Dizionari de Lenghe Furlane

becâ  be|câ  [FO]

1. v.tr. di uciei, bati, colpî o cjapâ cul bec:  une cheche dispetose che mi becave i sghirets e jo o scjampavi (Alan Brusini, Come tai romançs); bechimi, bechimi il deit, gardilinut!… (Pier Paolo Pasolini, I Turcs tal Friûl)
   Cfr. becotâ , becolâ , becuçâ
   
   1. di insets o altris besteutis, colpî cul asei o cun cualchi altri aparât, par sponzi, par supâ sanc, par scliçâ velen e v.i.:  no vevin fat cuatri pas, che une [âf] lu becà (Catarine Percude, Lis âfs); al viôt un brut ragnat che dibot i becave un pît (Pieri Somede dai Marcs, Resurezion a Pontinie)
   2. dai sarpints o di altris animâi, muardi par un moment, ancje scliçant velen:  un sarpint che si veve platât te bucule, lu à becât tal braç e chel al è a pene rivât a zigâ e al è muart (Sandri Carrozzo, Il miluç de magne)
   3. di plante, fâ mâl cun struturis a ponte, ancje cun sostancis che a fasin mâl:  ostro mi bechin ancjemò lis urtiis (Pieri Somede dai Marcs, Ursule)
   4. di cualsisei robe a ponte o fine o ancje dal aiar, dal frêt e v.i., fâ une sensazion di mâl o di fastidi:  a lane di piore e becave talmentri tant che ti vignivin lis vissiis tes gjambis, si veve une pice, une pice che cul gratâsi lis gjambis a jerin rossis! (AAVV, Sul florî); "[…] met sù cheste [camisole], che a ti è juste." "Ma e beche su la piel!" (Carlo Tolazzi, La salamandrie tal fûc); cumò le beche pitost il frêt gaiarin des stagjons (Ivano Urli, Storie di Vera)
2. v.tr. (fig.) ancje di personis, mangjuçâ alc, mangjâ pôc:  i fruts si sentarin là intor par becâ un bocognut ancje lôr (Federigo Comelli, Il me paîs)
3. v.tr. (fig.) rivâ a cjatâ e cjapâ, in particolâr di sorprese o cdn. che al cîr di no fâsi cjapâ:  a ti, zaromai, ti àn par disertôr. Se nus bechin, par ben che nus vadi, nus menin in Gjermanie (Gianni Gregoricchio, Trê feminis); il guvier nol mancjave di cirî e di becâ chei tâi che no fasevin il lôr dovê (Josef Marchet, Cuintristorie dal Friûl fin sot la Italie)
   Sin. brancâ , brincâ , cjapâ , cjoli , çafâ , çufâ , gafâ , gaspâ , gatamâ , imbrancâ , pescjâ¹ , piâ , cjatâ a nolis , cjatâ in cove , cucâ , dâ la gafe , scuaiâ
   
   1. cjatâ ancje par intop:  se o bechi chei bastardons di goliarts i fâs mangjâ la feluche! (Checo Tam, Random 1)
   2. rivâ li di un ciert puest o li di cdn.:  palaçons e locandonis, ma la marine no si po becâle […] une filiade alte e fisse, cun tant di cise, nus tapone el mâr. (Arturo Feruglio, Viaç a Vignesie)
4. v.tr. (fig.) rivâ a centrâ un bersai:  mi strissinavi su la nêf par no fâmi becà des fusiladis (Alan Brusini, Come tai romançs)
   Sin. centrâ , cjoli , rivâ , cjapâ
5. v.tr. (fig., ancje ass.) di robe di mangjâ, fâ un efiet in bocje che al somee sponzi, tant che il pevar, il pevaroncin e v.i.:  stait atents che [il cren] al beche une vore (Giorgio Pascoli, Il Litum: jerbis salvadiis te cusine)
   
   1. massime di robe di bevi, piçâ in bocje par vie des bufulutis di gas
      Sin. piçâ
6. v.tr. (fig.) dâ fastidi, provocâ cdn.:  "Pardabon al è dai venezians che tu âs voie ancjemò di pretindi justizie, Cenci?" lu beche des voltis Jacum Manente (Franco Marchetta, Madalene)
   Sin. stocâ² , stomblâ , stuzigâ , sustâ¹

Proverbis:

• cui che al nas di gjaline al beche par tiere, se no no je gjaline vere
• la bisse e à becât il çarlatan
• la lipare e à becât il çarlatan
• ogni moscje e beche
• salamandrie becant, agonie sunant