Tarcisio Venuti, La cjase di Toni)
   Sin. zontâ
3. loc.v. meti in confront, in paragon:  la citazion e je stade fate cuntune vore di umiltât e cence nissune intenzion di meti dongje i doi lavôrs (Raffaele Serafini, B123ST)
   Sin. meti , meti in confront , meti in paragon , paragonâ
   
   1. calcolâ simil, de stesse sorte, almancul par ciertis carateristichis:  no mi dismenteavi purnò che a jerin ancje soldâts, e par chel mi vignive naturâl di metiju dongje dai militârs des casermis di dute la valade (Carlo Sgorlon, Il dolfin)
4. loc.v. fâ jessi intune relazion di comunance, di condivision, di analogjie e v.i.:  l'ûs de definizion di seconde Irlande al cjatarà ancjemò rivoc tes aulis parlamentârs (e no dome) e, plui indenant, al metarà dongje ai furlans, ai slovens e ai cravuats ancje i sudtirolês, i ladins e i sarts (Carli Pup, La seconde Irlande); chel destin che al à metût dongje milions di lôr (Max Mauro, Buchenwald 1944)
5. loc.v. fâ jessi intune relazion, ancje tal sens di fâ cognossi, fâ morosâ:  al ven a stâi che disot Codroip, si sposin doi colonos che ju veve metûts dongje Jacum e cussì al vignì invidât a gnocis (Angelo Covazzi, Invidâ e disvidâ)
6. loc.v. meti sul fûc a scjaldâ o a cuei:  e varès propri de voie done Sabide, cuant che rive a Lorençâs strache e finide, di impiâ il fûc, e meti dongje a fâ da cene! (Giovanni Gortani, La cjargnele dal avout); "Gabriel! Sù met dongje le cogume biel prest" (Pieri Çorut, Il Strolic furlan par l'an 1833)
   Sin. meti sù
   
   1. fâ di mangjâ:  la siore e saveve meti dongje ben la robe; cun cundizion e misure e po, ben planchin, messedâle cu la cjace di len e, atente, judâ il fûc, che al butave sù sflamiadis che i scalmanavin la muse (Maria Forte, Cjase di Dalban)
      Sin. dâ dongje
7. loc.v. deventâ plui gras, plui in cjar:  «Ce aial di vê mo, chel frut… nome piel e vues che nol met dongje nuie?» (Pieri Menis, Une cotule pal dì de sagre); tai cjôts i purcits di grasse a metevin dongje dì par dì (Dino Virgili, La aghe da pît la cleve)
   Sin. meti sù

Components:

• dongje av., prep., adi.inv.
• meti v.tr.